FITEHIRIZAM-BOKIN’NY Vavolombelon'i Jehovah
FITEHIRIZAM-BOKIN’NY
Vavolombelon’i Jehovah
Malagasy
  • BAIBOLY
  • ZAVATRA MISY
  • FIVORIANA
  • w97 15/1 p. 29-31
  • Enoka Tsy Nanan-tahotra na Inon-kidona na Inon-kihatra

Tsy misy video mifandray amin’io.

Miala tsiny fa tsy mety miseho ilay video.

  • Enoka Tsy Nanan-tahotra na Inon-kidona na Inon-kihatra
  • Ny Tilikambo Fiambenana Manambara ny Fanjakan’i Jehovah—1997
  • Lohatenikely
  • Mitovitovy Aminy
  • Enoka sy ilay raharaha iadian-kevitra eo amin’izao rehetra izao
  • Nentin’Andriamanitra i Enoka — Tamin’ny fomba ahoana?
  • Tanteraka ny faminaniana
  • Niara-nandeha Tamin’Andriamanitra i Enoka na dia Ratsy aza ny OlonaNiara-nandeha Tamin’Andriamanitra i Enoka na dia Ratsy aza ny Olona
    Ny Tilikambo Fiambenana Manambara ny Fanjakan’i Jehovah—2001
  • “Nahazo Sitraka Tamin’​Andriamanitra Izy”
    Ny Tilikambo Fiambenana Manambara ny Fanjakan’i Jehovah (Besinimaro)—2017
  • Miaraha Mandeha Amin’Andriamanitra na dia Misafotofoto aza ny Fiainana
    Ny Tilikambo Fiambenana Manambara ny Fanjakan’i Jehovah—2005
  • Enoka
    Fandalinana ny Soratra Masina, Boky 1
Hijery Hafa
Ny Tilikambo Fiambenana Manambara ny Fanjakan’i Jehovah—1997
w97 15/1 p. 29-31

Enoka Tsy Nanan-tahotra na Inon-kidona na Inon-kihatra

HO AN’NY lehilahy marina iray, dia ny vanim-potoana ratsy indrindra tamin’izay. Nanenika ny tany ny tsy fitiavana an’Andriamanitra. Nisy fikororosiana hatrany teo amin’ny toe-pitondran-tenan’ny olombelona. Raha ny marina, tsy ela akory dia izao no voalaza: “Hitan’i Jehovah fa be ny faharatsian’ny olona tambonin’ny tany, ka izay fisainana rehetra avy amin’ny fony dia ratsy ihany mandritra ny andro.” — Genesisy 6:5.

I Enoka, ilay lehilahy fahafito ao amin’ny tetirazana miainga avy amin’i Adama, dia nanana herim-po hiavahana. Niorina mafy tamin’ny fahitsiana izy na inona na inona vokany. Nampijaly loatra ny mpanota ratsy fanahy ny hafatr’i Enoka, ka nanjary nokendrena hovonoina ho faty ny tenany. Ary tamin’izany dia i Jehovah irery ihany no afaka nanampy azy. — Joda 14, 15.

Enoka sy ilay raharaha iadian-kevitra eo amin’izao rehetra izao

Ela be talohan’ny nahaterahan’i Enoka, dia nipoitra ilay raharaha iadian-kevitra momba ny fiandrianana eo amin’izao rehetra izao. Moa ve manan-jo hanapaka Andriamanitra? Raha ny marina, dia nilaza hoe tsia i Satana Devoly. Nanizingizina izy fa ho tsara kokoa ny fiainan’ny zavaboary manan-tsaina raha tsy miankina amin’ny fitarihan’Andriamanitra izy ireo. Niezaka hanangona porofo hanamarinana ny fanoherany an’i Jehovah Andriamanitra i Satana, tamin’ny fitarihana olona tamin-kafetsena mba hiandany aminy. I Adama sy Eva vadiny ary i Kaina zanak’izy ireo lahimatoa, dia malaza ratsy ho niandany tamin’i Satana, tamin’ny nifidianan’izy ireo hanapaka ny tenany fa tsy hotapahin’Andriamanitra. Izany no nataon’ilay mpivady olombelona voalohany tamin’ny nihinanany ilay voankazo nandraran’Andriamanitra azy, ary izany no nataon’i Kaina tamin’ny namonoany an-tsitrapo an’i Abela rahalahiny nahitsy. — Genesisy 3:4-6; 4:8.

