Ny Antony Iovan’ny Sasany Fivavahana

Ho an’ny maro, dia tsy inona ny fivavahana fa anarana iray isalorana fotsiny. Mety hanondro ny toerana alehan’ny olona iray tsindraindray ny alahady, sy anaovany fampakaram-bady, ary handevenana azy, izy io. Tsy milaza anefa izy io hoe karazan’olona manao ahoana izy, na hoe inona no fantany sy inoany. Ny fanadihadiana iray, ohatra, dia nampiharihary fa ny 50 isan-jaton’ireo nitonona ho Kristianina no tsy nahafantatra hoe iza no nanao ny Toriteny teo An-tendrombohitra. Na dia ilay filoha karàna malaza, i Mohandas Gandhi, izay hindoa, aza dia nahafantatra izany!

MAHAGAGA ve raha miala amin’ny fivavahana ny olona, rehefa maro be aminy no tsy dia mahafantatra firy ny amin’ny finoany? Tsia, tsy mahagaga izany. Kanefa, tsy zavatra tsy azo halavirina koa izany. Ireo izay nanaiky fanampiana mba hianatra momba ny Baiboly dia matetika no gaga mahita ny soa entin’izy io ho azy ireo. Ny Baiboly mihitsy no milaza toy izao: “Izaho, Jehovah Andriamanitrao, no mampianatra anao hahita soa sady mitarika anao amin’ny làlana tokony halehanao.” — Isaia 48:17, izahay no manao sora-mandry.

Inona no tokony hataon’ireo izay tsy afa-po raha ny amin’ny hanoanany ara-panahy? Tsy tokony ho kivy tanteraka ka tsy hanompo an’Andriamanitra izy ireo! Tokony handinika ny Baiboly sy hijery izay ataon’Andriamanitra ho azy kosa izy ireo.

Valin’ireo fanontaniana sarotra

Fony izy fito taona, dia nijery ny nahafatesan-dreniny i Bernd.a Hatramin’ny faran’ny fahazazany, dia nanontany tena izy hoe: ‘Aiza ny reniko? Nahoana aho no voatery hihalehibe tsy misy azy?’ Fony zatovo i Bernd, dia mpikambana narisika tao am-piangonana. Nanahy ny amin’ny fijalian’ny olombelona izy, ka nanantena ny ho tonga mpiasa manampy any an-tany hafa. Na dia izany aza, dia voahelingelin’ireo fanontaniana izay tsy nanomezan’ny fiangonany valiny nahafa-po izy.

Avy eo i Bernd dia niresaka tamin’ny mpiara-mianatra iray izay Vavolombelon’i Jehovah. Nasehon’io tanora io tamin’i Bernd, avy tao amin’ny Baiboly, fa tsy nahatsiaro tena ny reniny, ary matory ao amin’ny fahafatesana. Nianatra momba ny andinin-teny maro ao amin’ny Baiboly izay manazava izany i Bernd, toy ny Mpitoriteny 9:5 izay manao hoe: “Fa ny maty kosa tsy mba mahalala na inona na inona”. Koa tsy nanana antony hanahiana i Bernd momba ny hoe nijaly tao amin’ny karazana afofandiovana ve ny reniny — sa ratsy kokoa. Na dia ampianarina ao amin’ny ankamaroan’ireo fivavahana aza ny foto-pampianarana ny amin’ny fanahy tsy mety maty, dia nahita tao amin’ny Baiboly i Bernd fa ny fanahy olombelona dia ilay olona ihany. Rehefa maty ilay olona, dia maty ilay fanahy. “Ny fanahy izay manota no ho faty.” — Ezekiela 18:4.

Nianatra momba ny fahatsinjovan-javatra mahatalanjona ho an’ny maty koa i Bernd. Namaky tao amin’ny Asan’ny Apostoly, boky ao amin’ny Baiboly, izy hoe: “Hisy fitsanganan’ny marina sy ny tsy marina.” (Asan’ny Apostoly 24:15, NW ). Toy inona moa ny fientanam-pony nahafantatra fa io fitsanganana amin’ny maty io dia hitranga eto an-tany, izay haverin’Andriamanitra ho paradisa! — Salamo 37:29; Apokalypsy 21:3, 4.

Tsy ela ny fahalalana marina ara-baiboly dia nanome fahafaham-po ny filan’i Bernd zavatra ara-panahy. Tsy kivy tanteraka tamin’ny fivavahana i Bernd. Niala tamin’ilay fiangonana izay tsy afaka nanome fahafaham-po tamin’ny hanoanany kosa izy, ary nanaraka endri-panompoam-pivavahana iray miorina mafy amin’ny Baiboly. Hoy izy: “Efa 14 taona lasa izany, ary tsy nanenina na oviana na oviana tamin’iny zavatra nataoko iny aho. Ankehitriny dia fantatro fa tsy mahatonga fijaliana ilay Mpamorona. I Satana no ilay andriamanitr’itỳ fandehan-javatra itỳ, ary izy no tokony homen-tsiny noho ireo toe-piainana manodidina antsika. Hanitsy ny fanimbana rehetra nataon’ny tontolon’i Satana anefa i Jehovah, rehefa afaka kelikely. Hiverina koa ny reniko amin’ny fitsanganan’ny maty. Ho fifaliana re izany!”

