Vaovao Tsara Amin’ny Hoavy!
MANJARY malahelo isika rehetra amin’izay fotoana aharaisantsika vaovao ratsy mahakasika antsika manokana. Etsy an-danin’izany, dia mifaly isika rehefa misy vaovao tsara tonga — sombim-baovao mahafaly ho antsika, na ho an’ireo olo-malalantsika. Rehefa mahakasika ny hafa fa tsy ny tenantsika anefa ny vaovao ratsy, dia matetika misy fahalianana ta hahafanta-javatra ao; ny sasany aza faly mihitsy mahafantatra ny fahavoazan’ny hafa. Amin’ny ampahany sasany, izany dia mety hanazava ny antony maha-be mpividy ny vaovao ratsy!
Nandritra ny tapany voalohany tamin’ny Ady Lehibe Faharoa, dia nisy ohatra iray azo alaina sary an-tsaina momba ny fahalianana mampihoron-koditra ananan’ny olona sasany amin’ny loza. Tamin’ny 1939, dia reharehan’ny tafika an-dranomasina alemanina ilay sambo mpiady 10 000 taonina, lehibe sy ampy fitaovana sady haingam-pandeha, ny Graf Spee. Nandritra ny herinandro maro io sambo mpiady io dia nahatonga fandravana teo amin’ireo sambo mpitondra entan’ny Mpiray Dina, tany amin’ny Oseana Atlantika Atsimo sy ny Oseana Indianina. Farany dia nisy sambo mpiady mifono vy britanika telo nanenjika sy nanafika ny Graf Spee, ka nahatonga famoizana ain’olona sy nanery an’ilay sambo hirezareza nankany an-tseranan’i Montevideo, any Uruguay, mba hanamboatra ny simba. Nodidian’ny fitondram-panjakan’i Uruguay hiverina avy hatrany tany an-dranomasina ilay sambo mpiady, raha tsy izany dia hotanan’ny fanjakana an-keriny. Koa toa nadiva hitranga àry ny ady mivaivay iray hataon’ny andaniny iray ihany.
Raha nandre izany ny antokona mpandraharaha manankarena tany Etazonia, dia nanofa fiaramanidina iray, tamin’ny sarany tokony ho 2 500 dolara isan’olona, mba hankany Uruguay hanatri-maso ilay ady mahatsiravina. Akory ny fahadisoam-panantenan’izy ireo fa tsy nitranga mihitsy ilay ady. Nandidy ny handrendrehana ny Graf Spee i Adolf Hitler. Ireo mpitazana izay nifanesika teo amin’ny seranan-tsambo, nanantena mba hanatri-maso fampisehoana ady an-dranomasina feno habibiana, dia tsy nahita sy tsy nandre afa-tsy fipoahana nankarenin-tsofina iray izay nandrendrika ny Graf Spee, narendrik’ireo antoko-mpiasa tao aminy ihany. Namono tena ilay kapiteny tamin’ny fitifirana ny lohany.
Na dia eo aza ny toetra somary mampihoron-koditra hita soritra ao amin’ny olona sasany, ny ankamaroan’ny olona dia hanaiky fa aleon’izy ireo vaovao tsara toy izay vaovao ratsy. Tsy toy izany ve no tsapanao? Koa nahoana àry ny tantara no mandrakitra an-tsoratra vaovao ratsy maro aoka izany ary vaovao tsara vitsy aoka izany? Ho azo atsimbadika ve ny tarehin-javatra indray andro any?
Anton’ireo vaovao ratsy rehetra
Miresaka ny amin’ny fotoana izay tsy nisy afa-tsy vaovao tsara ranofotsiny, ny Baiboly. Zava-tsy fantatra sy mbola tsy re ny vaovao ratsy. Rehefa nahavita ny asa famoronany i Jehovah Andriamanitra, dia vonona ny planeta Tany mba hifalian’ny olombelona sy ny biby. Milaza amintsika toy izao ny fitantaran’ny Genesisy: “Hitan’Andriamanitra izay rehetra nataony, ary, indro, tsara indrindra izany.” — Genesisy 1:31.
