Nivory Izy Ireo Tamin’ny Naha-mpidera An’Andriamanitra Amim-pifaliana
NY VAHOAKAN’I Jehovah Andriamanitra fahiny, dia nodidiana mba “hifaly tokoa” rehefa nanolotra fanompoam-pivavahana. (Deoteronomia 16:15). Azo antoka fa nanome antony tsara hifaliana ho an’ny Vavolombelon’i Jehovah ireo Fivoriamben’ny Distrika 1995/1996 hoe “Mpidera An’Andriamanitra Amim-pifaliana”.
Hatramin’ny nanombohan’io fitohitohizana fivoriambe io, dia nampiorina finoana izy ireny. Nasehon’izy ireny koa ny fomba hahitana fifaliana eo amin’ny tontolo iray tsy ahitam-pifaliana. Aoka isika handinika ilay fivoriambe, ka hodinihintsika isaky ny andro.
‘Miderà An’i Jehovah, Ianareo ry Olona (...) ka Aoka Hifaly!’
Niorina tamin’ny Salamo 149:1, 2 (NW ) ny foto-kevitra etsy ambony tamin’ny andro voalohan’ny fivoriambe. Ilay lahateny hoe “Manana Antony Hanaovana Hiakam-pifaliana Isika” dia nandinika ny fampiharana ilay faminaniana ao amin’ny Isaia toko faha-35. Nisy fahatanterahan’izy io tamin’ny Isiraely fahiny, ary indrindra indrindra amin’izao androntsika izao, tamin’ny famerenana ireo mpivavaka amin’i Jehovah ho amin’ny fanambinana sy ny fahasalamana ao amin’ny paradisa ara-panahy iray. Araka izany, ireo mpamonjy fivoriambe dia nanana antony nanaovana hiakam-pifaliana noho izay nokasain’i Jehovah hatao amin’ny vahoakany ao amin’ny paradisa ara-panahy sy ao amin’ilay Paradisa fizika manatona, efa akaiky aoka izany.
Ilay lahateny fototra hoe “Voatokana ho Mpidera An’Andriamanitra Amim-pifaliana Maneran-tany” dia namaly ilay fanontaniana hoe: Inona no mahatonga antsika ho voatokana tsy hiaraka amin’itỳ tontolo itỳ? Izany dia ny fanompoam-pivavahana tafaray atolotsika an’i Jehovah. Na aiza na aiza iainan’ny Vavolombelon’i Jehovah eto amin’itỳ tany itỳ, dia miteny sy mampianatra amim-pifanarahan-tsaina izy ireo. Mifaly koa izy ireo noho ny fikasan’i Jehovah lehibe hanamasina ny anarany masina sy hanamarina ny fiandrianany amin’ny alalan’ny Fanjakany. Ahoana anefa no anampian’i Jehovah antsika hanana toerana ao amin’ny fikasany? Nanankina tamintsika ny fahamarinan’ny Teniny masina, izy. Nanome antsika ny fanahiny masina Andriamanitra. Notahiny isika tamin’ny firahalahiana maneran-tany sy ny fandaharana ho amin’ny fanompoam-pivavahana madio. Ny fianakaviana iraisam-pirenena misy antsika dia manampy antsika hanompo an’i Jehovah amin-kafaliam-po lehibe.
Ny hoe “Fitoerana ho Tafasaraka Amin’izao Tontolo Izao sy Tsy Hisy Pentimpentina avy Aminy” dia nanantitrantitra ny ilana hanalavirana ny fizahan-tavan’olona sy ny fanavakavahana noho ny saranga. (Jakoba 2:5-9). Ny sasany dia mety tsy hifanerasera afa-tsy amin’ireo mitovy fiaviana na toerana ara-toe-karena aminy ihany, ka hanao tsirambina ireo Kristiana tahaka azy, izay mahantra na tsy nambinina. Ny hafa dia mety hirona hanome tombontsoa manokana an’ireo izay manana toerana misy andraikitra ao amin’ny kongregasiona. Hadinon’izy ireo fa ny tombontsoa lehibe indrindra mety hananan’iza na iza, dia ny maha-Vavolombelon’i Jehovah. Noho izany, dia tsy tokony havelantsika hanisy pentimpentina amintsika sy hanakorontana ny fiadanan’ny kongregasiona ireo fironana araka an’izao tontolo izao. — 2 Petera 3:14.
