Fanomezana Fanampiana eo Anivon’ny Sisan-javatra Tsy Rava
MENDRI-PIDERANA tokoa ny ezaka ataon’ny olona mba hanomezana fanampiana raha vantany vao mifarana ny loza iray. Fandaharam-panampiana maro no nanampy mba hanorenana trano indray, mba hampiraisana fianakaviana indray, ary, ambonin’izany rehetra izany, mba hamonjena aina.
Rehefa mamely ny loza, ny Vavolombelon’i Jehovah dia mampiasa — ary mankasitraka — izay mety ho fandaharana atao amin’ny alalan’ireo fandaharam-panampiana ivelan’ny fivavahana. Amin’izay fotoana izay ihany izy ireo dia manana adidy araka ny Soratra Masina mba “hanao soa (...), indrindra fa amin’ny mpianakavin’ny finoana”. (Galatiana 6:10). Eny, ireo Vavolombelona dia mahatsiaro tena ho toy ny mpihavana; mifampihevitra toy ny “fianakaviana” izy ireo. Izany no ifampiantsoan’izy ireo hoe “rahalahy” sy “ranabavy”. — Ampitahao amin’ny Marka 3:31-35; Filemona 1, 2.
Koa rehefa misy loza mahavoa ny faritra manodidina, dia manao ezaka mafy amim-pitandremana ireo loholona eo amin’ny Vavolombelon’i Jehovah mba hahafantarana marina ny toerana misy ny mpikambana tsirairay ao amin’ny kongregasiona sy izay ilain’izy ireo, ary manao fandaharana izy ireo mba hanomezana ireo fanampiana tena ilaina. Diniho ny naha-marina izany tany Accra, atsy Ghana; tany San Angelo, any Etazonia; ary tany Kobe, any Japon.
Accra — “Safo-drano kelin’i Noa”
Nanomboka nirotsaka ny orana tokony ho tamin’ny 11 ora alina, ary nivatravatra tsy nisy fihenany nandritra ny ora maro. “Mafy aoka izany ny orana, hany ka tsy nahita tory izahay mianakavy”, hoy i John Twumasi, Vavolombelon’i Jehovah iray ao Accra. Niantso azy io hoe “safo-drano kelin’i Noa” ny Daily Graphic. “Nanandrana nitondra ireo zava-tsarobidy sasany tany ambony rihana izahay”, hoy i John nanohy ny teniny, “kanefa teo am-panokafanay ny varavarana mankao an-tohatra, dia nitosaka niditra ny rano tondraka.”
Nandefa fampitandremana ireo manam-pahefana mba hialana amin’ireo toerana mampidi-doza, kanefa maro no nisalasala, natahotra sao nanintona ireo mpandroba ny trano foana iray — na dia dibo-drano aza. Ny sasany dia tsy afa-niala na dia naniry ny hanao izany aza. “Tsy afaka nanokatra ny varavarana izahay sy ny reniko”, hoy ny zazavavy iray atao hoe Paulina. “Tsy nitsaha-nisondrotra ny rano, koa dia nitsangana teo ambonin’ny barika hazo izahay ary nifikitra tamin’ny sakamandimbin’ny tafon-trano. Tamin’ny farany, tokony ho tamin’ny dimy ora maraina, dia namonjy anay ny mpiara-monina taminay.”
Raha vantany vao azo natao izany, dia nanomboka niasa ireo Vavolombelon’i Jehovah. Nitantara toy izao ny anabavy kristiana iray atao hoe Beatrice: “Nikaroka anay ireo loholona tao amin’ny kongregasiona, ary nahita anay izy tany an-tranon’ny Vavolombelona tahaka anay, tany izahay no nialokaloka. Telo andro monja taorian’ilay tondra-drano, dia tonga teo anilanay sy nikiky ny fotaka tao anatiny sy ivelan’ny tranonay ireo loholona sy ireo mpikambana tanora tao amin’ny kongregasiona. Ny Fikambanana Watch Tower dia nanome ranon-javatra fanadiovana sy famonoana mikraoby, loko, kidoro, bodofotsy sy lamba ary akanjon’ankizy. Nandefasan’ireo rahalahy sakafo ho an’ny andro maromaro izahay. Tohina mafy aho!”
