Aoka ianao hanao ny asa fanompoana amin’ny fanahinao rehetra
Fizarana faha-5: Ireo soa tondraka entin’ny fanompoana atao amin’ny fanahy rehetra
1 Manome soa tondraka tsy misy fetrany an’ireo manompo azy amin’ny fanahiny rehetra i Jehovah. (Sal. 116:12). Amin’ny fomba ahoana no hahafahantsika hahazo fitahiana feno avy amin’i Jehovah eo amin’ny fanompoantsika? Soa inona avy no miandry antsika? Inona no tsy maintsy ataontsika mba hahazoantsika antoka fa hahazo fitia sy fankasitrahana avy aminy isika?
2 Takina ny fiezahan’ny tena manokana: Miankina be dia be amin’ny fiezahana ataon’ny tenanao manokana hanao ny sitrapon’Andriamanitra ireo soa ho azonao avy amin’Andriamanitra. Momba ny fanompoany, dia nanoratra toy izao i Paoly: “Samy handray izay valim-pitiany avy araka ny fisasarany [ny olona tsirairay].” (1 Kor. 3:8). Aoka àry isika handray anjara feno araka izay azontsika atao eo amin’ny fanompoana. Nahazo ny valisoa manokana hanampy olona maro, kongregasiona manontolo maro mihitsy aza, hahafantatra an’Andriamanitra, ny tenan’ny apostoly Paoly. Endrey ny fifaliana tsapany tamin’ny fahitana azy ireo niorina mafy tamin’ny finoana! (1 Tes. 2:19, 20). Azo inoana fa mety tsy hamela anao hanao ny fanompoana amin’ny fomba feno tahaka an’i Paoly ny toe-javatra misy anao. Kanefa, tsy fitahiana tondraka ve ny fanampiana olona iray na fianakaviana misy olona oharina amin’ny ondry mihitsy aza, hiorina mafy eo amin’ny lalana mankany amin’ny fiainana? Endrey izany antony mampahazoto hiasa mafy eo amin’ny fanompoana isan-trano sy hanohy izany amin’ny alalan’ny fiverenana mitsidika sy ny fampianarana Baiboly!
3 Soa fanampiny: Ny soa tsy hay tombanana iray azo avy amin’ny fanompoana atao amin’ny fanahy rehetra dia ny fanatonantsika akaiky kokoa an’i Jehovah sy Jesosy Kristy amin’ny maha-mpiara-miasa amin’izy ireo antsika. (Matio 11:29, 30; 1 Kor. 3:9). Endrey ny fifaliana rehefa mahatsapa ny fanahin’Andriamanitra manampy antsika eo amin’ny fanompoana isika! (Matio 10:20; Jaona 14:26, fanamarihana ambany pejy). Fanampin’izany, ny fiaraha-miasa amim-pahazotoana amin’ireo hafa ao amin’ny kongregasiona dia hanamafy ny fatoran’ny fitiavana sy ny firaisan-tsaina misy eo amintsika.
4 Tsy afaka ny hahazo soa feno avy amin’i Jehovah isika raha tsy manohana amin’ny fomba feno ny fandaminana ampiasainy mba hanatanterahana ny sitrapony amin’izao andro farany izao. (Ampitahao amin’ny 2 Mpanjaka 10:15.) Rehefa manaraka akaiky sy amin’ny fontsika rehetra ny fitarihana azontsika amin’ny alalan’ilay fitaovana ampiasain’Andriamanitra isika ka mandray anjara amim-paharisihana amin’ireo asan’ny kongregasiona, dia hahazo fiarovana ara-panahy amin’ireo tetika feno hafetsen-dratsin’i Satana. Ho afaka hahita vokatra betsaka kokoa eo amin’ny fanompoana isika.
5 Iny fitohitohizan-dahatsoratra dimy momba ny fanaovana ny asa fanompoana amin’ny fanahy rehetra iny dia nanasongadina lafin-javatra vitsivitsy tafiditra amin’izany. Tsaroanao ve hoe inona avy ireo fanalahidin’ny fambolena fankasitrahana an’i Jehovah, izay manosika olona iray hanao ny fanompoana amin’ny fanahiny rehetra? (Jolay). Nahoana no tena ilaina ny fiomanana mba hambolena hafanam-po eo amin’ny asa fanompoana? Amin’ny fomba ahoana no ahafahantsika miomana? (Aogositra). Ahoana no ahafahan’ireo mpitory za-draharaha manampy ny hafa mba hanao ny asa fanompoana amin’ny fanahiny rehetra? (Septambra). Amin’ny ahoana no ahafahan’ny fananana fandaharana manokana tsara manampy antsika hanao ny fanompoana amin’ny fanahintsika rehetra? (Oktobra). Mampihatra ireny fanoloran-kevitra ireny ve ianao?
6 Tian’i Jehovah handray soa isika amin’ny fankatoavana azy. (Isaia 48:17). Fanampin’izany, dia hiitatra amin’ireo izay mihaino anao koa ireo soa azonao avy amin’ny fanompoana ataonao amin’ny fanahinao rehetra. (1 Tim. 4:15, 16). Afaka mahazo antoka ianao fa raha manao ilay asa eo am-pelatananao amim-pahazotoana ianao, i Jehovah dia hahita izany ary ianao kosa dia ‘handray lova ho valiny’, izany hoe ny fiainana mandrakizay. — Kol. 3:23, 24.