Aoka ianao hanao ny asa fanompoana amin’ny fanahinao rehetra
Fizarana faha-3: Mandraisa anjara amin’ny fandrosoan’ny hafa
1 Notononina matetika ho ohatra tsara dia tsara ny amin’ny fampiofanana ho amin’ny fanompoana ny fifandraisana nisy teo amin’i Paoly rahalahy be taona kokoa sy i Timoty lehilahy tanora nahafoy tena. (1 Kor. 4:17). Nampianarin’i Paoly i Timoty mba hizara amin’ny hafa koa ny fahalalana sy fampiofanana azony. (2 Tim. 2:1, 2). Mampiseho fahendrena isika raha manaraka izany fomba fanao izany koa ao amin’ny kongregasiona ankehitriny.
2 Ampiofany ny hafa: Manjary miharihary ny ilàna fampiofanana rehefa tsapantsika fa teto Madagasikara izao dia nisy mpitory vaovao 667 nanampy ny isan’ny mpitory tamin’ny telo taona lasa izay. Azo inoana tokoa fa handray soa avy amin’ny fampiofanana azon’ireo mpitory za-draharaha omena ny ankamaroan’izy ireo. Ny anabavy iray izay tsy nandany afa-tsy adiny iray na roa isam-bolana mazàna teo amin’ny asa fanompoana dia nianatra ny hiteny amin’ny fomba mandaitra eny am-baravarana rehefa nomen’ny mpitory za-draharaha iray fanampiana. Nanjavona ny fanahiany handray anjara tamin’ny fanompoana tany am-boalohany, ary nanjary mpitory ny vaovao tsara be zotom-po izy. Ankehitriny dia mpitory maharitra mahita vokatra tsara izy ary mitodika ny lasa ka milaza hoe: “Ny hany zavatra nilaiko dia ny hampianarina izay tokony holazaina, ary dia nanomboka nankamamy ny fanompoana aho.”
3 Raha loholona ianao, mpikarakara momba ny asa, mpitory maharitra, na mpitory tsotra za-draharaha, ahoana no ahafahanao mandray anjara amin’ny fandrosoan’ny hafa? Ny dingana voalohany dia ny mampahafantatra ny mpitarika ny fianarana ny bokin’ny kongregasiona misy anao fa maniry hanampy mpitory hafa ianao.
4 Aoka ianao hanana fandaharana voalamina tsara sy hiomana: Mitondra fanampiana ny mifanao fotoana hentitra mba hiaraha-miasa. Mety ho hendratrendratra na tsy hatoky tena ilay namanao amin’ny voalohany, kanefa hankasitrahany fa misy olona miara-miasa aminy mba hanampy azy rehefa misy ilàna izany. (Mpit. 4:9). Raha azo atao, dia mifidiana faritany izay azo inoana kokoa fa hahitana olona vonona ny hiresaka momba ny foto-kevitra ara-baiboly. Izany dia hanampy ilay vaovao handray anjara amin’izany ka hahazo fatokian-tena avy amin’izany.
5 Mba hanohizana ilay fampiofanana atao miandalana, dia hitondra soa ny firesahana ny amin’ny fomba hanaovana fiverenana mitsidika any amin’izay nahitana fahalianana. Tafiditra amin’izany ny fametrahana ny fototra amin’ny fitsidihana voalohany, amin’ny fanolorana an’ilay tompon-trano fanontaniana iray hovaliana rehefa miverina ianareo. Ataovy azo antoka fa hanampy ilay mpitory tsy za-draharaha kokoa mba hanao fanomanana ianao, ary avy eo dia miaraha aminy ho any amin’ilay fitsidihana. Raha atomboka ny fampianarana ka mbola toa tsy dia matoky ny fahaizan’ny tenany ilay mpitory vaovao, ilay mpitory za-draharaha kokoa dia mety haniry hitarika ilay fampianarana aloha, mandra-pahain’ilay vaovao hanohy izany.
6 Noho ny fitanjozotran’ireo vaovao haingana ho ao amin’ny kongregasiona, dia manjary miharihary ho azy ny maha-fahendrena ny hanomezana fampianarana be dia be eo amin’ny asa fanompoana. Ilaina ny fanampiana avy amin’ireo izay efa nanatsara ireo fahaizany eo amin’ny asa fitoriana. Raha afaka manampy olona ianao, arakaraka ny fandehan’ny fotoana, dia “hahay mampianatra ny sasany kosa” izany olona izany. — 2 Tim. 2:2.