Nanao izao tatitra izao i John Twumasi, voalaza tetsy aloha: “Nilaza tamin’ireo mpanofa trano hafa aho fa ny Fikambananay dia nandefa ho anay, ranon-javatra fanadiovana sy famonoana mikraoby — ampy mba hanadiovana ilay trano manontolo. Mpanofa trano tokony ho 40 no nanampy tamin’ny fanadiovana. Nanomezako tamin’ilay ranon-javatra fanadiovana ireo mpiara-monina tamiko, anisan’izany ny lehilahy iray izay pretra tao amin’ny eglizy teo an-toerana. Nihevitra tamim-pahadisoana ireo mpiara-miasa tamiko fa tsy mampiseho fitiavana afa-tsy amin’ireo olony ihany ny Vavolombelon’i Jehovah.”
Nankasitraka tokoa ny fanampiana feno fitiavana natao taminy ireo rahalahy sy anabavy kristiana. Namarana ny teniny toy izao ny Rahalahy Twumasi: “Na dia nisy vidiny lehibe kokoa ara-bola noho ireo fanampiana aza ireo zavatra nafoiko tamin’ilay tondra-drano, dia tsapanay mianakavy fa, noho io fandaharana mampihetsi-po avy amin’ny Fikambanana io, dia nahazo betsaka lavitra noho izay nafoinay izahay.”
San Angelo — “Toy ny hoe nifarana izao tontolo izao, raha ny fanenony”
Ny tafio-drivotra izay nandrava an’i San Angelo tamin’ny 28 May 1995, dia nanongotra hazo, nanapaka poteaux ka nanipy ireo taribin’aratra nanapaka ny arabe. Nifofofofo hatramin’ny 160 kilaometatra isan’ora ny rivotra, ka nanimba ireo kojakojan-javatra nilain’ny vahoaka. Tapaka ny jiro tany amin’ny trano maherin’ny 20 000. Avy eo dia tonga ny havandra. Ny Sampan-draharaham-pirenena Mpamantatra ny Toetr’andro dia nanao tatitra ny amin’ny “havandra mitovy habe amin’ny baolina filalaovana golf [savaivo tokony ho efatra santimetatra]”, avy eo dia “havandra mitovy habe amin’ny baolina filalaovana softball [savaivo tokony ho 10 santimetatra]”, ary farany, dia “havandra mitovy habe amin’ny voasary papelimosy”. Nankarenin-tsofina ilay firaraky ny havandra. Hoy ny mponina iray: “Toy ny hoe nifarana izao tontolo izao, raha ny fanenony.”
Nisy fahatoniana fambara loza nanaraka ilay tafio-drivotra. Nivoaka tsimoramora avy tao an-tranony norarafan’ny havandra ny olona mba hizaha ny fahasimbana. Ireo hazo mbola nitsangana dia tsy nisy raviny na rantsany intsony. Ireo trano mbola nitsangana dia toy ny hoe nempahina. Tany amin’ny faritra sasany, ny tany dia rakotry ny havandra nanao dongona nahatratra iray metatra ny haavony. Varavarankely an’arivony maro tamin’ny trano sy tamin’ny fiarakodia no vaky tamin’ilay tafio-drivotra, hany ka nanjelanjelatra niaraka tamin’ny havandra izay nandrakotra ny tany ny vakim-pitaratra. “Rehefa tonga tany an-trano aho”, hoy ny vehivavy iray, “dia nipetraka tao anaty fiarako teo amin’ny lalan-kely fotsiny aho ary nitomany. Lehibe aoka izany ny fahasimbana, hany ka nandresy tanteraka ahy tsotra izao.”
