Aoka isika hitarika fianaran’ny fianakaviana ny baiboly misy heviny
1 Iray amin’ireo asa lehibe indrindra tanterahin’ny ray aman-dreny ny fampianarana ireo zanany ny fahamarinana. Adidy avy amin’i Jehovah izany. (Deot. 6:6, 7) Mila fitarihana sy torolalana ny ankizy mba handehanany amin’ny fomba mahitsy eo amin’izao tontolo izao tsy tia an’Andriamanitra. Ilain’izy ireny ny mianatra ny ho tia an’i Jehovah sy ny fahamarinana ary ny ho tapa-kevitra hifikitra amin’izany. Manambara toy izao Ny Tilikambo Fiambenana tamin’ny 1 novambra 1988, ao amin’ny pejy faha-11: “Na inona na inona fanahianareo sy andraikitrareo, manokàna fotoana ho an’ny zanakareo. Izany no zavatra tokony hatao aloha. Amin’izany no hahafahanareo mampianatra azy ireo zavatra misy vidiny ara-panahy izay hiaro ny fony sady hametraka azy eo amin’ny lalana tsara.”
2 Raha manaraka ny torolalana omen’ny Tenin’Andriamanitra ireo fianakaviana dia tokony hanokana fotoana tsy tapaka ho amin’ny fianaram-pianakaviana. Ireo filoham-pianakaviana dia, mila ny hanome ny toerana voalohany ho an’ny fiahiany ny fiainana ara-panahin’ny fianakaviana. Raha tsy omena ny fiheverana mendrika azy ny zavatra ara-panahy ilain’ny ankohonana ankehitriny dia tena azo inoana fa hanan-java-manahirana lehibe ny ray aman-dreny amin’ny hoavy.
Ny zavatra ianarana sy ny fomba anaovana izany
3 Inona no tokony hianarana? Ny filoham-pianakaviana no tsara toerana indrindra mba hahafantatra ny zavatra ilain’ny fianakaviany. Afaka manontany izay heverin’ny hafa fa hahasoa izy ary mihevitra ireny fanoloran-kevitra ireny. Hahatonga ny fianaram-pianakaviana ho mora ampiharina sy hampaharisika ny fahaiza-milefitra. Mifidy ny hanomana ny fianarana isan-kerinandro Ny Tilikambo Fiambenana ny fianakaviana maro. Kanefa dia mety hilaina indraindra ny mandinika lohahevitra voafaritra tsara mahafaoka ny zava-manahirana atrehin’ny tanora any an-tsekoly. Ny fanazavana avoaka mivaofy ny amin’ny fifanaovan’ny zatovolahy sy zatovovavy fotoana, ny zavatra atao ivelan’ny fandaharan’ny sekoly, ny fanatanjahan-tena ary ny fironana ho amin’ny faharatsiam-pitondrantena dia azo dinihina amin’ny fomba manorina sy mampahery. Zava-dehibe ny handinihan’ny loham-pianakaviana tsy tapaka ny hoe fanazavana inona no ilain’ny fianakaviana ary inona no fomba tsara indrindra hanohinana ny fon’izy ireo amin’izany. Jereo Ny Tilikambo Fiambenana 15 oktobra 1971, pejy faha-626, 627.
4 Ahoana no tokony hitarihana ny fianarana? Mambole rivo-piainana malefaka nefa feno fanajana. Sorohy ny fomba fanao tsy misy fieritreretana sy ara-pomba fotsiny. Milazà fanontaniana fanampiny ary mampiasà ohatra maro mba hampirisihana hieritreritra sady ampandraiso anjara ny rehetra. Ny fanampiana hita maso toy ny sarintany sy sary tsipika (diagramme) dia azo ampiasaina mba hampisongadinana izay zavatra dinihina. Azo omena anjara asa mba hitady ilay zavatra ianarana ao amin’ny Indeksa na ny fitambaran’ny Auxiliaire arakaraka ny taonany sy ny fahaizany ny ankizy. Ampandraiso anjara amin’ny dinidinika ny mbola kely kokoa raha vao afaka mamaly izy ireo. Azo anontaniana zavatra mitaky valiny fohy izy ireny. Aza mampiasa ny fotoana ianarana mba hitreronana ireo ankizy. Derao kosa aza izy, anehoy fankasitrahana noho ireo fiezahany, ary misehoa ho be hafanam-po amin’ny fitantarana aminy ny fomba fijery ara-panahy.
5 Ahoana no ahafahanao mahazo antoka fa nahatohina fo ianao? Ampirisiho ny rehetra hamaly amin’ny fomba fiteniny manokana. Amim-pahaiza-mandanjalanja dia mampiasà fanontaniana hahalalana fomba fihevitra mba hamantarana ny toe-pony. Afaka manontany ianao hoe: “Ahoana no fiheveran’ny ankizy any an-tsekoly io raharaha io? Mbola manana fisalasalana ihany ve ianao ny amin’io hevitra io?” Mitandrema mba tsy hampiseho fihetsika tafahoatra amin’ny valin-teny mety homen’ny ankizy amin’ny fanontaniana hahalalana ny fomba fihevitra, raha tsy izany dia mety hahatsiaro tena ho tsy afaka milaza malalaka amim-pahamarinana ny heviny izy. Omeo fotoana mba hitenenana izy ireo. Ny fahafantarany fa mihevitra azy sy ny zava-manahirana azy ianao dia hanamora lavitra ny fiezahanao amin’ny fampianarana azy.—Jereo Ny Tilikambo Fiambenana 1 febroary 1987, pejy faha-23-25.
6 Tadidio fa ny zava-kendren’ny fianaram-pianakaviana voalohany indrindra dia ny hampianarana ny hevitr’i Jehovah fa tsy ny hahitana valin-teny iray sy ny fanononana izany fotsiny any amin’ny fivorian’ny kongregasiona. (Efes. 3:17-19) Izany dia milaza fiasana mba hampidirana fanazavana ao am-po. Omeo ireo antony tokony hanirian’ny fianakaviana hanao ny sitrapon’Andriamanitra sy ny hoe nahoana no izay no fomba fiaina tsara indrindra.
7 Zava-dehibe ho an’ny fanorenana ny ara-panahin’ny fianakaviana ny fianaran’ny fianakaviana Baiboly tsy tapaka. Mampiofana sy mahatonga ny ankizy ho ampy fitaovana mba hahita vahaolana amin’ireo zava-manahirana eo amin’ny fiainana izany. Tsara toerana indrindra mba hanampy ny zanakareo, ianareo, ry ray aman-dreny. Tanteraho io andraikitra nomen’Andriamanitra io. Azo antoka fa hitahy anareo i Jehovah raha manao ny fiezahana rehetra ianareo mba hampifandrindra hevitra rehefa mitarika fianaram-pianakaviana misy heviny.