Ilay lahateny hoe “Voaomana mba Hanambady ve Aho?” dia nanazava fa maro no maimaika hiditra ao amin’ny fanambadiana. Misy manambady mba handosirana tarehin-javatra sarotra iray any an-trano, na satria manambady ireo mitovy taona aminy. Ireo antony marim-pototra hanambadiana anefa dia mahatafiditra ny fanirian’ny andaniny avy hanatratra tanjona teokratika, ny fitiavana marina, ny filana namana sy tsy fananana ahiahy, ary ny faniriana hitaiza zanaka. Tena ilaina ny fampiofanana ara-panahy mba hiomanana ho amin’ny fanambadiana. Ankoatra ny zavatra hafa, dia ilaina ny mampitombo toetra faniry amin’ny fitafiana ilay toetra vaovao. Fahendrena koa ny hanaovana izay hahazoana antoka fa ilay antenaina ho vady dia manome porofon’ny tena fananana fifandraisana amin’i Jehovah ary mifampiraharaha amin’ny hafa amim-panajana. Fahendrena koa ny fitadiavana torohevitra avy amin’ny Kristiana matotra. — Ohabolana 11:14.
Io dinidinika nanome fanazavana io dia narahin’ny iray hafa izay nitondra ny lohateny hoe “Ray Aman-dreny Izay Mahita Fahafinaretana Noho Ireo Zanany”. Mazàna ny fahaterahan’ny zaza iray dia fotoam-pifaliana lehibe. Mitondra andraikitra lehibe koa anefa ny fiterahan-janaka. (Salamo 127:3). Araka izany, dia zava-dehibe ny ampianarana ny ankizy ho tia an’i Jehovah. Afaka manao izany ireo ray aman-dreny amin’ny firesahana tsy tapaka ny momba an’i Jehovah amin’ireo zanany sy amin’ny fampiharana ireo fotopoto-pitsipiky ny Teniny ao amin’ny fianakaviana.
Nifarana tamin’ny zavatra tsy nampoizina iray ny andro voalohany tamin’ny fivoriambe — ny famoahana ilay bokikely vaovao hoe Ny Vavolombelon’i Jehovah sy ny Fampianarana. Izy io dia manazava tsara fa ny Vavolombelona dia “mampirisika ireo tanora eo anivony mba hianatra amim-paharisihana sy handray ho zava-dehibe ireo asa anendrena azy hataony any an-tsekoly”. Io zavatra vita an-tsoratra io koa dia manazava ny vokatra miavaka nentin’ireo kilasy fampianarana mamaky teny sy manoratra notarihin’ny Vavolombelon’i Jehovah an-taonany maro tany Nizeria sy Meksika, ary tany amin’ny tany hafa. Ilay bokikely dia tokony hanampy ireo mpanabe mba hahita fa mihevitra ny fianarana ho zava-dehibe isika.
‘Manatera Fanati-piderana (...) ho An’Andriamanitra Mandrakariva’
Niorina tamin’ny Hebreo 13:15 ny foto-kevitra etsy aloha ho an’ny andro faharoa. Ilay fandaharana tamin’ny maraina dia nampiseho fitohitohizan-dahateny momba ny “Fanoinana ny Antso mba Hidera An’i Jehovah”. Tsy fanakanana mba hamaliana io antso io akory ny taona. Ny Salamo 148:12, 13 dia mampirisika mafy ny zatovolahy, ny zatovovavy, ny antitra sy ny tanora mba hidera an’i Jehovah. Maro tamin’ireo mpanompon’i Jehovah falifaly no afaka nampitombo ny fideran’izy ireo. Maneran-tany, dia misy maherin’ny 600 000 no mandray anjara amin’ny asa fitoriana manontolo andro, na ny asan’ny mpisava lalana. Maherin’ny 15 000 no nirotsaka ao amin’ny asan’ny mpisava lalana manokana, ary 15 000 mahery amin’ny fanompoana ao amin’ny Betela.