I Abela dia namahatra tamin-kerim-po tamin’ny fiandaniany tamin’i Jehovah. Koa satria nampandroso ny fanompoam-pivavahana madio ny tsy fivadihan’i Abela, dia tsy isalasalana fa nahafaly an’i Satana ny nahita an’i Kaina tsy niahotra haneho ny fahatezerany izay nahafaty an’i Abela. Nanomboka tamin’io fotoana io, dia nampiasa ny “tahotra ny fahafatesana” ho fiadiana fampitahorana i Satana. Maniry hampangorohoro ny fon’ny olona na iza na iza izay mirona hanolotra fanompoam-pivavahana amin’ilay Andriamanitra marina izy. — Hebreo 2:14, 15; Jaona 8:44; 1 Jaona 3:12.

Tamin’ny fotoana nahaterahan’i Enoka, ilay fomba fijerin’i Satana hoe tsy hanohana ny fiandrianan’i Jehovah ny olombelona dia azo inoana fa toa voamarina tsara. Efa maty i Abela, ary tsy nisy nanaraka ilay oha-pahatokiana navelany. Na dia izany aza, dia nampiseho ny tenany ho naningana i Enoka. Nanana fototra mafy orina ho an’ny finoana izy, satria fantany tsara ireo fisehoan-javatra nitranga tao amin’ny saha Edena.a Toy inona moa no tsy maintsy ho nankamaminy an’ilay faminanian’i Jehovah nanondro fa hisy Taranaka nampanantenaina izay hamarana an’i Satana sy ireo teti-dratsiny! — Genesisy 3:15.

Noho io fanantenana io teo anatrehany mandrakariva, dia tsy nanaiky hampitahorin’ilay tantara malaza momba ny nampamonoan’ny Devoly an’i Abela i Enoka. Niara-nandeha tamin’i Jehovah kosa izy, ka nanaraka lalam-pahitsiana nandritra ny androm-piainany. I Enoka dia nitoetra ho tafasaraka tamin’izao tontolo izao, ka nanalavitra ny toe-tsainy tsy tia fiankinana. — Genesisy 5:23, 24.

Fanampin’izany, i Enoka dia niteny an-kitsirano sy nanazava tamin-kerim-po fa tsy hahomby ireo asa ratsin’ny Devoly. Teo ambany fitaoman’ny fanahy masin’Andriamanitra, na heriny miasa, dia naminany toy izao momba ny ratsy fanahy i Enoka: “Indro, tonga Jehovah mbamin’ny masiny tsy omby alinalina hitsara ny olona rehetra sy hampiaiky ny olona ratsy fanahy rehetra ny asan’ny haratsiam-panahy rehetra, izay nataony tamin’ny haratsiam-panahiny sy ny teny sarotra rehetra izay nitenenan’ny mpanota ratsy fanahy hanohitra Azy.” — Joda 14, 15.

Noho ny fanambarana tsy nisy tahotra nataon’i Enoka, ny apostoly Paoly, rehefa nanoratra ho an’ireo Kristiana hebreo, dia nampiditra azy ho anisan’ireo ‘vavolombelona maro toy ny rahona’, izay namela ohatra faran’izay tsara teo amin’ny finoana miasa.b (Hebreo 11:5; 12:1). Noho izy lehilahy nanam-pinoana, dia naharitra tamin’ny lalan’ny tsy fivadihana nandritra ny 300 taona mahery i Enoka. (Genesisy 5:22). Tsy maintsy ho nahasosotra an’ireo fahavalon’Andriamanitra tany an-danitra sy teto an-tany toy inona moa ny fahatokian’i Enoka! Nanetsika ny fankahalan’i Satana ilay faminaniana nanindrontsindrona nambaran’i Enoka, fa nahatonga ny fiarovan’i Jehovah kosa.