Ireo fandaharam-panampiana sy ireo hopitaly dia nanome haingana fanampiana ara-bola sy fitaovana fanorenana sy fikarakarana ara-pitsaboana ary tari-dalana. Mendri-piderana ny nisian’ny olona maro izay niharan-doza tamin’ilay tafio-drivotra, kanefa nanao izay azony natao mba hanampiana ny hafa.
Nanomboka nanao zavatra koa ny kongregasionan’ny Vavolombelon’i Jehovah. Nitatitra toy izao i Aubrey Conner, loholona iray tao San Angelo: “Raha vantany vao nifarana ilay rivo-doza, dia teo amin’ny telefaonina izahay nifanontany izay nanjo ny hafa. Nifanampy izahay ary nanampy koa ireo mpiara-monina taminay tsy Vavolombelona, mba hanampina varavarankely tamin’ny takelaka, hametraka plastika tamin’ny tafon-trano, ary nanao izay hiarovana ireo trano tamin’ny toetr’andro, araka izay azo natao. Avy eo izahay dia nandrakitra an-tsoratra ny anaran’ny olona rehetra tao amin’ny kongregasiona izay nanana trano niharam-pahavoazana. Trano tokony ho zato no nila fanamboarana, ary tsy ampy ireo fitaovana nomen’ireo masoivoho mpitondra fanampiana. Koa dia nividy fitaovana fanampiny izahay ary nanao izay hahavoalamina anay ho amin’ny asa. Tamin’ny fitambarany, dia Vavolombelona 1 000 teo ho eo no nanolo-tena an-tsitrapo mba hanampy, ka tokony ho 250 isaky ny faran’ny herinandro. Tonga avy lavitra, hatrany amin’ny 740 kilaometatra izy ireo. Samy niasa tsy nitandro hasasarana ny rehetra, matetika tamin’ny hafanana efa ho 40 degre. Na dia ny anabavy iray 70 taona aza dia niara-niasa taminay isaky ny faran’ny herinandro, afa-tsy indray mandeha ihany, dia tamin’ilay nanamboarana ny simba tamin’ny tranony. Ary tamin’io faran’ny herinandro io izy dia niakatra teo amin’ny tafon-tranony, nanampy tamin’ny fanamboarana ny simba!
“Matetika izahay dia nandre fitenenana toy izao avy tamin’ireo mpitazana: ‘Tsy ho tsara ve raha mba manao izao amin’ny mpikambana ao aminy koa ireo fivavahana hafa?’ Nanaitra ny sain’ireo mpiara-monina taminay ny nahita antoko-mpiasa an-tsitrapo 10 ka hatramin’ny 12 (tafiditra amin’izany ireo anabavy) tonga aloha be ny zoma maraina tao amin’ny tranon’ny Vavolombelona iray tahaka azy, vonona ny hanamboatra izay simba na hanorina indray ny tafo iray manontolo mihitsy aza, tsy nisy fampandoavam-bola. Tamin’ny ankamaroan’ny toe-javatra, dia vita tao anatin’ny faran’ny herinandro iray ny asa. Indraindray, dia nisy mpanao trano tsy Vavolombelona efa am-perinasa amin’ny fanafoana trano, rehefa tonga eo amin’ny trano akaiky eo ny antoko-mpiasanay. Voaendakay ny tafo taloha, ary voaorinay indray ny tafonay sady voadionay ny tokotany talohan’ny nahavitan’izy ireo ny azy. Indraindray izy ireo dia nampitsahatra ny asany mba hijerena anay fotsiny!”
Namarana ny teniny toy izao ny Rahalahy Conner: “Samy halahelo io fanandraman-javatra niaraha-nankafy io izahay rehetra. Nanjary nifankahalala tamin’ny fomba fijery hafa izahay, tamin’ny fanehoana sy fandraisana fitiavan-drahalahy mbola tsy nisy toy izany. Heverinay fa izany dia vao santionany fotsiny amin’izay ho ao amin’ny tontolo vaovaon’Andriamanitra, hisy rahalahy sy anabavy hifanampy noho izy ireo maniry hanao izany tokoa.” — 2 Petera 3:13.
