Fanontanian’ny Mpamaky

Ao amin’ny Filipiana 2:9, dia hoy i Paoly momba an’i Jesosy: “Izany no nanandratan’Andriamanitra Azy indrindra sy nanomezany Azy ny anarana izay ambony noho ny anarana [hafa, NW ] rehetra”. Inona io anarana vaovao io? Ary raha ambany kokoa noho i Jehovah i Jesosy, amin’ny ahoana ny anaran’i Jesosy no ambony noho ny anarana hafa rehetra?

Izao no vakina ao amin’ny Filipiana 2:8, 9: “Ary rehefa hita fa nanan-tarehy ho olona Izy [Jesosy], dia nanetry tena ka nanaiky hatramin’ny fahafatesana, dia ilay fahafatesana tamin’ny hazofijaliana. Koa izany no nanandratan’Andriamanitra Azy indrindra sy nanomezany Azy ny anarana izay ambony noho ny anarana [hafa, NW ] rehetra”.

Io andalan-teny io akory tsy midika hoe satria i Jehovah ihany no manana anarana izay ambony tanteraka noho ny anarana hafa rehetra, dia tsy maintsy ho persona iray ihany i Jesosy sy i Jehovah. Araka ny asehon’ny teny manodidina ao amin’ny Filipiana toko faha-2, i Jesosy dia nandray ilay anarany misandratra taorian’ny nitsanganany tamin’ny maty. Talohan’izay izy dia tsy nanana an’io anarana io. Etsy an-danin’izany, i Jehovah dia efa fara tampony foana, ary ny toerana tanany dia tsy niova mihitsy. Ny nandraisan’i Jesosy anarana izay ambony noho ilay anarana nananany talohan’ny fanompoany teto an-tany dia manaporofo fa tsy i Jehovah ihany akory izy. Rehefa nilaza i Paoly hoe nomena anarana izay ambony noho ny anarana hafa rehetra i Jesosy, ny tiany holazaina dia hoe ankehitriny i Jesosy dia manana ny anarana ambony indrindra eo amin’ny zavaboarin’Andriamanitra rehetra.

Inona ilay Anarana ambonin’i Jesosy? Ny Isaia 9:5 dia manampy antsika hamaly izany. Maminany momba ilay Mesia ho avy, dia i Jesosy, io andinin-teny io ka manao hoe: “Ny fanapahana dia eo an-tsorony, ary ny anarany atao hoe Mahagaga, Mpanolo-tsaina, Andriamanitra Mahery, [Ray Mandrakizay, NW ], Andrian’ny fiadanana.” (Izahay no manao sora-mandry.) Eto ny “anaran’i” Jesosy dia mifandray amin’ny toerana sy ny fahefana ambony tanany, ka izany koa no ahazoantsika ny hevitry ny hoe “ny anarana izay ambony noho ny anarana [hafa, NW ] rehetra” voatonona ao amin’ny Filipiana 2:9. Ny lohalika rehetra dia didiana mba handohalika eo anatrehan’i Jesosy ho fanekena ny toeram-pahefana ambony nomen’i Jehovah azy — toeram-pahefana ambony kokoa noho izay nomena ny zavaboary hafa na iza na iza. Ny teny hoe “hafa” ao amin’ny Fandikan-tenin’Izao Tontolo Izao Vaovao dia tsy aseho mivantana ao amin’ilay soratra grika fototra, fa azo avy amin’ny hevitr’ilay andinin-teny kosa. Ny “anaran’i” Jesosy akory tsy ambony noho ny anaran’ny tenany manokana, fa ambony noho ny anaran’ny zavaboary hafa rehetra kosa.

Faly toy inona moa isika miaraka amin’ny anjely sy ny olombelona mahatoky rehetra mandohalika ho fanekena ny anaran’i Jesosy! Manao izany isika amin’ny fanekena an’i Jesosy eo amin’ilay toerana misandratra sy mahery nomen’i Jehovah azy — “ho voninahitr’Andriamanitra Ray”. — Filipiana 2:11; Matio 28:18.