Fiaraha-miasa Amin’ny Mpitarika Fianarana ny Bokin’ny Kongregasiona Misy Antsika
1 Mandray anjara lehibe tokoa amin’ny fitomboan’ny fahaizantsika amin’ny maha-minisitry ny vaovao tsara antsika, ny Fianarana ny Bokin’ny Kongregasiona. Niniana nohazonina ho kely ny antokon’olona mba hisian’ny rivo-piainana mafana toy ny an’ny fianakaviana, ho amin’ny fianarana ny Baiboly sy ny iray amin’ireo zavatra vita an-tsoratra navoakan’ny Fikambanana. Ireny antokon’olom-bitsy ireny koa dia manolotra fahafahana tsara indrindra hampiofanana antsika hahazo vokatra tsara kokoa eny amin’ny asa fanompoana. Amin’ny alalan’ny fandaharan’ny fianarana ny boky no azon’ny isam-batan’olona andraisana mora foana fampirisihana sy fiheverana manokana. Amin’ny ahoana no azontsika iaraha-miasa amin’ny mpitarika fianarana ny boky amin’ny fomba feno ary andraisan-tsoa avy amin’io fandaharana tsara dia tsara io?
2 Fandraisana anjara amin-jotom-po amin’ny asa fanompoana: Iray amin’ireo andraikitra lehibe indrindra iantsorohan’ny mpitarika fianarana ny boky dia ny fanampiana ny mpikambana tsirairay ao amin’ilay antokon’olona mba handray anjara amin-jotom-po amin’ny fanompoana. Amin’io lafiny io, dia mampahatsiahy antsika ny boky Voalamina ao amin’ny pejy faha-44 fa ‘ny fandraisana anjara tsy tapaka, amin-jotom-po sy hafanam-po amin’io asa io dia ho hita taratra eo amin’ny mpitory hafa’. Indraindray dia hiara-miasa eny amin’ny fanompoana amin’ny anisan’ny fianakaviany ny mpitarika ny fianarana ny boky, nefa ho faly koa izy hiaraka amin’ny hafa amin’ny endriny samihafa amin’ny fanompoana, araka ny amelan’ny toe-javatra azy. Azonao atao ve ny manohana tsy tapaka ireo fivoriana ho amin’ny asa fanompoana? Ny fanaovanao izany dia hankasitrahan’ny mpitarika fianarana ny boky misy anao sy ny mpitory hafa tokoa.
3 Ireo fivoriana ho amin’ny asa fanompoana dia alamina any amin’ny toerana mety, mba hahafahan’ny rehetra handray anjara amin-jotom-po amin’ny asa fitoriana. Rehefa mihevitra ireo toe-javatra eo an-toerana ny antokon’olona tsirairay, dia haniry hanomboka aloha eny amin’ny fanompoana. Mpitory sy mpisava lalana maro no mahita fahombiazana tsara dia tsara rehefa manohy eny amin’ny fanompoana aorian’ny mitataovovonana amin’ny faran’ny herinandro.
4 Maniry hahazo fanampiana amin’ny endriny sasany amin’ny fanompoana ve ianao? Angamba ny mpitarika fianarana ny boky misy anao ho afaka hanao fandaminana mba hisian’ny mpitory mahay iray ao amin’ny antokon’olona hiara-miasa aminao. Amin’ny faran’ny volana, dia ataovy azo antoka fa ho namerina ny filazana asanao tsy misy hataka andro ianao. Ny mpitarika fianarana ny boky sy ny mpitantsoratra dia samy hankasitraka ny fiaraha-miasanao amin’io lafiny lehibe io koa. — Ampitahao amin’ny Lioka 16:10.
5 Rehefa mitsidika ny antokon’olona ny mpiandraikitra ny asa: Mitsidika antokom-pianarana ny boky iray isam-bolana mazàna ny mpiandraikitra ny asa mba hampirisika ny fandraisana anjara bebe kokoa sy ahitam-bokatra kokoa amin’ny asa fanompoana. Manehoa fitandremana tsara amin’ny lahateny 15 minitra izay ataony amin’ny faran’ny fianarana ny boky, satria izany dia hanolorana torohevitra voafaritra natao hanampy ilay antokon’olona mba hihatsara amin’ny endriny samihafa amin’ny asa fitoriana. Maniry hiara-miasa amin’ny mpikambana samy hafa ao amin’ilay fianarana ny boky koa ny mpiandraikitra ny asa amin’ny faran’ny herinandro. Hararaoty izany fandaharana manokana izany mba hahafahanao handray soa avy amin’ny zavatra hitany sy ny fahaizany eny amin’ny fanompoana.
6 Ny fiaraha-miasa asehontsika manokana sy ny fahavononantsika hanampy ireo izay tsy ampy fanandraman-javatra dia hahatonga ny fiforonan’ny rivo-piainana mafana sy feno fisakaizana any amin’ny Fianarana ny Bokin’ny Kongregasiona, raha mbola ‘manao soa amin’ny olona rehetra isika, indrindra fa amin’ny mpianakavin’ny finoana’. — Gal. 6:10.