Kobe — “Hazo sy platira ary fatin’olona potipotika”
Tokony ho efa voaomana ireo mponina tao Kobe. Isaky ny 1 Septambra tokoa izy ireo dia mankalaza ny Andro Fisorohana Loza. Ireo ankizy mandeha any an-tsekoly dia manao fanazaran-tena fiomanana ho amin’ny horohoron-tany, ny miaramila dia manao famerimberenana famonjena amin’ny helikoptera, ary ny sampan-draharahan’ny mpamonjy hain-trano dia mampiseho ireo miliny fanaovana sarintsarina horohoron-tany, ka ao amin’izany milina izany no anaovan’ireo manolo-tena an-tsitrapo fanazaran-tena eo amin’ny fahaizany manao izay hahatafita velona, ao anatin’ny boaty mitovy habe amin’ny efitrano izay mihontsankontsana sy mihovotrovotra toy ny horohoron-tany tena izy. Rehefa nitranga anefa ny horohoron-tany tena izy tamin’ny 17 Janoary 1995, dia toa tsy nisy nahasoa ireo fiomanana rehetra ireo. Tafon-trano an’aliny maro no nianjera — zavatra izay tsy nitranga mihitsy tao anatin’ireo fanaovana sarintsarina horohoron-tany. Nivadika ny lamasinina; nisy tapany tamin’ny autoroute potika; vaky ireo fantsona mitondra gaza sy rano; nirodana ireo trano, toy ny hoe vita tamin’ny baoritra. Nilazalaza ilay fisehoan-javatra ho “hazo sy platira ary fatin’olona potipotika” ny gazetiboky Time.
Avy eo dia tonga ny hain-trano. Nidedadeda ireo trano avo kanefa ireo mpamonjy hain-trano nangaihay dia tsy afa-nandroso, noho ny fifamoivoizana tsentsin’ny embouteillage lava be. Ireo izay tody tany amin’izay nisy afo matetika dia nahita fa tsy nisy rano azo nalaina avy tamin’ilay rafi-pandehanan-drano simba tao amin’ilay tanàna. “Sahotaka tanteraka ny tamin’ny andro voalohany”, hoy ny manam-pahefana iray. “Mbola tsy nahatsiaro tena ho tsy afa-nanoatra toy izany mihitsy aho teo amin’ny fiainako, rehefa fantatro fa nisy olona maro tototra tao anatin’ireo trano nirehitra ireo. Ary fantatro fa tsy nisy na inona na inona azoko natao momba izany.”
Tamin’ny fitambarany, dia olona 5 000 teo ho eo no maty, ary trano sahabo ho 50 000 no rava. Tsy nanana afa-tsy ny ampahatelon’ny sakafo nilainy i Kobe. Mba hahazoana rano, dia nisy nikaoka rano maloto avy tao ambanin’ireo fantson-drano vaky. Maro tamin’ireo tsy nanan-kialofana no nandositra nankany amin’ireo toeram-pialofana izay nisy fizarana sakafo, kely dia kely ny anjaran’ny isan’olona, volavolam-bary iray isan’andro. Tsy ela dia niely ny tsy fahafaliana. “Tsy nanao na inona na inona ny manam-pahefana”, hoy ny fitarainan’ny lehilahy iray. “Raha manohy miantehitra amin’izy ireo isika dia ho faty mosary.”
Nanao fandaminan-javatra avy hatrany ireo kongregasionan’ny Vavolombelon’i Jehovah tao Kobe sy ny faritra nanodidina. Ny mpanamory helikoptera iray izay nahita maso ny asan’izy ireo dia niteny toy izao: “Nankany amin’ilay faritra nisy loza aho tamin’ilay andro nisian’ny horohoron-tany, ary nandany herinandro tany. Rehefa tonga tany amin’ny toeram-pialofana iray aho, dia nisavoritaka tanteraka ny zava-drehetra. Tsy nisy asa fanampiana na inona na inona natao. Ny Vavolombelon’i Jehovah no hany nihazakazaka nankany amin’ilay toerana, nanao ireo asa tena nilaina.”
