Fanolorana Fanompoam-pivavahana ho An’Andriamanitra Amin’ny Fahamarinana
Ny fanompoam-pivavahana azon’Andriamanitra ekena, dia tsy maintsy miorina amin’ny fahamarinana. (Jaona 4:23). Ampahafantarin’ny Baiboly fa ho anisan’ny “[kôngregasiônan’ilay, NW ] Andriamanitra velona, sady andry sy fiorenan’ny fahamarinana”, ireo mpivavaka marina. (1 Timoty 3:15). Ny olona mahaforona ny kôngregasiônan’Andriamanitra dia tsy vitan’ny hoe mino ny fahamarinan’ny Tenin’Andriamanitra fotsiny, fa miaina mifanaraka amin’izany sy miaro izany, ary mampahafantatra izany manerana ny tany koa. — Matio 24:14; Romana 10:9-15.
FANTATRA tsara ny Vavolombelon’i Jehovah noho ny asa fampianarana Baiboly ataony any amin’ny tany maherin’ny 200 ankehitriny. Mianatra ny Baiboly izy ireo sady mampianatra izany ho toy ny fahamarinana tsy ampidirana ny hery manalefaky ny filôzôfian’olombelona. Fantatry ny tenanao manokana ve ny fampianaran’izy ireo miorina amin’ny Baiboly? Maro no misalasala ny hihaino ny Vavolombelon’i Jehovah noho ny fanaratsiana miely momba azy. Asaina anefa ny olona tso-po hitsara raha marina na tsia izay torin’ny Vavolombelona. Tsy tokony hiorina amin’ny honohono ny fitsaran-javatra lehibe toy izany. Olona maro izay nanadihady manokana momba ny fampianaran’ny Vavolombelon’i Jehovah no nandray soa lehibe.
Mampisava ny tahotra ny fahafantarana ny fahamarinana
Diniho, ohatra, ny amin’i Eugenia. Nobeazina tao amin’ny ankohonana katolika hirihiriny izy. Anisan’ireo nandamina ny fitsidihan’ny papa tany Meksika tamin’ny 1979, ny rainy. Fony izy nitsidika namana no nifandraisan’i Eugenia tamin’ny Vavolombelon’i Jehovah. Noho ny fanampian’izy ireo dia nanomboka namakafaka akaiky kokoa izay lazain’ny Baiboly ny tenany. Izao no tadidiny: “Nanomboka nipoitra ny tahotra tamin’ny voalohany. Hitako ny fahamarinana! Nidika anefa izany fa diso ny ankamaroan’ireo zavatra ninoako teo aloha. Diso avokoa ny zavatra ninoan’ny fianakaviako sy ny namako, dia ireo olon-tsy foiko. Sahiran-kevitra aho. Tsy nitsahatra nanontany tena aho hoe: ‘Hanao ahoana àry ny fihetsiky ny fianakaviako manoloana izao zavatra vao hitako izao?’ Arakaraka ny fandehan’ny fotoana, ary noho ny fanampian’i Jehovah, dia nanomboka haiko ny nampifanaraka ny fiainako tamin’io toe-javatra lehibe io. Nanapa-kevitra ny hiresaka manokana tamin’ny mpampianatra teôlôjia iray, izay naman’ny fianakavianay aho, indray andro. Nolazaiko taminy avokoa ny faniriako hahita ny fahamarinana. Izao no fanamarihana nataony avy eo: ‘Raha maniry hahalala ny fahamarinana ianao, dia mitadiava Vavolombelon’i Jehovah.’ ”
Toy ny efa nampanahy an’i Eugenia, dia noroahin’ny fianakaviany hiala tao an-trano izy. Nanohy nanome fanampiana ara-panahy azy anefa ny Vavolombelona. Hoy izy nanazava: “Nahazo tanjaka aho mba ho sahy hiandany tamin’ny fahamarinana. Takatro fa zavatra mendrika ny hatao, ny ady ho an’ny fahamarinana. Zava-dehibe aoka izany ny fandraisana tsara nasehon’ny Vavolombelon’i Jehovah tamiko. Tsapako fa tiana aho tao amin’ny kôngregasiôna kristianina. Ny fanatonana akaiky ny fandaminan’Andriamanitra dia nanampy ahy tsy hatahotra ny hiandany samirery amin’ny fahamarinana.”
Diniho koa izao ohatra hafa izao. Nihalehibe tao amin’ny fianakaviana iray zatra niresaka tsy tapaka momba ny Baiboly, i Sabrina. Nampitombo tsikelikely endrika ‘fivavaham-pianakaviana’ iray ry zareo, raha ny marina. Nataon’io tovovavy io ho fahazarana ny nifandray tamin’ireo mpikambana tao amin’ny fivavahana isan-karazany mba hampiharihariana ny fahadisoan’izy ireny. Rehefa nisy Vavolombelon’i Jehovah nanolotra fampianarana Baiboly taminy, dia nekeny avy hatrany, noho ny fikendrena ny hanaporofo ny fahadisoan’ny zavatra inoan’izy ireo. Izao no tsaroany: “Rehefa herintaona mahery no nianarako, dia nanjary natahotra ny hamoy ‘ny fahamarinako’ aho. Mora tamiko ny nampiharihary ny fahadisoan’ireo fivavahana maro izay nifandraisako, fa tsy mora toy izany kosa ilay izy tamin’ity indray mitoraka ity.”