Marihina kely eto fa nahatratra ny zava-kendreny ny hiasa any ivelany mba hanampy ny hafa i Bernd. Miasa any amin’ny tany hafa izy, ka manampy ny hafa hianatra momba ny Fanjakan’Andriamanitra, ilay tena vahaolana ho an’ny fahorian’izy ireo. Sahala amin’i Bernd, dia olona an-tapitrisany maro no nianatra fa tsy ho ela Andriamanitra dia hamarana ny fijalian’ny olombelona. Mientam-po izy ireo mahita fa misy fivavahana iray izay manome fahafaham-po amin’ny zavatra ilainy ara-panahy. — Matio 5:3.

Inona no zava-kendren’ny fiainana?

Rehefa nanjary niha-tsy niraharaha fivavahana ny tontolo tandrefana, dia maro no manontany hoe: ‘Inona no zava-kendren’ny fiainana?’ Hita ao amin’ny Baiboly ny valiny, araka ny hitan’i Michael. Teo antenatenan’ireo taona 1970, dia naniry hiaraka tamin’ny antokona mpampihorohoro i Michael. Iray ihany ny zava-kendreny teo amin’ny fiainana — ny hikendry ireo olona sasany izay noheveriny ho tompon’andraikitra tamin’ny tsy rariny teo amin’ny kapitalisma. “Tsy nivoaka ny trano na oviana na oviana aho, raha tsy nitondra ny basiko”, hoy izy. “Ny hamono mpanao politika sy kapitalista ambony maro araka izay azoko natao no fikasako. Vonona ny hamoy ny aiko ho an’io hevitra nijoroako io aho.”

Mpiangona i Michael, nefa tsy nisy olona tao amin’ny fiangonany afaka nanazava ny tena zava-kendren’ny fiainana. Koa rehefa nitsidika tany an-tranony ny Vavolombelon’i Jehovah, ary nampiseho taminy ny valin-tenin’ny Baiboly ny amin’ireo fanontaniany, dia nihaino tamim-pitandremana i Michael. Nanomboka nanatrika ireo fivoriana tany amin’ny Efitrano Fanjakanan’ny Vavolombelon’i Jehovah teo an-toerana izy.

Liana ta hahafanta-javatra momba ny fahalianany vaovao amin’ny Baiboly ireo naman’i Michael. “Tongava any amin’ny fivoriana amin’ny alahady ho avy izao”, hoy i Michael nampirisika azy ireo. “Mijanòna mandritra ny fotoana kelikely. Raha tsy tianareo izay renareo, dia mandehana mody.” Inona tokoa fa taorian’ny lahateny ara-baiboly iray naharitra 45 minitra, dia nandao ilay efitrano ny ankamaroan’ireo namany. Nijanona anefa ny iray taminy — i Susan. Talanjona tamin’izay reny io zazavavy io. Nivady i Michael sy i Susan tatỳ aoriana, ka lasa Vavolombelon’i Jehovah vita batisa. “Ankehitriny dia fantatro ny antony maha-eto an-tany antsika”, hoy i Michael. “Noforonin’i Jehovah isika. Ny tena zava-kendrentsika eo amin’ny fiainana dia ny hahalala azy sy ny hanao ny sitrapony. Izany no mitondra ny tena fahafaham-po!”

An-tapitrisany maro no miaiky ny amin’izany koa. Raisin’izy ireo am-po ny tenin’ny Baiboly manao hoe: “Ary rehefa re izany rehetra izany, dia izao no faran’ny teny: Andriamanitra no atahory, ary ny didiny no tandremo, fa izany no tokony hataon’ny olona rehetra.” — Mpitoriteny 12:13.

Fiezahana mandresy ireo zava-manahirana eo amin’ny fiainana

Isika rehetra dia mahatsapa ny fahatanterahan’ilay faminaniana hita ao amin’ny 2 Timoty 3:1 (NW ) manao hoe: “Amin’ny andro farany dia hisy fotoan-tsarotra tsy ho mora setraina.” Tsy misy afaka mandositra ireo zava-manahiran’izao “fotoan-tsarotra” izao. Ny Baiboly anefa dia manampy antsika hiatrika azy ireo.

