Valin’ny Fanontanianareo

◼ Nahoana isika no tokony hanana ny fitahirizam-bokintsika manokana?

Ny antony lehibe indrindra, dia satria zava-dehibe amin’ny Vavolombelon’i Jehovah ny fianarana samirery. (Jaona 17:3) Tsara ny manana fitahirizam-boky ao an-trano, mba hahafahana hanao fikarohana sy hamaly fanontaniana ary hanomana ireo fivoriana kristianina. Ho mora amintsika amin’izay ny hahita fanazavana ara-baiboly azo itokisana, ka handray soa isika.

Ny antony hafa tokony hananana fitahirizam-boky ao an-trano, dia satria tsy maintsy ‘mitondra ny entany avy’ ny Kristianina tsirairay. (Gal. 6:5) Rehefa misy fanontaniana ilana valiny, dia tsara raha zatra manao fikarohana isika, alohan’ny hanontaniana olona. Hitombo ny fahaizantsika misaina sy mahataka-javatra, raha mazoto mianatra ny Tenin’Andriamanitra isika, sady mampiasa tsara ny fitahirizam-bokintsika.—Heb. 5:11-14.

Misy ray aman-dreny mampirisika ny zanany hanana ny fitahirizam-bokiny manokana. Hahasoa azy ireo dieny izao sy amin’ny hoavy mantsy izany. Tena fananana sarobidy tokoa ny fitahirizam-boky, ho an’ny fianakaviana kristianina.