Mitantara Ireo Mpitory Ilay Fanjakana
Fanondrahana ny Voan’ny Fahamarinana any Silia
METY tsy hisy orana mandritra ny taona maro ny tany efitra any amin’ny faritra avaratr’i Silia. Rehefa tonga kosa anefa ny orana, dia tena rakotra voninkazo samihafa loko ny tany karankaina sy feno vato. Manintona mpizaha tany maro avy amin’ny lafy valon’ilay firenena io fisehoan-javatra manaitra io.
Misy fisehoan-javatra mahaliana lavitra anefa, mitranga any amin’ireo mponin’i Silia. Mikoriana manerana ilay tany manontolo ny ranon’ny fahamarinana ara-baiboly, ary misy olona tso-po maro “mamelana”, ka tonga mpianatr’i Jesosy Kristy. Fomba iray ampiasaina mba hanaparitahana an’ireny ranon’ny fahamarinana ireny ny telefaonina. Ireto fitantarana ireto dia mampiseho ny vokatra tsara dia tsara azo amin’ny alalan’io fomba fitory io.
• Nisy mpitory manontolo andro iray, atao hoe Karina nasaina nanao fampisehoana ny fomba fitory amin’ny alalan’ny telefaonina, tamin’ny fandaharan’ny fivoriamben’ny fizaran-tany iray. Mbola tsy nandray anjara tamin’io lafiny amin’ny fitoriana io mihitsy anefa i Karina. Mba handrisihana azy hanao ilay anjara amin’ilay fandaharan’ny fivoriambe, dia niara-nijery taminy hevitra sasany mahakasika ny fomba fitory amin’ny alalan’ny telefaonina, ny loholona iray sy ny vadiny. Nampirisihin’izy ireo hivavaka koa i Karina, mba hahazoana ny fitarihan’i Jehovah amin’ilay raharaha. Nanao izany izy, ka tapa-kevitra ny hanandrana hiantso an-telefaonina, nony farany.
Nifidy nomeraon-telefaonin’olona teo amin’ny tanàna manodidina i Karina. Nisy vehivavy, mpiasa mpampifandray antso an-telefaonina namaly azy, ka nohazavain’i Karina ny antony niantsoany. Nandray tsara ilay mpiasa, ka nisy fandaharana natao mba hahafahana hiresaka indray, rehefa afaka telo andro. Lasa fampianarana Baiboly, nampiasana ny bokikely Inona no Takin’Andriamanitra Amintsika?, ilay fiverenana mitsidika an-telefaonina. Nanomboka tamin’izay izy ireo dia nankafy fianarana mahaliana sy velombelona. Nandefa zavatra vita an-tsoratra i Karina, mba hamaliana ny fanontanian’ilay vehivavy.
• Naneho fahasahiana i Bernarda mba hitoriana tamin’ny lehilahy iray izay sendra diso nomeraon-telefaonina, niantso azy. Tsy niseho ho sosotra i Bernarda, fa nampahafantatra ny tenany ho Vavolombelon’i Jehovah kosa, ka nanolotra fanampiana. Nitohy ny resaka, ary nihaino azy ilay lehilahy, rehefa nanazava izy hoe hofoanan’ny Fanjakan’Andriamanitra tsy ho ela ny tsy rariny. Nomen’ilay lehilahy an’i Bernarda ny nomeraon-telefaoniny, ka nanao fiverenana mitsidika an-telefaonina izy. Namaky ampahany amin’ny boky Fahalalana Izay Mitarika ho Amin’ny Fiainana Mandrakizay tamin’ilay lehilahy izy, nandritra ny iray tamin’ireo resaka nifanaovan’izy ireo. Nanontany ny fomba ahafahany mahazo azy io ilay lehilahy, ka nandefa boky iray ho azy, niaraka tamin’ny Baiboly, i Bernarda. Nisy fandaharana natao mba hitsidihan’ny rahalahy iray teo an-toerana azy, ka ankehitriny ilay rahalahy dia manohy “manondraka” an’io “zavamaniry” mirobona io.
Eo amin’ity tany ara-panahy karankainan’izao tontolo izao ity tokoa, dia misy voa miafina miandry ny hitsiry, rehefa tratran’ny ranon’ny fahamarinana manome aina. Olona mangetaheta an’arivony maro no tsy mitsahatra ‘maniry’ sy “mamelana”, ka tonga mpanompo mahatokin’i Jehovah Andriamanitra. — Isaia 44:3, 4.