Ho Tsara Toetra Foana ve ny Olona?

“Voninahitra any amin’ny avo indrindra ho an’Andriamanitra, ary fiadanana etỳ ambonin’ny tany eo amin’ny olona ankasitrahany.” —Lioka 2:14.

OLONA an-tapitrisany no mahalala tsara ireo teny nolazain’ny anjelin’Andriamanitra ireo. Nampahafantatra an’ireo mpiandry ondry, izay niambina ny andian’ondriny tamin’ny alina, momba ny nahaterahan’i Jesosy, izy ireo. Manao ezaka manokana mba ho tsara toetra ny olona maro mitonona ho Kristianina, mandritra ireo andro maromaro manodidina an’ilay daty lazain’ny eglizy fa nahaterahan’i Jesosy. Matetika izy ireo no falifaly sy mifandray tsara amin’ny hafa ary tsara fanahy. Misy ifandraisany amin’izay nolazain’ireo anjely, ireo toetra tsara ireo.

Voasinton’izany toetra tsara izany na dia ireo tsy mihevitra ny Krismasy ho fety ara-pivavahana aza. Tian’izy ireo mantsy ny toetra tsara ananan’ny olona rehefa tonga ilay fety. Ankoatra izany, dia tsy miasa sy tsy mianatra ny olona sasany rehefa Krismasy, ka afaka miala sasatra na miaraka amin’ny havana aman-tsakaiza, na koa mba mifalifaly fotsiny. Mazava ho azy fa mihevitra ny Krismasy ho fotoana hanehoana fanajana an’i Jesosy Kristy ny olona tso-po maro.

Na inona na inona anefa fiheveran’ny olona ny Krismasy, dia eken’ny ankamaroany fa vetivety ihany matetika no tsara toetra ny olona. Miverina amin’ny toetra mahazatra azy indray izy ireo avy eo. Nisy lahatsoratra iray mitondra ny lohateny hoe “Toetran’ny Olona Rehefa Krismasy”, navoakan’ny Bankim-panjakana Kanadianina. Izao no voalaza tao: “Herinandro vitsivitsy fotsiny isan-taona no miezaka miaina mifanaraka amin’ilay anarana hoe ‘Kristianina’, ireo olona maro be mitonona ho Kristianina. Hatramin’ny Taom-baovao ihany izy ireo no tsara fanahy amin’ny mpiara-belona aminy. Miverina amin’ny mahazatra indray izy ireo, aorian’izay, ka tia tena sy tsy miraharaha ny fahorian’ny hafa.” Ny “tena maharatsy azy” dia tsy tsara toetra ‘foana’ toy ny amin’ny Krismasy ny olona, araka ny voaresaka tao ihany.

Na mitovy hevitra amin’izany ianao na tsia, dia mampipoitra fanontaniana lehibe ilay izy. Halala-tanana sy ho tsara fanahy foana ve ny olona indray andro any? Ho tanteraka tokoa ve ilay tenin’ny anjely tamin’ny alina nahaterahan’i Jesosy, ka hisy tena fiadanana ary hihavana tsara ny rehetra? Sa ho nofinofy fotsiny izany?