Ampianaro ny Zanakao
Tian’Andriamanitra sy ny Namany Izy
TSY misy mahalala ny anarany. Ny anaran’ny dadany hoe Jefta ihany no amantarana azy ankehitriny. Andao isika hianatra izay lazain’ny Baiboly momba azy mianaka. Ho hitantsika fa tian’Andriamanitra sy ny namany ny zanakavavin’i Jefta.
Azonao vakina ao amin’ny Mpitsara toko 11 ny tantaran’i Jefta sy ny zanany vavy. Mpanompon’Andriamanitra tsy nivadika i Jefta. Azo antoka àry fa nampianariny tsy tapaka ny Soratra Masina ny zanany.
Nisy fotoana nangataka mpanjaka olombelona ny Israelita, vahoakan’Andriamanitra. Velona talohan’io fotoana io i Jefta. Lehilahy natanjaka izy sady nahay niady. Izy àry no nasain’ny Israelita hitarika azy ireo hiady tamin’ny Amonita, firenena teo akaiky teo.
Nila ny fanampian’Andriamanitra i Jefta mba handresena ny Amonita. Nivoady àry izy fa raha ataon’i Jehovah mandresy, dia homeny an’i Jehovah izay olona mivoaka voalohany avy ao an-tranony, rehefa miverina mody izy. Hanompo mandra-pahafatiny ao amin’ny tranolay io olona io. Toerana nivavahan’ny olona tamin’Andriamanitra ny tranolay tamin’izany. Fantatrao ve hoe iza no nivoaka voalohany?...a
Ny zanakavavin’i Jefta. Nalahelo be i Jefta satria io ihany no mba zanany. Efa nivoady tamin’i Jehovah anefa izy, ka tsy maintsy nitana ny teniny. Tonga dia nilaza ilay zanany hoe: “Raha efa niloa-bava tamin’i Jehovah ianao, ry Dada, dia tanteraho izay efa naloaky ny vavanao.” Nangataka ny ho irery nandritra ny roa volana izy avy eo, mba hitomany tany an-tendrombohitra. Fa nahoana? Raha manatanteraka ny voadin’ny dadany mantsy izy, dia tsy hanana zo hanambady sy hanan-janaka intsony. Tsy ny faniriany anefa no zava-dehibe indrindra taminy. Te hankatò an-drainy sy tsy hivadika amin’i Jehovah izy. Nampifaly an’i Jehovah sy ny dadany ve izy, araka ny hevitrao?...
Nalefan’i Jefta roa volana niaraka tamin’ny namany izy. Notanterahin’i Jefta ny voadiny, taorian’izay, ka nalefany nanompo mandra-pahafatiny tany amin’ny tranolay tany Silo ny zanany. Nitsidika sy nampahery an’ilay zanakavavin’i Jefta tany Silo ireo tovovavy israelita, isan-taona.
Mahafantatra ankizy mankatò ray aman-dreny sy tia an’i Jehovah ve ianao?... Mila mahafantatra kokoa azy ireo ianao, ary minamana aminy. Hanana namana tsara ianao raha manahaka ny zanakavavin’i Jefta, ka mankatò sy tsy mivadika. Hampifaly ny ray aman-dreninao ianao sady ho tian’i Jehovah.
Vakio ny
[Fanamarihana ambany pejy]
a Raha mamaky miaraka amin’ny ankizy ianao, dia tokony hiato sy hampirisika azy hilaza ny heviny, rehefa mahita teboka telo toa an’io.