Nentin’Andriamanitra i Enoka — Tamin’ny fomba ahoana?

I Jehovah dia tsy namela an’i Satana na ireo mpanompony teto an-tany hamono an’i Enoka ho faty. Milaza toy izao kosa ny firaketana an-tsoratra ara-tsindrimandry: “Nentin’Andriamanitra [izy].” (Genesisy 5:24). Milazalaza izany amin’izao fomba izao ny apostoly Paoly: “Finoana no namindrana an’i Enoka tsy hiharan’ny fahafatesana; ka dia tsy hita izy, satria nafindran’Andriamanitra; fa talohan’ny namindrana azy dia nambara fa nankasitrahan’Andriamanitra izy.” — Hebreo 11:5.

Ahoana no ‘namindrana an’i Enoka tsy hiharan’ny fahafatesana’? Na, araka ny fandikan-teny nataon’i R. A. Knox, ‘ahoana no nanesorana an’i Enoka, tsy nandia fahafatesana’? Namarana tamim-piadanana ny fiainan’i Enoka Andriamanitra, ka nitsimbina azy tamin’ny fanaintainan’ny fahafatesana, na avy tamin’ny aretina izany, na herisetra teo am-pelatanan’ireo fahavalony. Eny, i Jehovah dia nanafohy ny fiainan’i Enoka teo amin’ny faha-365 taonany — somary vao herotrerony ihany raha noharina tamin’ireo mpiara-belona taminy.

Ahoana no ‘nanambarana an’i Enoka fa nankasitrahan’Andriamanitra izy’? Porofo inona no nananany? Azo inoana fa nampiditra an’i Enoka ho ao anatin’ny tsy fahatsiarovan-tsaina Andriamanitra, tsy nisy hafa tamin’ny ‘nampiakarana’, na, namindrana, ny apostoly Paoly, izay miharihary fa nahazo fahitana ny amin’ny paradisa ara-panahy ho avy, hiainan’ny kongregasiona kristiana. (2 Korintiana 12:3, 4). Mety ho tafiditra tamin’ilay fanambarana, na, porofo, fa nankasitrahan’Andriamanitra i Enoka, ny fahitana niserana ny Paradisa eto an-tany amin’ny hoavy, izay hanohanan’ny velona rehetra ny fiandrianan’Andriamanitra. Angamba iny izy nahazo fahitana nahatretrika iny indrindra no nentin’Andriamanitra ho amin’ny fahafatesana tsy nisy fanaintainana mba hatoriany mandra-pahatongan’ny andro hitsanganany amin’ny maty. Toa hita fa, toy ny tamin’i Mosesy, dia nesorin’i Jehovah ny fatin’i Enoka, satria “tsy hita izy”. — Hebreo 11:5; Deoteronomia 34:5, 6; Joda 9.

Tanteraka ny faminaniana

Amin’izao andro izao, ny Vavolombelon’i Jehovah dia manambara ny votoatin’ny faminanian’i Enoka. Avy amin’ny Soratra Masina, dia asehon’izy ireo ny fomba hahatanterahan’izy io rehefa handringana ny olona tsy tia azy Andriamanitra amin’ny hoavy tsy ho ela. (2 Tesaloniana 1:6-10). Mahatonga azy ireo ho tsy tiam-bahoaka ny hafatra entiny, satria samy hafa be amin’ny fomba fijery sy ny tanjon’itỳ tontolo itỳ. Tsy mahagaga azy ireo ny fanoherana hitany, satria nampitandrina an’ireo mpanara-dia azy toy izao i Jesosy: “Ho halan’ny olona rehetra hianareo noho ny anarako”. — Matio 10:22; Jaona 17:14.