Diniho ny ohatr’i Steven sy i Olive, mpivady iray. Rehefa nanomboka niara-nianatra Baiboly tamin’ny Vavolombelon’i Jehovah izy ireo, dia nanan-java-nanahirana ara-panambadiana, toy ny maro hafa. “Nanjary nisy elanelana teo aminay”, hoy ny fanazavan’i Steven. “Samy hafa ny zava-kendrenay sy ny zavatra nahaliana anay.” Inona no nanampy azy ireo tsy hisaraka? “Nasehon’ny Vavolombelon’i Jehovah taminay ny fomba hampiharanay ireo foto-pitsipiky ny Baiboly teo amin’ny fiainanay”, hoy i Steven nanohy ny teniny. “Sambany izahay vao nianatra ny dikan’ny hoe tsy tia tena sy miahy ny ankilany. Nampiray mafy anay ny fampiharana ireo foto-pitsipiky ny Baiboly. Ankehitriny izahay dia sambatra, ary mafy orina ny fanambadianay.”

Fifandraisana akaiky amin’Andriamanitra

Araka ny fitsapan-kevitra Gallup iray natao vao haingana, dia ny 96 isan-jaton’ny Amerikanina no mino an’Andriamanitra, ary mivavaka aminy ny ankamaroany. Kanefa, ny fitsapan-kevitra hafa iray dia nampiseho fa ambany dia ambany ankehitriny ny isan’ny mpiangona any am-piangonana sy any amin’ny synagoga, tao anatin’ny dimampolo taona. Ny 58 isan-jaton’ny Amerikana eo ho eo dia milaza fa indray mandeha isam-bolana na latsaka izy ireo no mandeha miangona. Mazava fa tsy nampanatona azy ireo akaiky kokoa an’Andriamanitra ny fivavahana. Ary tsy voafetra ho ao Etazonia ihany io zava-manahirana io.

Nihalehibe tany Bavière i Linda. Katolika nafana fo izy ary nivavaka tsy tapaka. Tetsy an-danin’izany, dia natahotra ny hoavy izy. Tsy nahafantatra na inona na inona momba ny fikasan’Andriamanitra ho an’ny olona izy. Vao 14 taona monja i Linda, raha nihaona tamin’ny Vavolombelon’i Jehovah, ary toy izao ny tatitra nataony: “Nahaliana ahy izay noresahiny, ka nandray boky fianarana Baiboly roa aho ary namaky azy ireo avy hatrany.” Roa taona tatỳ aoriana, dia nanomboka niara-nianatra Baiboly tamin’ny Vavolombelon’i Jehovah i Linda. “Ny zavatra rehetra nianarako momba an’Andriamanitra avy tao amin’ny Baiboly dia nisy heviny”, hoy ny nolazainy. Niala tamin’ny fiangonany i Linda, ka lasa Vavolombelon’i Jehovah vita batisa teo amin’ny faha-18 taonany.

Inona no nanosika an’i Linda hiova fivavahana? Hoy ny fanazavany: “Nanampy ahy hahita fa misy Andriamanitra iray ny fivavahako, ary nianatra ny hino azy aho. Tsy nanana ny maha-izy azy anefa izy ary lavitra be. Tsy vitan’ny hoe nanamafy ny finoako an’Andriamanitra fotsiny ny fianarako ny Baiboly, fa nanampy ahy koa hanjary hahafantatra sy ho tia azy. Izao aho dia manana fifandraisana manokana sy sarobidy amin’Andriamanitra, zavatra izay sarobidy kokoa noho ny zavatra hafa rehetra.”

Mendrika ny hanaovana ezaka ny fivavahana marina!

Moa ve ny fivavahanao manome anao tari-dalana ara-panahy sy mampiseho aminao ny fomba ahafahan’ny Baiboly manampy anao hiatrika ireo zava-manahirana eo amin’ny fiainana? Moa ve izy io mampianatra ny fanantenana avy ao amin’ny Baiboly ny amin’ny hoavy? Moa ve izy io mitondra anao ho amin’ny fifandraisana manokana sy akaiky amin’ilay Mpamorona, miorina amin’ny fahalalana marina ara-baiboly? Raha tsia, dia aza manary toky. Aza mandao ny fivavahana, fa tadiavo ilay endri-panompoam-pivavahana izay miorina mafy amin’ny Baiboly. Amin’izay ianao dia ho tahaka ireo izay nambaran’ny faminaniana ao amin’ny Isaia, boky ao amin’ny Baiboly, manao hoe: “Koa izao no lazain’i Jehovah Tompo: Indro, ny mpanompoko hihinana, (...) indro, ny mpanompoko hisotro, (...) indro, ny mpanompoko hifaly, (...) indro, ny mpanompoko hihoby noho ny faharavoam-po”. — Isaia 65:13, 14.

[Fanamarihana ambany pejy]

[Sary, pejy 4]

Manampy antsika hanjary hahafantatra sy ho tia an’Andriamanitra ny Baiboly