Mihazòna tanjaka ara-panahy, mitoera ho madio ho amin’ny fanompoana an’i Jehovah
1 Ao amin’ny Isaia 60:22, i Jehovah dia manome fampanantenana iray izay hitantsika tanteraka eo ambanin’ny masontsika: “Ny kely ho tonga arivo, ary ny malemy ho tonga firenena mahery; Izaho Jehovah no hanafaingana izany amin’ny fotoany.” Rehefa mieritreritra ny amin’ny hoe firenena isika, dia mahita sarin’antokon’olona be dia be izay tafakambana noho ny zava-mahaliana iombonana ary manao zavatra eo ambany fahefan’ny fitondram-panjakana voaorina iray.
2 Ny filazana asa tamin’ny 1991 dia nampiseho tampon’isa tamin’ny mpitory ny vaovao tsara 4 278 820 naneran-tany, izany hoe fitomboana 6, 5 isan-jato raha oharina amin’ny tamin’ny taona teo aloha. Tena nahangona vahoaka sesehena marina i Jehovah, vahoaka voaforon’olona tso-po izay maniry ny hisaraka amin’ity fandehan-javatra mampahory ity ka ho tonga olom-pehezina mahatokin’ilay fitondram-panjakan’ny Fanjakana mesianikan’i Jesosy Kristy Zanany. Isan-taona dia mitohy mitombo ny isan’ireo angonina. Faly isika fa anisan’io firenena io izay azo lazalazaina ara-bakiteny ho fitambaran’olona ao amin’ny tontolo vaovao iray. Tamin’ny fankalazana ny Fahatsiarovana tamin’ny 1991, dia nisy 10 650 158 ny totalin’isan’ny mpanatrika, izany hoe fitomboana 7 isan-jato raha oharina amin’ny tamin’ny 1990. Izany dia mampiseho fahafahana goavana ho amin’ny fisian’ny olona betsaka kokoa ihany hiaraka amintsika ho olom-pehezin’ilay Fanjakana.
3 Takatsika, mazava ho azy, fa tsy ireo olona rehetra tafiditra amin’io isan’ny mpanatrika ny Fahatsiarovana io no nisaraka tamin’ity tontolo ity ka ho azo ekena ho anisan’ny vahoakan’i Jehovah amin’ny fomba feno. Misy olona avy amin’ny firenena rehetra ‘mitanjozotra ho any an-tranon’i Jehovah’, kanefa mila ny ‘hampianarina ny amin’ny lalany’ amin’ny fomba feno izy ireny mba hahafahany ‘handeha amin’ny atorony’. (Isaia 2:2-4). Maherin’ny efatra tapitrisa ireo nanatrika ny Fahatsiarovana ka nanaiky ny fampianaran’Andriamanitra, ary nahazo tanjaka ara-panahy izay nanosika azy ireo hihazona fitondrantena madio sy hahafeno fepetra mba handraisana anjara amin’ny asa fitoriana ilay Fanjakana izay eo am-panatanterahana azy ankehitriny. (Matio 24:14). Mitana toerana ankasitrahana eo imason’i Jehovah ireo olona ireo ary mandray soa avy amin’ireo fandaharana mahatalanjona rehetra omeny. Inona no tsy maintsy ataon’ireo maherin’ny enina tapitrisa tavela raha tiany ny ho tonga matanjaka sy madio ara-panahy ho amin’ny fanompoana an’i Jehovah toy izany koa?
4 Tsy maintsy ‘miezaka mafy hiaro ny finoana’ izy ireo. (Joda 3). Raha vantany vao mifidy ny handeha amin’ny atoron’i Jehovah izy ireo, dia tonga eo ambany faneren’ny Devoly izay mitondra fisedrana, fakam-panahy ary fitaoman-dratsy ho azy. Toa an’i Paoly, dia tsy maintsy mitodika any amin’i Jehovah izy ireo mba hahazoana tanjaka hiaretana izany. (Fil. 4:13). Manome hery ny olona toy izany i Jehovah amin’ny alalan’ireo izay efa tonga matanjaka ao amin’ny finoana. Nananatra i Paoly fa “isika izay matanjaka dia tokony hitondra ny fahalemen’ny malemy”. (Rom. 15:1, 2). Rehefa manjary tafaray ny matanjaka sy ny malemy, dia misy hery hahafahana hiorina mafy. “Tsara ny roa noho ny iray; (...) Raha misy maharesy ny irery aza, ny roa tsy ho leony tsy akory.” (Mpit. 4:9, 12).
