Tano Mafy Tsy Misy Fihozongozonana ny Fanambarana Ampahibemaso ny Fanantenanao
1 Ny Fianarana Ny Tilikambo Fiambenana no fomba voalohany indrindra anomezana ny “hanina [ara-panahy] amin’ny fotoana mety” ho an’ny vahoakan’Andriamanitra amin’izao andro izao. (Matio 24:45, NW ). Manatrika io fivoriana manan-danja io isika noho ireto zava-kendrena roa lehibe ireto: Mba hiorina ara-panahy sy mba hanao fanambarana ampahibemaso ny fanantenantsika amin’ny hafa. — Heb. 10:23-25, NW.
2 Fanaovana izay handraisantsika soa: Notombanana fa any amin’ny ankamaroan’ireo kongregasiona, dia ny ampahatelon’ny mpanatrika monja no mianatra ny lesona mialoha. Sahabo ho toy izany koa no mandray anjara amin’ny valin-teny. Ny ventin-kanina ara-panahy aroso ao amin’ny Fianarana Ny Tilikambo Fiambenana dia tsy ary ho voaray amin’ny fomba feno mandritra ilay fivoriana fotsiny. Ilainao ny manokana fotoana hianarana mialoha ireo fanazavana.
3 Rehefa miomana ho amin’ny fianarana ianao, dia mety hahita fa manampy ny famakiana sy ny fieritreretana an’ireo fanontaniana ao anatin’ilay faritra voafefy manakaiky ny faran’ilay lahatsoratra, voalohany indrindra. Izany dia afaka manampy amin’ny fampifantohana ny sainao amin’ireo hevi-dehibe tokony hodinihina ao anatin’ilay lesona.
4 Mandritra ilay fianarana, dia henoy amim-pitandremana izay lazaina. Atodiho ny saina ho amin’ireo fanamarihana ho fanokafana ataon’ilay mpitarika; izany fanazavana izany dia fiomanana ho amin’ilay fianarana. Mety hampipoitra fanontaniana telo na efatra hovaliana, ilay mpitarika. Na koa mety hamerina hevi-dehibe sasany avy tamin’ny lesona tamin’ny herinandro lasa izy, raha toa ny lesona amin’io herinandro io ka tohin’ilay foto-kevitra tamin’ny herinandro lasa ihany. Raha misy fanitsiana sasany ilaina eo amin’ny fahatakarantsika ny faminanian’ny Baiboly iray na ny fotopoto-pitsipika araka ny Soratra Masina iray, dia hampitodika ny saintsika ho amin’izany izy. Mazava ho azy fa tsy maintsy fohy ny fanazavana omen’ny mpitarika, satria anisan’ny zava-kendren’ny fianarana ny hanome ho an’ny kongregasiona fahafahana hilaza ny fanantenany. Mihainoa amim-pitandremana rehefa manome fanazavana ny amin’izay nianarany ny hafa; izany dia afaka manampy hanatanjaka ny finoanao.
5 Ambarao ny fanantenanao: Moa ve ianao manome valin-teny tsy tapaka mandritra ny fianarana? Tsara kokoa ny fanamarihana fohy sady hentitra. (Ampitahao amin’ny Lioka 21:1-4.) Ankasitrahan’ny rehetra ny valin-teny tsotra avy amin’ny fo. Mazàna ny valim-panontaniana voalohany dia tokony ho fohy sy mivantana. Izany dia mamela ny hafa hanonona andinin-teny na hanintona ny saina ho amin’ny tsipirian-javatra ao amin’ilay fehintsoratra. Amin’izany fomba izany, dia maro no afaka manao fanambarana ampahibemaso ny fanantenany. Tokony hanorina sy hampahery mandrakariva ireo valin-teny.
6 Raha vao manomboka manatrika ny fianarana ianao na matahotra ny hamaly, dia mety hirinao ny hangataka fanampiana amin’ilay mpitarika. Angataho izy mba hijery ny tananao mitsangana rehefa dinihina ny fehintsoratra iray manokana. Angamba ianao ho afaka hanolo-tena hamaky andinin-teny voatonona sy hanao fampiharana fohy ny amin’izay hevitr’izany. Mety hanisy naoty vitsivitsy eny amin’ny sisim-pejy ianao mba hanampy anao hitadidy izay tianao holazaina rehefa mamaly ianao. Raha tanora ianao, dia tadidio fa raisina tsara sy ankasitrahana ny valin-teninao. — Matio 21:16.
7 Tena zava-dehibe ny hanehoantsika ny finoantsika, ary ny Fianarana Ny Tilikambo Fiambenana dia manome fahafahana tsara dia tsara hanao izany. Raha misalasala ny hamaly ianao, dia ataovy izay azonao atao mba handresena ilay zava-manahirana, ary ataovy izay hanomezanao valin-teny indray mandeha fara fahakeliny. Ho efa mba nandray anjara tamin’ilay fivoriana ianao amin’izay, ary ho afa-po kokoa noho izany. Koa nahoana àry no tsy manapa-kevitra ny hanome valin-teny indray mandeha fara fahakeliny amin’izao Fianarana Ny Tilikambo Fiambenana manaraka izao? — Ohab. 15:23.