Aoka ianao hanao ny asa fanompoana amin’ny fanahinao rehetra
Fizarana faha-4: Milamina mba hanatanteraka ny fanompoantsika amin’ny fomba mandaitra
1 Mitaky fananana fandaharana manokana tsara ny fanompoana ampahibemaso atao amin’ny fanahy rehetra. Nanome môdely miavaka ho an’ny asa fanompoantsika amin’izao andro izao i Jesosy. (Lioka 10:1, 2; Asan’ny apostoly 1:8). Afaka maka fianarana avy amin’ny fomba nanatanterahan’ireo mpianany tamin’ny taonjato voalohany ny fanompoany koa isika. (Asan’ny apotsoly 5:42, MN; 2 Tim. 4:5, MN). Ahoana anefa no hahafahantsika hilamina tsara kokoa ka hahazo vokatra tsara toy izany amin’izao andro izao?
2 Manokàna fotoana ho an’ny asa fanompoana: Tsy lafin-javatra miseho sendrasendra sy tsindraindray eo amin’ny fiainantsika akory ny fanompoantsika. Tsy azo avela ho vokatry ny sendrasendra ny habetsahan’ny fotoana atokantsika ho an’ny fanatanterahana ny fanompoantsika. Mba handaminana ny fanompoantsika amin’ny fomba mandaitra, dia tsy maintsy manokana fotoana hanaovana ireo lafiny samihafa aminy isika. (Efes. 5:15, 16). Misy mpitory maro mahita fa manampy azy ny mametra zava-kendrena eo amin’ny isan’ny ora hatokany ho an’ny fanompoana isam-bolana. Izany mazàna dia mitaky ny fanamboarana ny asa aman-draharahany mba handraisana anjara amin’ny asa fanompoana isan-kerinandro. Tokony hanampy ireo zanany mba hanokana fotoana handraisana anjara tsy tapaka amin’ny lafiny samihafa amin’ny asa fanompoana ireo ray aman-dreny kristiana. — Deot. 6:7; Ohab. 22:6.
3 Aoka ianao hametra zava-kendrena misy heviny: Ny zava-kendrena mihevitra ny zava-misy dia hanome anao zavatra hiezahanao hotratrarina. Rehefa tratranao ny zava-kendrenao, dia hahatsapa fifaliana noho ny fahavitana zavatra ianao. (Ohab. 13:12). Nampirisika toy izao ny apostoly Paoly: “Na ahoana na ahoana, na hatraiza na hatraiza ny fandrosoana vitantsika, dia aoka isika hanohy handeha amim-pilaminana amin’izany fahazarana izany ihany.” (Fil. 3:16, MN). Toy ny amin’ny lafiny rehetra amin’ny fandrosoantsika ara-panahy, ny asa fanompoantsika koa dia tokony hanome porofon’ny fahazarana milamina.
4 Ohatra, moa ve ianao manana taratasy mivalona betsaka? Mihazona gazety vaovao ampy tsara ve ianao, ary tsara ve ny fisehoan’izy ireo ivelany? Mampiasa tsara ireo fandraisana an-tsoratra isan-trano ve ianao, amin’ny fampiasana iray amin’izany ho an’ny filazana ny fahalianana hita ary iray hafa ho an’ireo tsy tratra tao an-trano?
5 Alohan’ny hanaovanao ny fanompoana, dia makà fotoana mba hijerena indray ny foto-dresaka amin’ny volana. Fanteno ireo hevitra azo resahina ao amin’ireo zavatra vita an-tsoratra atolotra, ary aoka ianao ho vonona hampiasa azy ireny amin’ny fomba mandaitra mba hanairana fahalianana. Ary aoka koa ianao ho vonona hampiasa ilay boky natao ho an’ny asa fanompoana hoe Fomba fanjohian-kevitra. Na dia eo anelanelan’ny trano roa tsidihina aza, dia afaka mijery haingana ny sasany amin’ireo fanoloran-kevitra maro ao ianao. Ny fampiasana ireo hevitra azo ampiharina ireo dia hanatsara ny fandairan’ny fanompoanao.
6 Tombontsoa feno fitahiana ny fandraisana anjara feno amin’ny ‘fanompoam-pivavahana amin’ny fitoriana ny filazantsara’ mandritra izao andro farany izao. (Rom. 15:16). Tokony hiezaka mafy isika mba hanatanteraka ny fanompoantsika amin’ny fanolorana ny fanambarana tsara indrindra misy, dia ny “vokatry ny molotra”. (Heb. 13:15; ampitahao amin’ny Hosea 14:3 [14:2, MN].) Mba hanaovana izany, dia aoka isika hanokana fotoana mba handraisana anjara tsy tapaka amin’ny asa fanompoana ka hametra zava-kendrena tsy tafahoatra loatra izay hahatonga antsika hanatanteraka ny fanompoantsika ho fiderana an’i Jehovah.