Tsy naharitra ela loatra taorian’ny namoronana ny olombelona ny tsy fisian’ny vaovao ratsy. Talohan’ny nisian’izay zanaka naterak’i Adama sy i Eva, dia nampahafantarina ny vaovao ratsy momba ny fikomiana tamin’Andriamanitra sy tamin’ny fandaharany milamina ny amin’ny zavatra tsara eo amin’izao rehetra izao. Tonga mpamadika an’ilay toerana nankinina taminy ny zanaka ara-panahy ambony laharana iray, ary vitany ny nanosika ireo mpivady olombelona voalohany mba hiaraka taminy teo amin’ny lalam-pikomiana sy fivadihana narahiny. — Genesisy 3:1-6.
Ny fahatondrahan’ny vaovao ratsy hitan’ny olombelona dia niandoha tamin’izany fotoana izany. Tsy mahagaga raha nisongadina tamin’ny fomba niharihary aoka izany tao amin’ireo vaovao ratsy izay nanenika izao tontolo izao hatramin’izay ny fiokoana, ny famitahana, ny lainga, ny tsy fahamarinana, sy ireo fahamarinana sadasada. Nanome tsiny mivantana an’i Satana Devoly ho ilay niavian’ny vaovao ratsy i Jesosy Kristy, ka nilaza toy izao tamin’ireo mpitondra fivavahana tamin’ny androny: “Hianareo avy tamin’ny devoly rainareo, ka izay sitraky ny rainareo no tianareo hatao. Izy dia mpamono olona hatramin’ny taloha, ary tsy nitoetra tamin’ny marina, satria tsy misy marina aminy. Raha mandainga izy, dia ny azy no lazainy, satria mpandainga izy sady rain’ny lainga.” — Jaona 8:44.
Arakaraka ny nitomboan’ny isan’ny mponina no nitomboan’ny vaovao ratsy niaraka tamin’izay. Mazava ho azy fa izany akory tsy midika hoe tsy nisy mihitsy fotoam-pifaliana na fotoam-pahasambarana, satria nisy zavatra maro teo amin’ny fiainana izay nahatonga fifaliana. Na dia izany aza, dia niharihary teo amin’ireo taranak’olombelona rehetra hatramin’izao ireo rahon’ny fahasahiranana sy ny alahelo.
Misy antony lehibe hafa iray mahatonga io tarehin-javatra mampalahelo io. Izany dia ny fironana nolovantsika ho amin’ny fanaovan-dratsy sy ny loza. Mampahafantatra antsika an’io antony tsy azo ihodivirana mahatonga vaovao ratsy io ny tenan’i Jehovah, amin’ny filazana hoe: “Ny fisainan’ny fon’ny olona dia ratsy hatramin’ny fahazazany”. — Genesisy 8:21.
Nahoana no miakatra ny isan’ny vaovao ratsy?
Misy anefa antony mahatonga ny isan’ny vaovao ratsy hiakatra amin’izao taonjato faha-20 izao. Io antony io dia voalaza mazava ao amin’ny Baiboly izay nanambara mialoha fa ny olombelona amin’ny taonjato faha-20 dia hiditra amin’ny fe-potoana manokana iray fantatra amin’ny hoe “any am-parany” na “andro farany”. (2 Timoty 3:1; Daniela 12:4). Ny faminaniana ao amin’ny Baiboly sy ny fandaharan-taona araka ny Baiboly dia mampahafantatra io “fe-potoan’ny farany” izay nanomboka tamin’ny 1914 io. Mba hahazoana porofo araka ny Soratra Masina amin’ny an-tsipiriany, dia jereo aza fady ny toko faha-11 amin’ilay boky hoe Fahalalana Izay Mitarika ho Amin’ny Fiainana Mandrakizay, navoakan’ny Watch Tower Bible and Tract Society of Pennsylvania.
