Mpanjaka Iray Nanana Harena sy Fahendrena

Heverinao ve fa hahasambatra anao ny harena? Tsy ho faly ve ianao, raha misy manome anao vola be? Izany tokoa. Azo inoana fa mety hieritreritra ny amin’ireo fomba handaniana izany ianao.

EKENA aloha fa misy zavatra maro be azo vidina mba hahatonga ny fiainana hampiadana kokoa sy hahafinaritra kokoa. Azo atao “fialokalofana” amin’ny zava-manahirana tsy ampoizina toy ny aretina, na ny tsy fananana asa, koa ny vola. — Mpitoriteny 7:12.

Inona anefa no ifandraisan’ny vola sy ny fahasambarana? Moa ve ianao toy ny olona maro, ka mihevitra fa ny fahasambarana dia tombony fanampiny azo avy amin’ny harena? Mety ho sarotra ahitam-baliny ireo fanontaniana ireo, satria ny vola dia azo fantarina ny habetsahany, na isaina mora foana, fa ny fahasambarana kosa tsy azo atao toy izany. Tsy azonao apetraka eo ambony mizana ny fahasambarana, mba handanjana azy.

Eo koa ny hoe, toa sambatra erỳ ny mpanan-karena sasany, fa mahonena kosa ny hafa. Mitovy amin’izany no mitranga eo amin’ny mahantra. Na izany aza, dia mino ny ankamaroan’ny olona — na dia ireo efa mpanan-karena aza — fa hitondra fahasambarana bebe kokoa ho azy ireo ny fananam-bola bebe kokoa.

Anisan’ny olona nanoratra momba izany zavatra izany i Solomona, Mpanjakan’ny Isiraely fahiny. Lehilahy anisan’ny nanankarena indrindra teto an-tany izy. Afaka mamaky filazalazana momba ny harem-beny ianao, ao amin’ny toko faha-10 amin’ny Mpanjaka Voalohany, izay boky ao amin’ny Baiboly. Mariho, ohatra, fa milaza toy izao ny andininy faha-14: “Ny lanjan’ny volamena izay tonga tao amin’i Solomona isan-taona dia talenta volamena enina amby enim-polo amby enin-jato”. (Izahay no manao sora-mandry.) Mitovy amin’ny lanjam-bolamena 25 taonina, io tarehimarika io. Amin’izao andro izao, izany volamena be dia be izany dia hitentina mahery lavitra ny 1 000 000 000 000 FMG!

Tsy vitan’ny hoe nanankarena fotsiny anefa i Solomona; notahin’Andriamanitra izy ka nahazo fahendrena. Mitantara toy izao ny Baiboly: “Solomona mpanjaka dia nanan-karena sady hendry noho ny mpanjaka rehetra ambonin’ny tany. Ary ny tany rehetra nitady hahita ny tavan’i Solomona mba hihaino ny fahendrena izay nataon’Andriamanitra tao am-pony.” (1 Mpanjaka 10:23, 24). Afaka mandray soa avy amin’ny fahendren’i Solomona koa isika, satria ampahany amin’ny fitantaran’ny Baiboly, ny asa soratra nataony. Andeha hojerentsika izay voatery nolazainy momba ny fifandraisan’ny harena sy ny fahasambarana.

[Sary nahazoan-dalana, pejy 3]

Nalaina tamin’ny Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart