Aoka hatomboka sy hofaranana ara-potoana ireo fivoriantsika
1 Ireo fivorian’ny kongregasiona rehetra, tafiditra amin’izany ny fivoriana ho amin’ny asa fitoriana, dia tokony hanomboka sy hifarana ara-potoana. Nahoana? Satria ny faha marinam-potoana dia manome taratry ny filaminana sy fampisehoana fiheverana ny mpanatrika sy ny mpandray anjara rehetra amin’ny fivoriana. (Mpit. 3:17b; 1 Kor. 14:33) Afaka maneho ny fiahiantsika isika amin’ny fanarahana ireto torohevitra manaraka ireto, mba hahazoana antoka fa manomboka sy mifarana ara-potoana ireo fivoriana.
2 Tokony hiezaka foana isika mba ho tonga aloha any am-pivoriana, mba hahafahana manana fotoana ampy hanatonana ny hafa sy hikarakarana ireo raharaha ilaina sy mba handraisana anjara amin’ny hira sy ny vavaka fanokafana. Amin’ny ankapobeny, dia dimy minitra no atokana ho an’ny hira sy ny vavaka. Ireo izay misolotena ny kongregasiona ao amin’ny vavaka, dia tokony hitadidy ny zava-kendren’ny fivoriana, ka hanao izay hahitana taratr’izany amin’ireo vavaka fanokafana sy famaranana ataony. Tsy ilaina ho lava ny vavaka toy izany.
3 Ny Fivoriana ampahibemaso: Voafetra ho 45 minitra ny lahateny ampahibemaso. Raha mihoatra ny fotoana voatondro izany, dia hisy vokany amin’ny fianarana Ny Tilikambo Fiambenana manaraka aoriany. Ireo fivoriana roa ireo, ao anatin’izany ny hira sy ny vavaka, dia tokony hifarana ao anatin’ny adiny roa. Ireo mpandahateny dia tokony hanaraka akaiky ny fotoana voalaza ao amin’ny filazana ambangovangony omen’ny Fikambanana ary tsy hampiditra zavatra ivelan’ny lahateny, toy ny fiarahabana. Raha tsy mahafantatra ny toerana misy ny Efitrano Fanjakana ilay mpandahateny, dia tokony hanontany an’ilay kongregasiona manasa azy izy ny amin’ny lalana halehany sy ny fotoana mety ho lany hahatongavana any.
4 Ny Fianarana “Ny Tilikambo Fiambenana”: Adiny iray no omena amin’ny fianarana ny Tilikambo Fiambenana ka voavaky amin’izany ny fehintsoratra rehetra sady voadinika ireo fanontaniana famerenana. Ny fampidiran-dresaka fohy mampisongadina ireo hevi-dehibe ataon’ilay mpitarika dia tokony hanaitra ny fahalianana sy hitarika ho amin’ny fianarana. Tokony ho voafetra ireo fanazavana sy fanamarihana ataony mandritra ny fianarana. Amin’ny fitsinjarana tsara ny fotoana mifandray amin’ireo hevitra dinihina, dia hanalavitra ny fandaniana fotoana tafahoatra amin’ny tapany voalohany amin’ny fianarana ilay mpitarika, ka avy eo dia ho voatery hanafaingana ny tapany farany.
5 Ny Sekolin’ny fanompoana teokratika: Fivoriana maharitra 45 minitra koa izy io. Na dia tsy hajanona aza ny lahateny fampianarana sy ny famerenana ny hevi-dehibe amin’ny famakiana Baiboly rehefa tapitra ny fotoana, ireo rahalahy nomena ireo anjara ireo dia tokony hanaja ny fotoana noferana ho azy. Raha toa ka tsy izany no miseho, dia homena torohevitra mitokana izy ireo. Ny torohevitra sy ny fanamarihana ataon’ny mpiandraikitra ny sekoly dia tokony hatao ao anatin’ny fotoana voatondro. Mety tsy ho very ny fotoana raha toa ka mipetraka eo akaikin’ny lampihazo avokoa ireo mpianatra ary raha toa ka mamarana haingana ny lahateniny ny tsirairay avy rehefa tapitra ny fotoana nomena azy.—Jereo ny Fandaharan’ny Sekolin’ny fanompoana teokratika amin’ny 1991.
