Miverina ho Amin’ny Vovoka — Amin’ny Fomba Ahoana?
“VOVOKA hianao, ary hiverina ho amin’ny vovoka indray hianao.” Rehefa nandre ireo teny ireo i Adama, ilay lehilahy voalohany, dia nahafantatra izay tokony hampoizina izy. Natao avy tamin’ny vovoky ny tany izy ary hiverina ho amin’ny vovoka fotsiny. Ho faty izy satria tsy nankato ny Mpamorona azy, dia i Jehovah Andriamanitra. — Genesisy 2:7, 15-17; 3:17-19.
Asehon’ny Baiboly fa natao tamin’ny vovoka ny olombelona. Milaza toy izao koa izy io: “Ny fanahy izay manota no ho faty.” (Ezekiela 18:4; Salamo 103:14). Nitondra alahelo ho an’ny olona an-tapitrisany maro ny fahafatesana ary imbetsaka no nampipoitra fanontaniana momba izay tokony hatao amin’ny fatin’olombelona.
Fanao tamin’ny lasa sy amin’ny ankehitriny
Ahoana no natao tamin’ny fatin’olombelona teo amin’ny vahoakan’Andriamanitra tamin’ny andro fahiny? Ao amin’ireo pejiny voalohany ny Baiboly dia milaza ireo fomba samihafa nitondrana ny maty, ka tafiditra tamin’izany ny fandevenana ao anaty tany. (Genesisy 35:8). I Abrahama patriarika sy i Saraha vadiny, ary koa Isaka zanany lahy sy i Jakoba zafikeliny dia nalevina tao amin’ilay zohy tao Makpela. (Genesisy 23:2, 19; 25:9; 49:30, 31; 50:13). Ry Gideona sy Samsona mpitsara isiraelita dia nalevina ‘tao amin’ny fasan-drainy’. (Mpitsara 8:32; 16:31). Toa manondro izany fa tiana kokoa ny fananana toerana nisy fasam-pianakaviana teo amin’ny vahoakan’Andriamanitra fahiny. Rehefa maty i Jesosy Kristy tamin’ny taonjato voalohany am.f.i., dia nalevina tao amin’ny fasana vao namboarina tao amin’ny vatolampy ny fatiny. (Matio 27:57-60). Tamin’ny ankapobeny àry, dia nalevina tao anaty tany ny fatin’olombelona na napetraka tao amin’ny fasana iray. Mbola fanao any amin’ny ankamaroan’ny toerana manerana ny tany izany.
Kanefa amin’izao fotoana izao, any amin’ny faritra sasany eo amin’izao tontolo izao, dia misy tena tsy fahampian’ny toerana malalaka ary ny halafon’ny vidin-tany dia vao mainka mampahasarotra hatrany ny fahazoana toerana handevenana. Noho izany, dia mihevitra izay fomba hafa tokony hanaovana ny fatin’olombelona ny olona sasany.
Ny fanelezana ny lavenona aorian’ny fandoroana ny fatin’olombelona dia manjary mihamahazatra kokoa. Any Angletera, dia tokony ho 40 isan-jaton’ny maty ankehitriny no karakaraina amin’io fomba io. Any Soeda, izay andoroana ny 80 isan-jato maherin’ny maty any amin’ny faritra an-tanàn-dehibe, dia misy tany rakotra hazo natao hanelezana ny lavenona. Ary any Shangaï sy any amin’ireo tanàn-dehibe vitsivitsy hafa any Sina izay amoron-dranomasina, ireo mpitondra an-tanàn-dehibe dia miandraikitra fanelezana lavenona tamba-be any an-dranomasina, maromaro isan-taona.
Aiza no azo anelezana ny lavenona? Tsy amin’izay mety ho toerana fotsiny. Mety hatahotra ny sasany sao hanimba ny tontolo iainana ny fanelezana ny lavenona. Raha ny tena izy anefa, dia foana noho ny fandoroana ny mety hisian’ny loza amin’ny fihanahan’aretina. Ny tany fandevenana sasany any Angletera sy ireo saha fahatsiarovana any Etazonia dia manokana faritra rakotra bozaka na zaridaina feno voninkazo ho tany fanelezana ny lavenona. Mazava ho azy fa liana indrindra ny amin’ny fomba fihevitra araka ny Soratra Masina momba ny fandoroana sy ny fanelezana ny lavenona, ny Kristiana.
Inona no fomba fihevitra araka ny Soratra Masina?