Tahaka an’i Enoka anefa, ny Kristiana amin’ny andro ankehitriny dia mahazo antoka ny amin’ny fanafahana azy ireo amin’ny fahavalony, amin’ny farany. Hoy ny nosoratan’ny apostoly Petera: “Fantatry ny Tompo izay hamonjeny ny tsara fanahy amin’ny [fisedrana, NW ] sy ny hitehirizany ny olona tsy marina amin’ny fijaliana ho amin’ny andro fitsarana”. (2 Petera 2:9). Mety ho hitan’Andriamanitra fa mety ny hanesorana ny olana iray na ny tarehin-javatra misedra iray. Mety hifarana ny fanenjehana. Raha tsy izany anefa no izy, dia fantatr’Andriamanitra ny fomba ‘hanisiana lalana hahafahana’ mba ho afaka hiaritra amim-pahombiazana ny fitsapana mahazo azy ny vahoakany. Manome “hery mihoatra noho ny mahazatra” mihitsy aza i Jehovah rehefa ilaina izany. — 1 Korintiana 10:13; 2 Korintiana 4:7, NW.

Noho i Jehovah “Mpamaly soa izay mazoto mitady Azy”, dia hitahy an’ireo mpanompony mahatoky koa izy, amin’ny fanomezana azy fiainana mandrakizay. (Hebreo 11:6). Ho an’ny ankamaroan’izy ireo, izany dia ho fiainana mandrakizay ao amin’ny paradisa eto an-tany. Tahaka an’i Enoka, dia enga anie isika, noho izany, mba hanambara tsy amin-tahotra ny hafatr’Andriamanitra. Amim-pinoana, dia aoka isika hanao izany na inon-kidona na inon-kihatra.

[Fanamarihana ambany pejy]

a I Adama dia 622 taona fony i Enoka teraka. Mbola velona 57 taona teo ho eo taorian’ny nahafatesan’i Adama i Enoka. Noho izany, dia nifanindry nandritra ny fe-potoana lava dia lava ny androm-piainan’izy ireo.

b Ilay teny nadika hoe “vavolombelona” ao amin’ny Hebreo 12:1 dia avy amin’ny teny grika hoe marʹtys. Araka ny Wuest’s Word Studies From the Greek New Testament, io teny io dia manondro “olona manamarina, na afaka manamarina, an’izay hitany na reny na fantany tamin’ny fomba hafa na inona na inona”. Milaza ny Christian Words, nataon’i Nigel Turner, fa io teny io dia midika hoe olona miteny “miainga avy amin’ny zavatra niainany manokana (...), sy [miteny] momba ny fahamarinana sy ny zavatra hita, miainga avy amin’ny hevitra ekeny mafy”.

[Efajoro, pejy 30]

Nolotoina ny Anaran’Andriamanitra

Tokony ho taonjato efatra talohan’i Enoka no nahaterahan’i Enosy, zafikelin’i Adama. “Tamin’izany no vao niantsoana ny anaran’i Jehovah”, hoy ny Genesisy 4:26. Mino ny manam-pahaizana manokana sasany momba ny teny hebreo fa io andininy io dia tokony horaisina hoe ‘nanombohana niantso tamin’ny fomba maloto’ ny anaran’Andriamanitra, na “tamin’izany no nanomboka ny fandotoana”. Raha ny amin’io vanim-potoana teo amin’ny tantara io, dia hoy ny Targum-n’i Jerosalema: “Io ilay taranaka izay tamin’ny androny no nanombohan’izy ireo naniasia, ka nanaovany sampy ho an’ny tenany, sy nanomezany anaram-bosotra ny sampiny tamin’ny anaran’ny Tenin’ny Tompo.”

