“Mahaiza Mankasitraka ny Olona Tahaka Ireny”

TSY nahafa-po ny zava-drehetra tao anatin’ny kongregasionan’i Korinto. Nisy fahalotoam-pitondran-tena nanafintohina, ary nisy fitokotokoana teo amin’ireo rahalahy. Niatrika zava-manahirana manokana lehibe na nanana fanontaniana izay nila hovaliana ny sasany. Nifampitory tany amin’ny fitsarana ny rahalahy sasany; nisy hafa nanda ny fitsanganan’ny maty mihitsy aza.

Nisy fanontaniana lehibe nipoitra koa. Moa ve ireo ao anatin’ny ankohonana voazarazara ara-pivavahana tokony hijanona amin’ny vadiny tsy mpino, sa tokony hisaraka izy ireo? Inona no fihetsika nantenaina tamin’ireo anabavy tao anatin’ny kongregasiona? Nety ve ny hananana anjara tamin’ny hena natao sorona ho an’ny sampy? Ahoana no tokony hitarihana ireo fivoriana — anisan’izany ny Sakafo Harivan’ny Tompo? — 1 Korintiana 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Tsy isalasalana fa niahy ny amin’izay hahasoa an’ireo rahalahiny tao anatin’ny rivo-piainana ara-panahy nikorontana toy izany i Akaïko sy i Fortonato ary i Stefanasy ka nanao dia mba hitsidihana ny apostoly Paoly tany Efesosy. Ankoatra izany vaovao nampikorontan-tsaina izany, dia mety ho nitondra ho an’i Paoly, taratasy nirakitra fanontaniana momba ireo raharaha ireo avy tamin’ilay kongregasiona, izy ireo. (1 Korintiana 7:1; 16:17). Hita porofo fa tsy ireo rahalahy telo ireo ihany no sahiran-tsaina tamin’ilay tarehin-javatra. Raha ny marina, i Paoly dia efa naharay vaovao ‘avy tamin’ny ankohonan’i Kloa’ fa nisy fifampiandaniana teo amin’ireo mpikambana tao amin’ny kongregasiona. (1 Korintiana 1:11). Tsy isalasalana fa ny tatitra nataon’ireo iraka dia nanampy an’i Paoly mba hahazo fahatakarana mazava kokoa momba ilay tarehin-javatra, hanapaka izay torohevitra hatolotra sy ny amin’ny fomba hamaliana ireo fanontaniana nipoitra. Toa ilay taratasy fantatsika ankehitriny hoe Korintiana Voalohany no valin-tenin’i Paoly, valin-teny izay notarihin’ny fanahy masin’Andriamanitra. I Akaïko sy i Fortonato ary i Stefanasy no mety ho nanatitra ilay taratasy.

Iza moa i Akaïko sy i Fortonato ary i Stefanasy? Inona no azontsika raisina avy amin’ny fianarana izay lazain’ny Soratra Masina momba azy ireo?

Ny ankohonan’i Stefanasy

Ny ankohonan’i Stefanasy no ‘voaloham-bokatra’ tamin’ny fanompoan’i Paoly tany Akaia, provansy romana, any atsimo amin’i Grisia, tokony ho tamin’ny taona 50 am.f.i., ary i Paoly mihitsy no nanao batisa azy ireo. I Paoly dia toa nihevitra azy ireo ho filamatra, fitaomana matotra nampiorina ho an’ireo Korintiana. Nidera azy ireo tamin-kafanana toy izao izy noho ny asan’izy ireo ho an’ny kongregasiona: “Fantatrareo ny ankohonan’i Stefanasy, fa voaloham-bokatr’i Akaia izy sady efa nanolo-tena ho amin’ny fanompoana ny olona masina; dia mangataka aminareo aho, ry rahalahy, mba hanaiky tsara ny olona tahaka ireny sy izay rehetra miara-miasa sy mikely aina koa hianareo.” (1 Korintiana 1:16; 16:15, 16). Tsy ambara hoe iza marina no nahaforona ‘ny ankohonan’i Stefanasy’. Ilay teny dia mety hidika tsotra fotsiny hoe mpianakavy, nefa koa mety hahatafiditra andevo na mpiasa. Koa satria ny hoe Akaïko dia anarana latina fahita tamin’ny mpanompo, ary ny hoe Fortonato dia fahita tamin’ny olona afaka, dia misy mpivaofy teny sasany mieritreritra fa angamba mety ho mpianakavy tao amin’izany ankohonana iray izany ihany izy roa lahy ireo.

Na ahoana na ahoana, i Paoly dia nihevitra ny ankohonan’i Stefanasy ho fakan-tahaka. Ireo mpikambana tao amin’izy io dia efa “nanolo-tena ho amin’ny fanompoana ny olona masina”. Tsy maintsy ho nanaiky ny fianakavian’i Stefanasy fa nisy asa tokony hatao mba hanasoavana ny kongregasiona, ka nanaiky an-tsitrapo io fanompoana io ho toy ny andraikitra manokana izy ireo. Ny fanirian’izy ireo hanao izany fanompoana ny olona masina izany dia tsy isalasalana fa mendrika ny fanohanana ara-tsaina sy ny fankasitrahana.