6 Ny Fivoriana momba ny asa: Fivoriana maharitra 45 minitra koa izy io. Miaraka amin’ny Sekolin’ny fanompoana teokratika sy ny hira ary ny vavaka, ny fandaharana iray manontolo dia tsy tokony hihoatra ny adiny iray sy dimy amby efapolo minitra. Ireo rahalahy mandray anjara amin’ny tapany amin’ny fivoriana momba ny asa dia tokony hanaja ny fotoana nomena azy. Tsy mila afa-tsy fampidiran-dresaka fohy ny tapany atao amin’ny alalan’ny fanontaniana sy valiny. Tsy ilaina ny manampy filazana miitatra amin’ny fampidiran-dresaka. Tokony ho voaomana tsara ireo fampisehoana, ary ireo mpandray anjara amin’izany dia tokony ho vonona sy ho eo amin’ny toerany mba hahazoany mampiasa tsara ny fotoana natokana ho amin’ny anjarany.
7 Ny fianarana ny bokin’ny kongregasiona: Izy io dia fivoriana maharitra adiny iray, tafiditra amin’izany ny vavaka fanokafana sy famaranana. Tokony hovakina ny fehintsoratra rehetra. Mba hahazoany antoka fa hifarana ara-potoana ny fivoriana, ilay mpitarika dia hitsinjara tsara ny fianarana mba tsy ho voatery hanafaingana izy any amin’ny tapany farany na hamarana aloha loatra. Ilain’ilay mpitarika ny mahay manavaka ny hoe fotoana toy inona no holanina amin’ny fehintsoratra tsirairay avy. Tokony ho azon’ny mpanatrika mazava ireo hevi-dehibe. Ny fahaizan’ilay mpitarika mampianatra dia hanome azy ny fahafahana hifankazatra amin’izay mety ho fanontaniana amin’izany lafiny izany.—Titosy 1:9.
8 Ny Fivoriana ho amin’ny asa fitoriana: Tsy tokony hihoatra ny 15 minitra izy ireny, ao anatin’izany ny fizarana ny faritany sy ny famaranana amin’ny vavaka. Ireo izay mivoaka ho amin’ny asa fitoriana dia maniry ny hanomboka ny asany eny amin’ny saha fitoriana aloha araka izay azo atao. Hanomboka ny fivoriana ara-potoana ry ilay mpitarika, fa tsy hampihemotra izany mandra-pahatongan’ny antokon’olona maromaro kokoa. Rehefa voazara koa ny faritany ka nofaranana tamin’ny vavaka ny fivoriana, dia afaka miainga haingana ho any amin’ny saha fitoriana ny antokon’olona. Izany dia zava-dehibe indrindra ho an’ny mpitory maharitra izay mety hanatrika eo.
9 Isika rehetra dia afaka mandray soa avy amin’ireo fivoriana manomboka sy mifarana ara-potoana. Ankasitrahan’ireo manambady tsy mpino indrindra izany satria antenainy ho tonga any an-tokantrano amin’ny fotoana sasany izy ireo. Rehefa mifanaraka ny amin’ny fitaterana mankany am-pivoriana na miverina avy any, na rehefa milaza ny fotoana hiverenany any an-trano ireo izay manana fianakaviana voazarazara, dia ho tsara raha mihevitra ny fotoana ilainy aloha na aorian’ny fivoriana hiarahany amin’ireo namany na hangalana zavatra vita an-tsoratra sy ny sisa izy ireo. Tsy misy iadian-kevitra fa ny fanombohana sy ny famaranana ny fivoriana ara-potoana dia manampy amin’ny fanaovan-javatra “amin’ny fahamendrehana sy ny filaminana.”—1 Kor. 14:40.