“Mpidera An’Andriamanitra Amim-pifaliana” — Fivoriamben’ny Distrikan’ny Vavolombelon’i Jehovah
Miandry anao ny telo andro hitondra soa amin’ny fampianarana momba ny Baiboly. Noho ny fisian’ny fivoriambe 180 voalamina hatao any Etazonia fotsiny, dia azo inoana fa hisy fivoriambe hatao any akaikin’izay misy anao. Aoka ianao ho eo rehefa hanomboka amin’ny mozika ny fandaharana amin’ny 9.40 maraina, ny zoma.
Ny fandaharana ny zoma maraina dia hampisongadina fanamarihana fiarahabana tonga soa ary koa ilay lahateny fototra hoe “Voatokana ho Mpidera An’Andriamanitra Amim-pifaliana Maneran-tany”. Ny tolakandro, ny fandaharana dia hifantoka amin’ny tanora sy ny ray aman-dreny ary ny fampianarana. Tsy hirin’ny tanora ny ho diso an’ilay lahateny hoe “Voaomana mba Hanambady ve Aho?” Ireo ray aman-dreny dia tokony hihaino amim-pitandremana ilay lahateny hoe “Ray Aman-dreny Izay Mahita Fahafinaretana Noho Ireo Zanany”. Hifarana ny fandaharana ny tolakandro amin’ilay lahateny hoe “Ny Fampianarana — Ampiasao mba Hiderana an’i Jehovah Izany”. Izay horesahina dia tokony hanampy ny tanora mba handroso amim-pahombiazana any an-tsekoly.
Ny fandaharana ny asabotsy maraina dia hampisongadina ny batisa, ary hisy fahafahana homena an’ireo izay mahafeno fepetra hatao batisa. Ny tolakandro dia hisy fandinihana amim-pahatsorana ny fomba nampiasan’i Satana hatramin’ny taloha ela be ny faniriana eo amin’ny lahy sy ny vavy mba hamandrihana olona. Hatao koa ilay lahateny mahery hoe “Mitandrema Amin’ny Fandriky ny Devoly”. Hifarana ny fandaharana amin’ilay andro amin’ilay lahateny mafonja hoe “Ny Antony Ilan’ny Olombelona ny Fahalalana An’Andriamanitra”.
Ny alahady maraina, ilay fitohitohizan-dahateny hoe “Mpidera An’Andriamanitra Amim-pifaliana Mandritra ny Fifaranan’itỳ Fandehan-javatra Itỳ” dia hampifantoka ny saina ho amin’ireo fisehoan-javatra hanozongozona izao tontolo izao izay miandry antsika tsy ho ela. Izy io dia hanantitrantitra ny ilana maika ny handosirana ho amin’ny fiarovana, alohan’ny hanombohan’ilay “fahoriana lehibe” noresahin’i Jesosy Kristy ao amin’ny Matio 24:21.
Hifarana ny fandaharana ny alahady maraina amin’ilay fampisehoana tantara lehibe hoe “Fanomezam-boninahitra An’ireo Mendrika, Amin’ny Andro Fahanterany”. Avy eo, ny tolakandro, dia hatao ilay lahateny ampahibemaso hoe “Derao Ilay Mpanjakan’ny Mandrakizay!” Ho anisan’ny hevitra misongadina lehibe indrindra amin’ilay fivoriambe izy io.
Manaova planina dieny izao mba hanatrehana. Mba hahitana ny toerana hanaovana ny fivoriambe akaiky indrindra ny tranonao, dia mifandraisa amin’ny Efitrano Fanjakanan’ny Vavolombelon’i Jehovah eo an-toerana, na manorata any amin’ireo mpamoaka itỳ gazety itỳ. Ny Tilikambo Fiambenana tamin’ny 15 Febroary 1995 dia manome ny lisitr’ireo toerana rehetra hanaovana fivoriambe eto Madagasikara.