Ny andro farany dia tokony hiantomboka amin’ny fisehoan-javatra iray izay hampiakatra ho azy ny isan’ny vaovao ratsy eto an-tany. Inona izany? Izany dia ny fanjerana an’i Satana Devoly sy ireo demoniany sesehena avy tany an-danitra. Mety hamaky izao filazalazana velombelona momba ny fitomboan’ny vaovao ratsy amin’ny fomba tsy azo ihodivirana izao ianao ao amin’ny Apokalypsy 12:9, 12: “Nazera ilay dragona, dia ilay menarana ela, izay atao hoe devoly sy Satana, izay mamitaka izao tontolo izao; dia nazera tamin’ny tany izy, ary ny anjeliny koa niaraka nazera taminy. (...) Loza ho an’ny tany sy ny ranomasina! Fa nidina ho aminareo ny devoly sady manana fahatezerana lehibe, satria fantany fa kely sisa ny androny.”
Koa na rahoviana na rahoviana fotoana mbola tavela mandra-pahatongan’ny fifaranan’ireo andro farany, dia azontsika ampoizina ny hisian’ny vaovao ratsy hitohy sy hitombo mihitsy aza eo amin’ny habetsahany sy ny hamafiny.
Tsy ho toy izao foana
Soa ihany ho an’ireo mponin’ny tany fa tsy hisy foana akory ilay toe-draharaha mampalahelo miteraka fihanahan’ny vaovao ratsy amin’izao andro izao. Raha ny marina, dia afaka milaza amim-patokiana isika fa voaisa ireo andro isian’ny vaovao ratsy tsy an-kijanona. Tsy hoe tsy misy antenaina akory ilay tarehin-javatra, na dia eo aza izay mety ho toa fisehoan’ny toe-javatra. Akaiky dia akaiky ny faran’ireo vaovao ratsy rehetra, ary ho tonga tsy ho diso amin’ny fotoana voatendrin’Andriamanitra izany.
Afaka matoky ny amin’izany isika satria ambaran’ny faminaniana fa ny andro farany dia tokony hahatratra ny fara tampony, na hifarana amin’ny fandravana sy ny fanesoran’Andriamanitra an’ireo antony rehetra mahatonga vaovao ratsy. Hesoriny ny olona ratsy fanahy mpanetsika ady, izay tsy mety miova sy tsy mety miala amin’ny lalan-dratsiny. Izany dia hifarana amin’ny adin’ilay andro lehiben’Andriamanitra Tsitoha, izay fantatry ny rehetra amin’ny hoe ady Haramagedona. (Apokalypsy 16:16). Aorian’izay avy hatrany, dia hatao tsy afa-manao na inona na inona i Satana Devoly sy ireo andian-tafika demoniany. Lazalazain’ny Apokalypsy 20:1-3 toy izao ny famatorana an’i Satana, ilay niavian’ny vaovao ratsy rehetra: “Hitako fa, indro, nisy anjely nidina avy tany an-danitra, nanana ny fanalahidin’ny lavaka tsy hita noanoa sy gadra lehibe eny an-tànany; dia nisambotra ilay dragona izy (dia ilay menarana ela, ny devoly sy Satana izany) ka namatotra azy arivo taona, dia nanipy azy ho amin’ny lavaka tsy hita noanoa ka nanidy izany, dia nanisy tombo-kase teo amboniny, mba tsy hamitahany ny firenena maro intsony”.
Rehefa afaka ireo fisehoan-javatra mampihetsi-po ireo, dia ho tonga ny fotoan’ny vaovao tsara mbola tsy nisy toy izany, ho an’ny tany sy ireo mponina eo aminy. Ho tafiditra ho anisan’ireo mponina ireo ny olona an-tapitrisany maro izay tafita velona tamin’ilay ady farany, dia Haramagedona, sy ireo olona an’arivony tapitrisa maro izay hatsangana avy amin’ny torimasom-pahafatesana nisy azy tao am-pasana. Io tsara indrindra amin’ny vaovao tsara rehetra io dia voalazalaza toy izao ao amin’ny boky farany amin’ny Baiboly: “Ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4.
Afaka maka sary an-tsaina izany fotoana mahafinaritra izany ve ianao? Hoavy be voninahitra tokoa, izay tsy hisian’ny vaovao ratsy intsony. Eny, ho efa nifarana avokoa ny vaovao ratsy rehetra, ary tsy ho re intsony. Hanjaka amin-kery amin’izay ny vaovao tsara, ary ho tondraka izy io mandrakizay doria.