Mpisolovava Nanadihady Momba ny Vavolombelon’i Jehovah

HOY i Les Civin, mpisolovava any Afrika Atsimo: “Tsy dia nahafantatra ny Vavolombelon’i Jehovah aho taloha.” Nanadihady ny finoan’izy ireo anefa izy tatỳ aoriana. Nahoana? Inona no hitany tamin’izany? Ireto no navaliny ny mpampanonta ny gazety Mifohaza!

Inona no fivavahanao taloha?

Jiosy aho, ary nanambady an’i Carol taoriana kelin’ny 1970. Izy indray Anglikanina. Tsy liana tamin’ny fivavahana izy, ary tsy nisy heriny tamin’ny fiainanay ny fivavahana. Rehefa feno valo taona anefa i Andrew zanakay, dia nieritreritra i Carol hoe tokony hoentina mivavaka izy. Nilaza tamiko ny mpitondra fivavahana jiosy iray hoe raha manaraka ny fivavahana jiosy i Carol, dia ho lasa Jiosy ho azy i Andrew, ary ho afaka handray andraikitra eo anivon’ny fiangonana rehefa 13 taona. Nankany amin’ny synagoga isan-kerinandro àry izahay mba hanaraka ny fianarana ho an’ireo te hiova ho Jiosy.

Ahoana no nahatonga anao hifandray tamin’ny Vavolombelon’i Jehovah?

Isaky ny tonga teto aminay ry zareo, dia nataoko foana izay hamaranana haingana ny resaka, ka nilaza aho hoe: “Jiosy aho. Izaho tsy mino ny Testamenta Vaovao.” Nilaza tamiko i Carol tatỳ aoriana fa mana-namana Vavolombelon’i Jehovah izy, ary tena mahay Baiboly izy io. Nilaza koa izy hoe maninona izahay raha mandalina bebe kokoa ny Baiboly. Nanaiky tsy sazoka hianatra tamin’izy ireo àry aho.

Ahoana no fahitanao an’ilay fianarana?

Tena nanambony tena aho. Lasa nafana fo tamin’ny fivavahana jiosy indray mantsy aho, ary nihevitra hoe anisan’ny firazanana voafidin’Andriamanitra. Nieritreritra aho hoe: ‘Inona koa no hampianarin’itony olona itony ahy?’ Tamin’ny dinidinika nataonay voalohany, dia nilaza tamin’ilay Vavolombelon’i Jehovah aho hoe: “Efa manana ny fivavahako aho. Jiosy aho hatramin’ny nahaterahako ary mandra-pahafatiko. Tsy hampiova ahy mihitsy izay lazainareo.” Tsara fanahy tamiko anefa izy, ary nanaja ny hevitro. Nianatra tany amin’ny synagoga àry izahay mivady ny zoma sy alatsinainy alina, ary nianatra tamin’ny Vavolombelon’i Jehovah ny alahady maraina, rehefa tsy afa-niala. Tsy nandoavam-bola ny fampianaran’izy ireo, tsy nitovy tamin’ny tany amin’ny synagoga.

Ny Baibolin’ny Jiosy no nampiasaiko, satria nieritreritra aho hoe Baiboly manohana ny fomba fiheviny no nampiasain’ny Vavolombelon’i Jehovah. Gaga anefa aho hoe mifanaraka tsara ny Baiboliko sy ny Baibolin’izy ireo. Vao mainka àry aho te hanaporofo hoe tsy mahafantatra izay lazainy izy ireo.

Tsy ela taorian’izay, dia nilaza i Carol fa tsy mahay tsara ny Baiboly ny mpampianatra tany amin’ny synagoga, ka tsy ho any intsony izy. I Jesosy ihany no Kristy taminy, fa tsy nety niova hevitra izy. Tezitra aho, ka saika hisaraka taminy. Rehefa nihatony anefa aho, dia nieritreritra hampiasa ny fahaizako lalàna, mba hanaporofoana tamin’i Carol hoe diso io ‘sekta adaladala’ io.

Nahomby ve ianao?