“Namelombelona ny fanahiko sy ny anareo koa izy”

Na dia nanahy momba ilay tarehin-javatra tany Korinto aza i Paoly, ny fahatongavan’ireo iraka telo ireo dia nanome hery azy. Hoy i Paoly: “Faly aho noho ny [fanatrehan’, NW ]i Stefanasy sy Fortonato ary Akaïko; fa ireo no nahefa ny tsy vitanareo; fa namelombelona ny fanahiko sy ny anareo koa izy”. (1 Korintiana 16:17, 18). Rehefa dinihina ireo toe-javatra, dia azo inoana fa loharanom-panahiana ho an’i Paoly ny fisarahany ara-batana tamin’ireo Korintiana, nefa izao dia nanonitra ny tsy naha-teo ny kongregasiona manontolo ny fanatrehan’ireo solontenany. Ny tatitra nataon’izy ireo dia azo inoana fa nanome an’i Paoly fahatakarana feno momba ilay tarehin-javatra ary nampisinda ny sasany tamin’ny tahony fara faharatsiny. Angamba tsy hoe ratsy araka ny nieritreretany azy akory ny zava-drehetra na izany aza.

Araka ny nambaran’i Paoly, dia tsy vitan’ny hoe namelombelona ny fanahiny fotsiny, fa nanandratra ny fanahin’ny kongregasionan’i Korinto koa, ilay fanirahana azy telo lahy. Tsy isalasalana fa fanamaivanana ho azy ireo ny nahafantatra fa ireo solontenany dia nanazava tsara tamin’i Paoly ny lafiny rehetra tamin’ilay tarehin-javatra ary niverina niaraka tamin’ny toroheviny.

Koa natolotra tamin-kafanana àry i Stefanasy sy ireo namany roa lahy, noho ireo asa mafy nataon’izy ireo ho an’ireo Korintiana. Lehibe aoka izany ny fankasitrahan’i Paoly an’ireo lehilahy ireo, hany ka izy ireo no tokony hanome fitarihana ao amin’ilay kongregasionan’i Korinto nisara-bazana rehefa tafaverina izy ireo. Nampirisika mafy an’ireo rahalahy toy izao i Paoly: ‘Maneke tsara ny olona tahaka ireny sy izay rehetra miara-miasa sy mikely aina. [Mahaiza mankasitraka ny olona tahaka ireny, DIEM ].’ (1 Korintiana 16:16, 18). Izany fanolorana mahery izany dia manondro mazava ny tsy fivadihana feno nananan’ireo lehilahy ireo na dia teo aza ny fihenjanana tao anatin’ilay kongregasiona. Tokony homena voninahitra izay olona tahaka izany. — Filipiana 2:29.

Mitondra vokatra tsara dia tsara ny fiaraha-miasa amim-pahatokiana

Tsy misy isalasalana ny amin’izany, mitondra vokatra tsara dia tsara ny fiaraha-miasa akaiky amin’ny fandaminan’i Jehovah sy ireo solontenany. Rehefa nanoratra ilay taratasy fantatra ankehitriny hoe Korintiana Faharoa i Paoly, taoriana kelin’ilay taratasy voalohany, dia efa nihatsara ny toe-javatra tao amin’ilay kongregasiona. Nitondra vokany tsara ny asa nitohy tamim-paharetana, nataon’ireo rahalahy toa an’i Akaïko, i Fortonato, sy i Stefanasy, ary koa ny fitsidihan’i Titosy. — 2 Korintiana 7:8-15; ampitahao amin’ny Asan’ny Apostoly 16:4, 5.

Ireo mpikambana ao amin’ny kongregasionan’ny vahoakan’i Jehovah amin’izao andro maoderina izao dia afaka mandray soa, amin’ny fisaintsainana ny amin’ny firesahana fohy momba ireo lehilahy nahatoky ao amin’ny Soratra Masina ireo. Ohatra, aoka hatao hoe misy tarehin-javatra mitranga tsy mety voalamina haingana noho ny antony iray ao anatin’ny kongregasiona eo an-toerana, ka mahatonga an’ireo rahalahy hanahy. Inona no tokony hatao? Manahafa an’i Stefanasy sy i Fortonato ary i Akaïko, izay tsy niahotra ny handray ny andraikiny hampahafantatra an’i Paoly ny amin’ilay tarehin-javatra, ary avy eo dia avelao amin-toky ho eo am-pelatanan’i Jehovah ny raharaha. Tsy nahatonga azy ireo velively hanao zavatra samirery na hanjary ‘ho sosotra tamin’i Jehovah’ ny zotom-pony ho an’ny fahamarinana. — Ohabolana 19:3.

An’i Jesosy Kristy ireo kongregasiona, ary amin’ny fotoana mety aminy, tsy misy hafa amin’ny tany Korinto, dia hanao zavatra izy mba handaminana izay zava-tsarotra rehetra mety hahatandindomin-doza an’izay hahasoa azy ireo ara-panahy sy ny fiadanany ara-panahy. (Efesiana 1:22; Apokalypsy 1:12, 13, 20; 2:1-4). Mandra-pahatongan’izany, raha manaraka ny ohatra tsara dia tsara navelan’i Stefanasy sy i Fortonato ary i Akaïko isika ka manohy miasa mafy eo amin’ny fanompoana an’ireo rahalahintsika, dia haneho tsy fivadihana koa isika amin’ny fanohanana ny fandaharana ao anatin’ny kongregasiona, ka hampahery ireo rahalahintsika, sy ‘handrisika azy ireo ho amin’ny fitiavana sy ny asa tsara dia tsara’. — Hebreo 10:24, 25, NW.