“Iray Monja Amin’ireo Aina Maro Voakasikao”
TAMIN’NY Janoary 1996, dia narary noho ny fivontosana tao amin’ny atidoha i Carol. Enimpolo taona mahery izy ary, talohan’izay, dia vehivavy falifaly sy natanjaka ary nanana teny fampaherezana ho an’ny rehetra foana. Izao anefa ireo dokotera dia nikely aina mba handresena ilay fivontosana mahafaty. Tao anatin’ny ady mafy i Carol no naharay itỳ taratasy manaraka itỳ:
“Any Carol malala,
“Malahelo tokoa aho nandre ny tsy fahasalamanao. Soa ihany isika fa manana ilay tena fanantenana izay fantatsika sy tiantsika noho ny nanampian’ny Baiboly antsika. Io fanantenana io dia ny hanapahan’ny Fanjakan’i Jehovah ny tany mba hahafahantsika hiaina ao anatin’ny toe-piainana paradisa, fotoana izay andrandraintsika rehetra.
“Tiako ny mampahafantatra anao fa ny asa fitoriana nataon’ny tenanao dia namonjy olona maro tsy ho faty mandrakizay. Iray amin’ireny olona ireny aho. Asa raha tadidinao ny nihaonantsika voalohany. Roapolo taona aho tamin’izay. Lava volo sy nivarotra zava-mahadomelina ary mpiaraka tamin’ny andian-jatovo mpanao herisetra aho. Nitondra basy daholo izahay ary tsy nanana tena fitiavana afa-tsy ho an’ny tenanay ihany.
“Nandondòna tao am-baravarako ianao niaraka tamin’ny Vavolombelona iray ary nanolotra ahy Ny Tilikambo Fiambenana sy Mifohaza! Nanandrana nanome anao vola iray dolara aho sady nilaza fa tsy nila an’ireo gazety. Nampahafantatra ahy ianao fa tsy hitady fanomezana fotsiny akory no nivoahanao. Nilaza tamiko ianao fa nanao asa iray mba hanampiana ny olona hamaky ny Baiboly ianao. Asa moa raha naka sy namaky an’ireo gazety aho na tsia. Kanefa, namboly ny voan’ny fahamarinana teo amin’ny fiainako ianao.”
“Taona vitsivitsy tatỳ aoriana, i Gary, Vavolombelona iray hafa, dia tonga tao an-tranon’ny reniko tamin’ny fotoana naha-tao ahy. Nilaza taminy momba ny fitsidihana nataonao, taona vitsivitsy talohan’izay, aho. Niara-nianatra ny Baiboly tamiko nandritra ny fotoana lava i Gary mandra-pahatongan’ny fotoana nanaovana batisa ahy tamin’ny farany, tamin’ny 1984. Ankehitriny aho dia mampianatra ny fahamarinana momba ny Fanjakan’Andriamanitra an’ireo zanako.
“Azoko antoka fa iray monja amin’ireo aina maro voakasiky ny fanompoana tamim-pahatokiana nataonao nandritra ny taona maro aho. Kanefa, tamin’ny alalan’io hatsaram-panahy miharo fitiavana io, no nanampianao ahy sy ny fianakaviako hanjary hahalala an’i Jehovah, ilay Andriamanitra Lehibe, sy ny Zanany, i Kristy Jesosy. Tsy andriko ny fotoana hahafahako hahita anao ao amin’ny fandehan-javatra vaovao rehefa hofafan’i Jehovah ny ranomaso rehetra amin’ny masontsika, ary tsy hisy fahafatesana intsony. — Apokalypsy 21:4.
“Raha ny amiko sy ny fianakaviako, dia faly izahay fa nanana fahafahana nahalala anao sy voakasiky ny asa fitoriana nataonao. Misaotra.
“Amim-pitiavan-drahalahy,
Peter”
Taorian’ny enim-bolana naharariany, dia maty i Carol tamin’ny Martsa 1996, rehefa avy namafy voan’ny fahamarinana maro nandritra ireo 35 taona naha-evanjelisitra be zotom-po azy. Nianarany fa tsy misy mahalala mihitsy hoe rahoviana ny voa iray no hamoa, mety ho taona maro atỳ aoriana aza. — Matio 13:23.