5 Izany dia midika fa miankina amintsika ara-drariny ireo vaovao mba hahazoana tanjaka avy amin’i Jehovah. Tsy maintsy mitoetra ho matanjaka ara-panahy ny tenantsika, izay Kristiana nanolo-tena, raha tiantsika ny hanampy ireo vaovao. Ireo Kristiana izay matanjaka dia afaka ‘mizara fanomezana ara-panahy’, izay hiteraka ‘fifampaherezana’. (Rom. 1:11, 12, NW). Izany no iray amin’ireo fomba lehibe indrindra ampiasain’i Jehovah mba hampiraisana antsika sy hanaovana izay hahatonga antsika rehetra ‘hiorina mafy sy hatanjaka’. — 1 Pet. 5:9-11, NW.
6 Tokony hataontsika ho zava-kendrentsika ny hanampy ireny vaovao ireny sady hahatsiaro mandrakariva fa ny tenantsika koa dia mila zavatra ara-panahy. (Matio 5:3, NW). Ny fahasalamana ara-panahy no fanalahidin’ny tanjaka ananantsika. Izy io dia toetra iray izay tsy maintsy kolokoloina sy hatanjahina amin’ny fandraisana sakafo ara-panahy tsy tapaka. Amin’ny alalan’ny fandaminany, i Jehovah dia manome fandaharana voalanjalanja tsara ho amin’ny fianarana ny Teniny. Manana anjara asa tena lehibe mba hahatonga antsika ho matanjaka ireo fivorian’ny kongregasiona dimy isan-kerinandro, izay ‘mandrisika antsika ho amin’ny fitiavana sy ny asa tsara’. — Heb. 10:24, NW.
7 Hitombo ny soa azo avy amin’ireo fivoriana ireo rehefa ampiarahintsika amin’ny fahazarana tsara manao fianarana manokana sy fianaram-pianakaviana. Fara fahakeliny dia tokony hokendrentsika rehetra ny famakiana sy fandinihana ny teny natao hovakina isan’andro, ny fanarahana ny fandaharana famakiana Baiboly voasoritra ao amin’ny Fandaharana ho amin’ny Sekolin’ny Fanompoana Teokratika, ary ny fanomanana ny Fianarana ny bokin’ny kongregasiona sy ny Fianarana Ny Tilikambo Fiambenana. Ny fianakaviana tsirairay no tsy maintsy mamantatra ny fomba handaminany izany, ka hanao izay hahazoana antoka ny fanaovana izany amin’ny fomba tsy tapaka. Fanampin’izany, ny raim-pianakaviana dia tokony hitandrina mba hifanentana tsara amin’izay zavatra voafaritra tsara ilain’ny fianakaviany ny fandaharam-pianaran’izy ireo. Amin’izany fomba izany, dia ‘ho voaorina ilay ankohonana ary hiorina mafy’. (Ohab. 24:3, NW). Raha malina tsara isika eo amin’ny fahazarantsika mianatra isam-batan’olona sy amin’ny maha-fianakaviana, dia afaka matoky fa hitahy antsika i Jehovah ary hanampy antsika hiaritra ireo fisedrana samihafa amim-pahombiazana ny fanahiny. — Jak. 1:2, 3; 1 Pet. 4:11.