Tao amin’ny fanambarana iray nanameloka “ny mpanjakan’i Babylona”, dia nilaza toy izao i Isaia mpaminany: “Hianao kosa dia nariana niala lavitra ny fasanao”. (Isaia 14:4, 19). Tokony hampitahaina amin’ny fanelezana ny lavenona ve ny fampietrena toy izany? Tsia, satria eto dia tsy misy firesahana ny amin’ny fandoroana sy ny fitahirizana na ny fanelezana ny lavenona vokatr’izany.
Niresaka ny fitsanganan’ny maty ho eto an-tany, izay hitranga mandritra ny Fanjakany Arivo Taona i Jesosy Kristy rehefa nilaza toy izao: ‘Ho ren’izay rehetra any amin’ny fasam-pahatsiarovana ny feony [ny ahy] dia hivoaka izy’. (Jaona 5:28, 29, NW ). Ny tsy ilana fasana iray voafaritra mba hananganana olona iray amin’ny maty anefa dia hamarinin’ny filazalazana hafa iray ara-paminaniana momba ny fitsanganana amin’ny maty. Milaza toy izao ny Apokalypsy 20:13: “Ny ranomasina dia namoaka ny maty tao anatiny; ary ny fahafatesana sy ny [Hadesy, NW ] namoaka ny maty tao aminy”. Koa ny zava-dehibe àry dia tsy ny hoe aiza na amin’ny fomba ahoana no ‘miverina ho amin’ny vovoka’ ny olona iray. Izany kosa dia ny hoe ao anatin’ny fitadidian’Andriamanitra ve izy ka hatsangany. (Joba 14:13-15; ampitahao amin’ny Lioka 23:42, 43.) Azo antoka fa tsy mila fasana manaitra i Jehovah mba hanampiana azy hitadidy olona. Tsy misakana ny fananganana olona iray amin’ny maty ny fandoroana. Ary raha toa ka hatao amin’ny antony manosika mety sy tsy misy fombafomba diso ara-pivavahana ny fanelezana ny lavenona, dia tsy hifanohitra amin’ny Soratra Masina.
Ireo izay manapa-kevitra ka momba ny fanelezana ny lavenona dia hila ny hitandrina tsara ny lalàn’ny tany. Hety koa ny hiheveran’izy ireo ny fihetseham-pon’ireo nidonam-pahoriana sy ireo hafa. Ho tsara ny hitandreman’ny mpanompon’i Jehovah mba tsy hitondra fahafaham-baraka eo amin’ny anarana tsara entin’ny Kristiana rehefa mampiasa ny fahafahany araka ny Soratra Masina amin’io lafiny io izy ireo. Zava-dehibe indrindra izany any amin’ny tany izay azo anaovana ara-dalàna ny fandoroana sy ny fanelezana ny lavenona, kanefa mbola tsy eken’ny fiaraha-monina amin’ny fomba feno. Mazava ho azy, fa ny Kristiana iray dia hanalavitra izay mety ho fanao na fombafomba miorina amin’ny finoana ny amin’ny tsy fahafatesan’ny fanahy olombelona.
Fahafahana tanteraka amin’ny fasana!
Milaza ireo izay manohana ny fanelezana ny lavenona fa izy io dia midika ho fanafahana amin’ny fandevenana ao am-pasana. Izay hitondra fanamaivanana lehibe indrindra anefa, dia ny fahatanterahan’ilay fampanantenana ao amin’ny Baiboly milaza fa “ny fahafatesana no fahavalo farany horesena”. — 1 Korintiana 15:24-28.
Midika izany fa ny fasana, ary na dia ny fandoroana sy ny fanelezana ny lavenona mihitsy aza, dia ho zavatra naman’ny lasa. Eny, tsy hisy intsony ny fahafatesana. Nanoratra toy izao teo ambanin’ny tsindrimandrin’Andriamanitra ny apostoly Jaona: “Ary nahare feo mahery avy teo amin’ny seza fiandrianana aho nanao hoe: Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4.
Hitranga izany rehetra izany rehefa hofoanana tanteraka ny fahafatesan’olombelona vokatry ny fahotan’i Adama, eo ambanin’ny Fanjakan’Andriamanitra. Amin’izay fotoana izay, dia tsy hiatrika ny mety ho fiverenana ho amin’ny vovoka intsony ny olombelona mankato.
[Sary, pejy 29]
Fomba mahazatra fanao amin’ny fatin’olombelona
[Sary, pejy 31]
Fanelezana lavenona any Sagami Bay, Japon
[Sary nahazoan-dalana]
Courtesy of Koueisha, Tokyo