Nisy mpitondra fivavahana jiosy nanome ahy boky manaporofo fa tsy tanteraka tamin’i Jesosy ny faminaniana momba ny Mesia. Nianatra an’io boky io izaho sy Carol nandritra ny herintaona sy tapany. Mbola nianatra tamin’ny Vavolombelon’i Jehovah koa izahay isan-kerinandro. Rehefa nandinika ny faminaniana tsirairay noresahin’ilay boky nomen’ny mpitondra fivavahana anefa izahay, dia nanomboka nisalasala aho. Mifanohitra amin’izay voalaza ao mantsy ny zavatra hitako. Hitako hoe tanteraka tamin’i Jesosy Kristy ireo faminanian’ny Baiboly momba ny Mesia. Resy lahatra tanteraka aho rehefa nandinika an’ilay faminaniana ao amin’ny Daniela 9:24-27, izay milaza fa amin’ny taona 29 no hiseho ny Mesia.a Nitondra Baiboly amin’ny teny hebreo, misy dikan’ny teny tsirairay amin’ny teny anglisy, ilay Vavolombelon’i Jehovah. Nohamariniko tsirairay ny dikan’ireo teny tao amin’ireo andinin-teny ireo, ary nanao kajy aho, ka hitako hoe ny taona 29 tokoa no resahin’ilay faminaniana. Nanontany àry aho hoe: “Inona no ifandraisan’io daty io amin’i Jesosy?”

Hoy ilay Vavolombelon’i Jehovah: “Tamin’io taona io i Jesosy no natao batisa.”

Gaga be aho! Nahagaga ahy koa hoe tena marina ny faminanian’ny Baiboly sady mifanaraka tsara.

Nanao ahoana ny fihetsik’ireo namanao rehefa fantany hoe niova hevitra ianao?

Tena nanahy ny sasany, ka nilaza hitondra anay tany amin’ny olona afaka mampiseho aminay hoe noteren’ny Vavolombelon’i Jehovah hanaiky ny fampianarany izahay. Tsy nisy nanery anay anefa, fa nanao fikarohana lalina izahay, ary resy lahatra noho ny fanazavana mirindra tsara.

Nahoana ianao no tapa-kevitra ho lasa Vavolombelon’i Jehovah?

Niaraka tamin’ny vadiko nanatrika ny fivorian’izy ireo aho indraindray. Efa Vavolombelon’i Jehovah ny vadiko tamin’izay.b Variana aho nahita hoe tsara fanahy sy mifankatia izy ireo, nefa tsy mitovy firazanana. Tsy nahita toy izany aho tany amin’ny fivavahako. Nianatra Baiboly nandritra ny telo taona teo ho eo àry aho, ary natao batisa.

Inona no tsapanao noho ianao lasa Vavolombelon’i Jehovah?

Voninahitra ho ahy ny hoe Vavolombelon’i Jehovah. Mieritreritra ny zavatra nataoko mba hanoherana ny fahamarinana aho indraindray, ka mahatsapa hoe tsy mendrika hahazo ny fitahiana omen’i Jehovah ahy. Tsy hanenenako mihitsy anefa ny fanapahan-kevitro.

Inona no fitahiana noraisinao?

Maro be. Afaka nanampy ny Sampan-draharaha Momba ny Lalàna tao amin’ny biraon’ny sampan’ny Vavolombelon’i Jehovah, eto Afrika Atsimo, aho. Anti-panahy eo anivon’ny fiangonana koa aho, izany hoe mpiandry ara-panahy sy mpampianatra. Fa ny tena lehibe indrindra dia hoe lasa mahafantatra an’i Jehovah sy ny Zanany aho, ary mahafantatra ny tena dikan’ireo zava-mitranga ankehitriny sy ireo fisehoan-javatra lehibe manozongozona an’izao tontolo izao.

[Fanamarihana ambany pejy]

[Teny notsongaina, pejy 11]

Nahagaga ahy . . . hoe tena marina ny faminanian’ny Baiboly sady mifanaraka tsara