Ny “Fanompoana ao Anatin’ny Tsy Fivadihana Miaraka Amin’ny Fandaminan’i Jehovah” dia lahateny izay nampiseho fa tena ilain’ny mpanompon’Andriamanitra ny tsy fivadihana. Ny hoe tsy mivadika amin’i Jehovah dia midika ho firaiketana aminy amim-pifikirana mafy aoka izany, hany ka miasa toy dity mahery izy io. Ny tsy fivadihana dia mitaky ny hanalavirantsika ny finiavana handika ireo didin’ny Baiboly, na mahita antsika ny hafa na tsia. Izy io koa dia mitaky ny tsy hivadihantsika amin’ny fanohanana ireo fampianaran’ny Baiboly hita ao amin’ny gazety Ny Tilikambo Fiambenana sy ny Mifohaza! ary koa ireo sakafo ara-panahy hafa rehetra omen’ny Fikambanana Watch Tower. Narahin’ny lahateny ho an’ny batisa io lahateny io. Fifaliana toy inona moa rehefa nanome porofon’ny fanoloran-tenany ho an’i Jehovah ireo mpilatsaka hatao batisa!
Ny teny ao amin’ny Hosea 4:1-3 no nanome modely ho an’ilay lahatenin’ny tolakandro hoe “Hatsaran-toetra sa Faharatsiam-pitondran-tena — Iza Amin’ireo no Katsahinao?” Na dia nihasimba aza ny fiheveran’izao tontolo izao ny hatsaran-toetra, ny Kristiana dia tsy maintsy manao “ezaka amim-pahatsorana” mba hikatsahana hatsarana ara-pitondran-tena. (2 Petera 1:5, NW ). Izany dia miandoha eo amin’ny fomba fisainan’ny olona iray. Raha feno hatsaran-toetra ny eritreriny, dia hilaza teny madio sy mahasoa ary mampahery izy, ary hikely aina izy mba hanao ny marina eo amin’ny fifampiraharahany amin’ny hafa. Ny fikatsahana ny hatsaran-toetra dia mahatafiditra koa fahatakarana ny hevitry ny hafa sy fangorahana ny Kristiana tahaka ny tena izay mijaly noho ny fahoriana na fahaketrahana. — 1 Tesaloniana 5:14, NW.
Ny lahateny hafa iray manao hoe “Mitandrema Amin’ny Fandriky ny Devoly” dia nampitandrina ny Kristiana mba tsy hitono tena amin’ireo fitaoman’ny demonia. Eo amin’ny faritry ny fitsaboana aretina, dia mila ny ho mailo ny Kristiana raha ny amin’ireo fomba fanaovan-javatra toy ny hypnotisme, izay misy soritry ny asan’ny maizina. Amin’ny toe-javatra hafa, izay ataon’ny isam-batan’olona mba hikarakarana ny fahasalamany ara-batana dia raharahan’ny tenany manokana.
Nifarana tamin’ny zavatra tsy nampoizina nahafaly iray ny andro faharoa — ny famoahana boky fanao am-paosy vaovao iray natao mba hanampiana ireo olona tso-po mba handroso haingana ho amin’ny fanoloran-tena sy ny batisa. Io boky vaovao 192 pejy io dia mitondra ny anarana hoe Fahalalana Izay Mitarika ho Amin’ny Fiainana Mandrakizay. Ilay boky hoe Fahalalana dia mampiseho ny fahamarinana amin’ny fomba manorina. Tsy mifantoka amin’ny tsy fankasitrahana ireo foto-pampianarana diso izy io. Ny fiteny mazava sy ny famelabelarana lojika ao aminy dia tokony hanamora ny fampiasana io boky io mba hitarihana fampianarana ny Baiboly sy hanampiana olona hahazo ilay fahalalana an’Andriamanitra manafana ny fo.