Nisy asa maro be tokony hatao tokoa. Efitrano Fanjakana folo no nanjary tsy azo nampiasaina, ary Vavolombelona maherin’ny 430 no tsy nanan-trano. Nanan-trano izay nila fanamboarana ny 1 206 fanampiny. Tsy vitan’izany ihany fa nila fampiononana mafy ny fianakavian’ireo Vavolombelona 15 izay maty tamin’ilay loza.
Vavolombelona 1 000 teo ho eo nanerana ilay tany no nanolotra ny fotoanany mba hanampy teo amin’ny asa fanamboarana ny simba. “Rehefa niasa teo amin’ny tranon’ireo izay nianatra ny Baiboly kanefa mbola tsy vita batisa izahay”, hoy ny nomarihin’ny rahalahy iray, “dia nanontaniana foana izahay hoe: ‘Ohatrinona no tokony haloanay ho an’izao rehetra izao?’ Rehefa nilazanay izy ireo fa ilay asa dia notohanan’ireo kongregasiona, dia nisaotra anay izy ireo nanao hoe: ‘Ankehitriny dia zava-misy izay zavatra nianaranay!’ ”
Nanohina ny sain’ny maro ny fihetsika haingana sy feno nasehon’ny Vavolombelona nanoloana ilay loza. “Tohina mafy aho”, hoy ilay mpanamory voalaza tetsy aloha. “Mifampiantso hoe ‘rahalahy’ sy ‘ranabavy’ ianareo. Efa hitako ny fomba nifanampianareo; tena fianakaviana iray tokoa ianareo.”
Nianatra lesona sarobidy avy tamin’ilay horohoron-tany ny tenan’ireo Vavolombelona koa. Niaiky toy izao ny anabavy iray: “Nihevitra foana aho fa arakaraka ny maha-lehibe kokoa ny fandaminana iray, no maha-sarotra kokoa ny anehoana fiheverana amin’olona manokana.” Kanefa nanova ny fiheverany ny fikarakarana feno fitiavana azony. “Fantatro izao fa miahy antsika i Jehovah, tsy amin’ny maha-fandaminana fotsiny, fa amin’ny isam-batan’olona koa.” Ho avy anefa ny fanamaivanana maharitra amin’ireo loza.
Fanamaivanana Maharitra Tsy ho Ela!
Tsy andrin’ny Vavolombelon’i Jehovah ilay fotoana tsy hanafoanan’ny loza intsony ny ain’olombelona sy ny fivelomany. Ao amin’ilay tontolo vaovaon’Andriamanitra, dia hampianarina hiara-miasa amin’ny tontolo iainana eto an-tany ny olona. Arakaraka ny hanarian’ny olombelona ireo fanao feno fitiavan-tena, no tsy haha-mora andairan’ny loza araka ny natiora azy ireo.
Ankoatra izany, dia hataon’i Jehovah Andriamanitra — ilay Mpamorona ny herin’ny natiora — izay tsy hahatandindomin-doza intsony indray ny fianakavian’olombelona sy ireo zavatra noforoniny teto an-tany, noho ireo herin’ny natiora. Amin’izay ny tany dia tena ho paradisa tokoa. (Isaia 65:17, 21, 23; Lioka 23:43, NW ). Ho tanteraka amim-boninahitra ilay faminaniana ao amin’ny Apokalypsy 21:4 manao hoe: “Hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.”
[Sary, pejy 5]
I Beatrice Jones (ankavia) mampiseho ny fomba nifampitantanany tamin’ny hafa mba hamakivakiana rano tondraka
[Sary, pejy 6]
Asa fanampiana taorian’ny tafio-drivotra