Handray anjara amin’ny fanaovana fanambarana tsy ara-potoana ve ianao amin’izao fotoam-pialan-tsasatra izao?
1 Tafiditra amin’ny fiainantsika mahazatra ireo fe-potoana voafaritra tsara hiresahana momba an’i Jehovah amin’ny olona. Manokana fotoana isika mba hanaovana fanambarana ara-potoana isan-trano sy fiverenana mitsidika ary fampianarana Baiboly. Misy fahafahana maro hafa tsy ara-potoana anefa izay azontsika iresahana momba ny fahamarinana amin’ny olona. Izany fitoriana izany no antsointsika hoe fanambarana tsy ara-potoana.
2 Ny mpitory sasantsasany dia mahita fahafahana maro handraisana anjara amin’io endriky ny fanompoana io. Isika rehetra dia afaka miezaka mba ho mailaka hahita ireny fahafahana ireny amin’izao fotoam-pialan-tsasatra izao rehefa mankany amin’ny fivoriambe na miverina avy any, rehefa eny am-pakan-drivotra, ary rehefa mitsidika havana. Hanararaotra ireo fahafahana hanao fanambarana tsy ara-potoana ve ianao mandritra izao fotoana izao?
3 Manaova volavolan-kevitra mialoha: Ny fiomanana sy ny fisaintsainana mialoha dia hahatonga antsika ho afaka hanao fanambarana tsy ara-potoana amin’ny fomba mandaitra. Amin’io lafiny io, dia tsara fitaovana isika manana ireo zavatra vita an-tsoratra isan-karazany izay manampy antsika hahavita izany. Ankoatra Ny Tilikambo Fiambenana sy ny Mifohaza!, isika dia manana taratasy mivalona maromaro izay mitondra lohateny manintona mba hanairana ny fahalianana. Ao ireo bokikely izay mahasarika olona avy amin’ny fiaviana sy ny fivavahana samihafa. Manana boky fanao am-paosy izay miresaka foto-kevitra mahaliana amin’izao fotoana izao koa isika. Boky inona no manavanana anao ny mampiasa azy? Diniho amin’ny resaka ataon’ny fianakaviana izany. Avy eo, dia manaova fanazaran-tena momba izay holazainao, rehefa misy fahafahana ho amin’izany.
4 Rehefa eny am-pialan-tsasatra: Ny fotoana tsara dia tsara hanaovana fanambarana tsy ara-potoana dia rehefa eny am-pialan-tsasatra. Mikasa ny hanao dia amin’ny fiaramanidina na fiarandalamby na fiarambahoaka ve ianao? Ento miaraka aminao àry ny Baiboly sy ny iray amin’ireo zavatra vita an-tsoratra voaresaka etsy ambony. Ny famakiana zavatra vita an-tsoratra toy ireny eny amin’ny fitateram-bahoaka dia matetika mampirisika ny resadresaka. Raha mandeha fiarakodia na taxi-brousse ianao, dia eritrereto ny amin’izay ho azonao lazaina rehefa mijanona amin’ny toerana fakan-dasantsy na amin’ny hôtely fisakafoana na rehefa mipetraka amin’ny hôtely fandriam-bahiny ianao. Amin’ny toe-javatra toy ireny, dia afaka mametraka taratasy mivalona sasantsasany amin’ny toerana mora handraisana azy ianao mba homena an’ireo olona liana. Raha mijanona amin’ny toerana iray mahafinaritra ny maso ianao dia angamba ho afaka hanomboka hanao fanambarana amin’ny fanontaniana olona iray toy izao: “Tsy hahafinaritra ve raha tahaka izao ny tany iray manontolo?”. Raha eny amin’ny torapasika na saha fitsangantsanganana kanto ianao, dia afaka mampiasa fampidiran-dresaka mitovy amin’izany.
5 Any amin’ny Fivoriamben’ny Distrika: Afaka mahita fahafahana hanao fanambarana tsy ara-potoana koa isika any amin’ny fivoriamben’ny distrika. Maro no nahita fahombiazana tamin’ny firesahana tamin’ireo mpiasan’ny hôtely fandriam-bahiny, na tamin’ny olona teny an-dalana na teny amin’ny fiandrasana fiarambahoaka. Ataovy azo antoka fa manao insigne ianao mandritra ny fivoriambe. Mety ho mpankany amin’ireo hôtely fisakafoana sy magazay eo an-toerana ianao, ka angamba hanontany anao ny olona hoe inona no asehon’ny insigne anaovanao. Izany dia mety hitarika ho amin’ny fanaovana fanambarana tsara dia tsara.
6 Ireo volana fialan-tsasatra dia mety hanolotra ho antsika famelombelomana sy fakan-tsasatra, nefa aoka isika tsy hanao tsirambina ireo fahafahana ananantsika hanao fanambarana tsy ara-potoana. Izany fomba fitory izany dia ahitam-bokatra, ary ireo mpanompon’i Jehovah dia tokony handray anjara amin’izy io. Toy ny tamin’i Jesosy, dia aoka ny fitiavantsika ireo mpiara-belona amintsika hanosika antsika hiresaka isaky ny fahafahana mety rehetra! — Matio 5:14-16.