8 Aoka isika hitoetra ho madio sy tsy hisy hokianina: Manasa antsika amin-kafanam-po mba hanatona akaiky azy i Jehovah, no sady manazava tsara koa fa izany dia tsy maintsy atao mifototra amin’ny fanehoantsika finoana ny ra nalatsak’i Jesosy, izay “manadio antsika ho afaka amin’ny ota rehetra”. (1 Jaona 1:7; jereo koa Hebreo 9:14.) Afaka manohy manatanjaka ny finoantsika isika amin’ny alalan’ny fianarana manokana ny Tenin’Andriamanitra sy amin’ny fampiharana izay ianarantsika. Misy resy atỳ aoriana satria, na tsy mandray sakafo ara-panahy izy ireo, na tsy manao ezaka firy mba hampihatra izany eo amin’ny fiainany. Izany dia mahatonga azy ireo ho mora voan’ireo famelezan’i Satana. Nisy nanjary nalemy ara-panahy ka lasa tsy niasa. Mampalahelo fa ny hafa dia namela ny tenany ho latsaka tao anatin’ny fahotana lehibe, ka nanjary voaroaka. Nampitandrina toy izao i Paoly: “Izay manao azy fa efa mijoro tsara, dia aoka izy hitandrina, fandrao ho lavo.” (1 Kor. 10:12). Raha minia manao tsirambina ny fianarana, ny fanatrehana ireo fivoriana ary ny fanompoana isika, dia mety ho voafandrik’ireo fitaomana maloto sy fakam-panahy. — Heb. 2:1; 2 Pet. 2:20-22.
9 Tena ilaina ny hitoerantsika ho madio amin’ny lafiny rehetra: ara-batana, ara-tsaina, ara-panahy ary ara-pitondrantena. (2 Kor. 7:1). Mihasimba sy mihalo ara-pitondrantena isan’andro ny tontolo manodidina antsika. Tsy mitsahatra mamorona fomba mamitaka kokoa hatrany foana mba hamandrihana antsika, ny Devoly. Ny fitoerantsika ho matanjaka ara-panahy dia manome antoka fa ‘fantatsika ny hafetseny ka tsy ho resin’ny fitany’ isika. (2 Kor. 2:11). Ny fampianarana sy torohevitra azontsika avy amin’ny fandaminan’i Jehovah dia mahatonga antsika hahafantatra ary hanohitra ireo fitaomana ratsy.
10 Ireo mitarika ao amin’ny kongregasiona dia manana andraikitra hanome ohatra tsara ho an’ny hafa raha ny amin’ny fitoerana ho matanjaka sy madio. Nanantitrantitra ny amin’io andraikitra io i Paoly rehefa nanambara hoe: “Tsarovy ny mpitondra anareo, (...) Hevero ny niafaran’ny fiainany, ka araho ny finoany.” (Heb. 13:7). Tena zava-dehibe ny haha-fakan-tahaka ireo loholona sy mpikarakara momba ny asa voatendry, eo amin’ny fitondrantenany manokana ary koa eo amin’ny fanatontosany ireo andraikiny amin’ny maha-loham-pianakaviana azy ireo. Tokony hiezaka mafy izy ireo mba ho tahaka an’i Timoty tanora, izay nampirisihina mba “ho tonga fianarana (...) amin’ny fiteny, amin’ny fitondrantena, amin’ny fitiavana, amin’ny finoana, amin’ny fahadiovana.” (1 Tim. 4:12; 1 Pet. 5:3). Ny hafa rehetra amintsika koa dia manana io andraikitra ho ohatra tsara io amin’ny fihazonana fitondrantena mendri-kaja. Mitsara ny fahamarinana, ary koa ny fandaminan’i Jehovah, araka izay hitany eo amintsika, ireo vaovao. Tiantsika ny hanao izay hahazoana antoka fa izay hitany dia mampirisika azy ireo handray ny toerany ao anatin’ny fandaminana madion’i Jehovah.
11 Mihafaingana sy mihamahery ny asa fanangonana ireo ho tafita velona amin’ny “fahoriana lehibe”. (Apok. 7:14). Ireo izay tonga matanjaka ara-panahy sy mitoetra ho madio ihany no ho tafita velona amin’ny farany. Miankina be dia be amin’ireto lafin-javatra ireto izany: 1) fihazonana fahazarana tsara ho amin’ny fianarana manokana sy fisaintsainana momba ny Tenin’Andriamanitra; 2) fifanehoana fiheverana manokana amim-pahatsorana noho ny faniriana hizara fampaherezana; ary 3) fiaraha-miasa amim-piraisan-tsaina mba hihazonana fitondrantena madio izay hanome voninahitra ny anaran’i Jehovah. Ny fanaovantsika ireo zavatra ireo dia hanome antoka antsika ny amin’ny fitahiana sy fiarovana avy amin’i Jehovah rehefa mifarana ity tontolo ity. Afaka matoky isika fa ho anisan’ireo ‘marina arovan’i Jehovah’. — Sal. 31:23.