Tamin’ny andron’i Enosy no hita ho niely patrana ny fampiasana tamin’ny fomba ratsy ny anaran’i Jehovah. Mety ho nisy ny hoe ny anaran’Andriamanitra dia nampiharin’ny olona tamin’ny tenany na tamin’ny olona sasany izay nolazainy fa tamin’ny alalan’izy ireny no nanatonany an’i Jehovah Andriamanitra teo amin’ny fanompoam-pivavahana. Na, mety ho nampiharin’izy ireo tamin’ny sampy ny anaran’Andriamanitra. Na ahoana na ahoana, dia vitan’i Satana Devoly ny naningotra ny taranak’olombelona tamin’ny fomba azo antoka tao amin’ny fandriky ny fanompoan-tsampy. Tamin’ny fotoana nahaterahan’i Enoka, dia efa tsy fahita firy ny fanompoam-pivavahana marina. Na iza na iza olona tahaka an’i Enoka, izay niaina tamin’ny fahamarinana sy nitory azy io, dia tsy tiam-bahoaka ka, noho izany, dia niharan’ny fanenjehana. — Ampitahao amin’ny Matio 5:11, 12.

[Efajoro, pejy 31]

Nankany An-danitra ve i Enoka?

“Finoana no namindrana an’i Enoka tsy hiharan’ny fahafatesana”. Amin’ny fandikany an’io tapany amin’ny Hebreo 11:5 io, ny fandikan-tenin’ny Baiboly sasany dia manondro fa tsy tena maty i Enoka. Ohatra, ny A New Translation of the Bible nataon’i James Moffatt, dia manambara hoe: “Tamin’ny finoana no nitondrana an’i Enoka nankany an-danitra mba tsy ho faty mihitsy izy.”

Telo arivo taona teo ho eo taorian’ny andron’i Enoka anefa, dia nanambara toy izao i Jesosy Kristy: “Tsy nisy niakatra ho any an-danitra, afa-tsy Ilay nidina avy tany an-danitra, dia ny Zanak’olona”. (Jaona 3:13). Izao no vakina ao amin’ny The New English Bible: “Tsy nisy mihitsy niakatra nankany an-danitra, afa-tsy ilay nidina avy tany an-danitra, dia ny Zanak’olona.” Rehefa nanao io fanambarana io i Jesosy, na ny tenany aza dia mbola tsy niakatra tany an-danitra. — Ampitahao amin’ny Lioka 7:28.

Manambara ny apostoly Paoly fa i Enoka sy ny hafa izay mahaforona ireo vavolombelona maro toy ny rahona talohan’ny andro kristiana, dia ‘maty avokoa’ ka “tsy mbola nahazo ny teny fikasana”. (Hebreo 11:13, 39). Nahoana? Satria ny olombelona rehetra, anisan’izany i Enoka, dia nandova ota avy tamin’i Adama. (Salamo 51:5; Romana 5:12). Ny hany fomba hahazoana famonjena dia amin’ny alalan’ny sorom-panavotan’i Kristy Jesosy. (Asan’ny Apostoly 4:12; 1 Jaona 2:1, 2). Tamin’ny andron’i Enoka, dia mbola tsy voaloa io avotra io. Noho izany, dia tsy nankany an-danitra i Enoka, fa matory ao amin’ny fahafatesana, miandry ny fitsanganana amin’ny maty eto an-tany. — Jaona 5:28, 29.

[Sary nahazoan-dalana, pejy 29]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s

    Fitehirizam-boky Malagasy (1965-2025)
    Hiala
    Hiditra
    • Malagasy
    • Hizara
    • Firafitra
    • Copyright © 2025 Watch Tower Bible and Tract Society of Pennsylvania
    • Fifanekena
    • Fifanekena Momba ny Tsiambaratelo
    • Firafitry ny Fifanekena
    • JW.ORG
    • Hiditra
    Hizara