Nahatonga an’i Sabrina hampitsahatra ny fianarany Baiboly niaraka tamin’ny Vavolombelon’i Jehovah ny tahotra nahazo azy. Nahatsapa fahabangana ara-panahy anefa izy avy eo. Koa nanapa-kevitra ny hanohy indray ilay fianarana izy, ary nanaiky io fahamarinana vao hitany io, rehefa nandeha ny fotoana. Nandroso i Sabrina, ka tonga tamin’ny faniriana hizara tamin’ny hafa izay nianarany. Nangataka ny hiaraka tamin’ny Vavolombelona teny amin’ny fanompoana isan-trano ataon’izy ireo mihitsy aza izy. Nanazava toy izao i Sabrina: “Talohan’ny nanekena ahy hitory niaraka tamin’ny Vavolombelon’i Jehovah, dia nanontaniana aho hoe: ‘Moa ve ianao maniry marina tokoa ho tonga Vavolombelon’i Jehovah?’ ‘Tsia!’, hoy ny valin-teniko. Nipoitra tao anatiko indray ilay tahotra.” Farany, rehefa nanohy nanatrika ny fivoriana rehetra ary nandinika ny vahoakan’Andriamanitra sy ny fomba ampiharan’izy ireo ireo foto-pitsipika ara-baiboly i Sabrina, dia tonga tamin’ny fanatsoahan-kevitra hoe: io tokoa no fahamarinana. Natao batisa izy ary mpitory ny filazantsara manontolo andro, ankehitriny.
Nahoana no hafa be?
Mety hisy hanontany hoe: ‘Nahoana ny fampianaran’ny Vavolombelon’i Jehovah no hafa be noho ny an’ireo fivavahana hafa?’ Ny fanaovana topy maso vetivety amin’ireo zavatra inoan’ny Vavolombelona, dia hanampy anao hahita fa Kristianina tso-po izy ireo, ary mpianatra ny Baiboly mazoto. Mampirisika anao izahay hijery ao amin’ny Baibolinao manokana ireo andinin-teny hita ao amin’ny famintinana aseho etsy ambony, izay ahitana ireo zavatra fototra inoan’izy ireo.
Raha mijery akaiky kokoa ny zavatra inoan’ny Vavolombelon’i Jehovah sy ny fomba ifikirany amin’izay ampianarin’ny Baiboly ianao, dia mety handray fitahiana amin’ny fahazoana ilay fahafahana omen’ny fahamarinana. (Jaona 17:17). Tsy misy antony tokony hatahorana ny fahamarinana. Tadidio ilay fampanantenan’i Jesosy hoe: “Ho fantatrareo ny marina, ary ny marina hahafaka anareo tsy ho andevo.” — Jaona 8:32.
[Efajoro, pejy 6]
Zavatra Fototra Sasany Inoan’ny Vavolombelon’i Jehovah
◯ I Jehovah no ilay Andriamanitra Tsitoha. Miseho maherin’ny im-7000 ny anarany manokana ao amin’ny sora-tanana momba ny Baiboly tranainy indrindra. — Salamo 83:18.
◯ I Jesosy Kristy dia Zanak’Andriamanitra izay tonga tetỳ an-tany mba hanome ny ainy ho an’ny olombelona. (Jaona 3:16, 17). Manaraka ny fampianaran’i Jesosy Kristy araka izay hita ao amin’ny Filazantsara, ny Vavolombelon’i Jehovah.
◯ Ny anarana hoe Vavolombelon’i Jehovah dia miorina amin’ny Isaia 43:10, izay milaza hoe: “Hianareo no vavolombeloko, hoy Jehovah”.
◯ Ilay Fanjakana angatahin’ny olona ao amin’ilay vavaka hoe “Rainay izay any an-danitra”, dia fitondram-panjakana any an-danitra izay hanaisotra tsy ho ela ny fahoriana sy ny fanaintainana rehetra etỳ an-tany, mba hanomezana toerana ho an’ilay Paradisa ampanantenain’ny Baiboly. — Isaia 9:5, 6; Daniela 2:44; Matio 6:9, 10; Apokalypsy 21:3, 4.
◯ Hanana fahafahana hankafy mandrakizay ireo fitahiana hoentin’ilay Fanjakana, izay rehetra manao ny sitrapon’Andriamanitra. — Jaona 17:3; 1 Jaona 2:17.
◯ Tsy maintsy mampifanaraka ny fitondran-tenany amin’izay lazain’ny Baiboly ny Kristianina. Tsy maintsy miezaka manao ny marina izy ireo, maneho hatsaram-pitondran-tena sy fitiava-namana. — Matio 22:39; Jaona 13:35; 1 Korintiana 6:9, 10.
[Sary, pejy 5]
Mampahafantatra ny fahamarinana ara-baiboly amin’ny olona any amin’ny tany maherin’ny 200, ny Vavolombelon’i Jehovah