“Aoka ho Dibo-kafaliana, Ianareo ry Olona, ary Mifalia Mandrakizay”
Ireo teny avy ao amin’ny Isaia 65:18 (NW ) ireo no foto-kevitry ny andro fahatelo tamin’ny fivoriambe. Ny fahatanterahan’ny faminaniana ao amin’ny Baiboly dia manondro ny 1914 ho ny taona nidiran’itỳ fandehan-javatra ratsy itỳ tao amin’ny andro farany ho azy. Noho izany, dia nitana ny fahalianan’ny mpihaino ilay fitohitohizan-dahateny nitondra ny lohateny hoe “Mpidera An’Andriamanitra Amim-pifaliana Mandritra ny Fifaranan’itỳ Fandehan-javatra Itỳ”. Nasehon’ireo mpandahateny fa olona an’arivo tapitrisany maro no niharan’ny fitaomana maherin’ny toe-tsain’izao tontolo izao izay mierina sy mahery setra. Rehefa mandeha ny fotoana, izy ireo dia hanjary hotsaraina ho anisan’izao tontolo izao misy an’i Satana ho mpanapaka. Araka izany, dia izao no fotoana tokony hanaovana safidy. Eo amin’ny andaniny aiza no irintsika hisy ny tenantsika? Moa ve isika maniry ny hanolotra fanompoam-pivavahana amin’i Jehovah sy hanohana ny fiandrianany, sa isika handeha hamela an’i Satana ho tonga mpanapaka antsika amin’ny fanaovana ireo zavatra izay mampifaly azy? Isika rehetra dia tokony hiandany amin’ny fomba mazava tsara amin’i Jehovah.
Nanome ventin-kanina hoeritreretin’ny rehetra nanatrika ilay lahateny ampahibemason’ny fivoriambe nanao hoe “Derao Ilay Mpanjakan’ny Mandrakizay!” Na dia toa tsy takatry ny sain’olombelona marefo aza ilay hevitra ny amin’ny mandrakizay, dia mahatakatra izany amin’ny fomba feno i Jehovah. “Jehovah no Mpanjaka mandrakizay doria”, hoy ny hiran’ny mpanao salamo. (Salamo 10:16). Io Mpanjakan’ny mandrakizay io dia nanokatra ny lalana ho an’ny olombelona mba hananany fiainana mandrakizay amin’ny alalan’i Jesosy Kristy Zanany. (Jaona 17:3). “Eny, isika olombelona mpanota dia mety hahazo ny fiainana mandrakizay amin’ny alalan’ny fampianarana araka an’Andriamanitra sy ny finoana ny sorom-panavotan’i Jesosy”, hoy ilay mpandahateny.
Rehefa nanatona ny fifaranany ilay fivoriambe, dia nahazo fampaherezana ireo nanatrika noho ilay lahateny farany mitondra ny lohateny hoe “Fiderana An’i Jehovah Amim-pifaliana Isan’andro Isan’andro”. Nampahery ny naharay tatitra momba ny fandrosoan’ny asa fanaovana mpianatra manerana ny tany. Ary dia voatosika ireo mpamonjy fivoriambe mba ‘hankalaza an’i Jehovah isan-andro sy hidera ny anarany mandrakizay’. — Salamo 145:2.
Manaisotra ny fifaliana amin’izao tontolo izao ireo asa feno habibiana tsy hay lazaina. Na dia izany aza, dia afaka manana fifaliana araka an’Andriamanitra ny isam-batan’olona manana finoana feno an’i Jehovah. Amin’ny maha-firahalahiana maneran-tany azy, ny Vavolombelon’i Jehovah àry dia afaka mamerina ireto teny manaraka ireto ao amin’ny Salamo 35:27, 28: “Aoka hihoby sy hifaly izay mankasitraka ny fahamarinako; ary aoka izy hanao mandrakariva hoe: Hankalazaina anie Jehovah, Izay mankasitraka ny fiadanan’ny mpanompony. Ary ny lelako hilaza ny fahamarinanao; ny fiderana Anao no hataoko mandrakariva.”
[Sary, pejy 7]
Handray soa avy amin’ilay bokikely “Ny Vavolombelon’i Jehovah sy ny Fampianarana” ireo fianakaviana
[Sary, pejy 8, 9]
Ilay boky vaovao “Fahalalana Izay Mitarika ho Amin’ny Fiainana Mandrakizay” dia mampiseho ny fahamarinana amin’ny fomba manorina
[Sary, pejy 9]
Maro no natao batisa ho mariky ny fanoloran-tenany ho an’i Jehovah
[Sary, pejy 9]
Nihetsi-po lalina ireo mpanatrika ny fivoriambe tamin’ilay fampisehoana tantara hoe “Fanomezam-boninahitra An’ireo Mendrika, Amin’ny Andro Fahanterany”