Mpiandraikitra Mitari-dalana — Ny Mpitarika ny Fianarana Ny Tilikambo Fiambenana
1 Ny Tilikambo Fiambenana Manambara ny Fanjakan’i Jehovah no fitaovana lehibe indrindra ampiasain’ny “mpanompo mahatoky sy malina”, mba hanomezana sakafo ara-panahy ho antsika “amin’ny fotoana mety”. (Matio 24:45, NW ). Noho izy mpampianatra mahay izay manome ohatra tsara dia tsara eo amin’ny fomba fiaina kristianina, dia manana andraikitra lehibe ny loholona mitarika ny Fianarana Ny Tilikambo Fiambenana. — Rom. 12:7; Jak. 3:1.
2 Mba hampianarana amin’ny fomba mandaitra, dia tsy maintsy tena manao ezaka eo amin’ny fanomanana isan-kerinandro, ilay mpitarika ny Fianarana Ny Tilikambo Fiambenana. Mivavaka izy rehefa manao izany, ary ataony amim-pitandremana ny fanomanany. Hita taratra eo amin’ny tena fiezahany mafy hanohina ny fontsika amin’ilay lahatsoratra ianarana, ny fiahiany fatratra ny kôngregasiôna. Mifantoka amin’ireo hevi-dehibe ao amin’ilay fianarana izy, ary manampy antsika hahita ny fomba ifandraisan’izy ireny amin’ny foto-kevitr’ilay lahatsoratra.
3 Ny fanomanana ny anjarany amin’ny fomba feno, dia mahafaoka ny fijerena mialoha ireo andinin-teny mba hahafantarana ny fomba hampiharana azy ireo. Manasongadina ny Tenin’Andriamanitra hatrany izy, amin’ny fampirisihana ny kôngregasiôna mba hampiasa tsara ny Baiboly mandritra ilay fianarana. Rehefa tsy voazava tao amin’ny valin-teny nomen’ny kôngregasiôna ny hevitra lehibe iray, na tsy voalaza ny fampiharana ny andinin-teny fototra iray, dia mametraka fanontaniana fanampiny voafaritra tsara izy mba hamoahana ilay fanazavana. Amin’izany fomba izany no anampiany antsika ho tonga amin’ny fanatsoahan-kevitra marina, sy hahafantatra ny fomba hampiharana izay ianarantsika eo amin’ny fiainantsika.
4 Milofo hanatsara tsikelikely ny fahaizany mampianatra ny mpitarika ny Fianarana Ny Tilikambo Fiambenana. Tsy miteny be loatra izy, fa mampirisika antsika kosa mba hanome valin-teny — amin’ny fitenintsika manokana sy fohy ary mifandray tsara amin’ilay fianarana. Mety hampahatsiahy antsika tsindraindray izy, fa ny olona manome valin-teny voalohany eo amin’ny fehintsoratra iray dia tokony hanome valin-teny fohy sy hamaly mivantana ilay fanontaniana vita pirinty. Ny valin-teny fanampiny omen’ny mpanatrika dia mety hanintona ny saina ho amin’ny fampiharana ny andinin-teny, ny fanaporofoan-kevitra manohana ny hevi-dehibe, na ny fomba tena azo ampiharana ilay fianarana. Miezaka handrisika ny rehetra haniry handray anjara ny mpitarika ny Fianarana Ny Tilikambo Fiambenana, amin’ny fampirisihana ny hanaovana fanomanana manokana na miaraka amin’ny fianakaviana.
5 Mankasitraka ireo ‘lehilahy natolotra ho fanomezana’, toy ny mpitarika ny Fianarana Ny Tilikambo Fiambenana, izay ‘mikely aina amin’ny fampianarana’, isika izay ‘ampianarin’i Jehovah’. — Isaia 54:13; Efes. 4:8, 11, NW; 1 Tim. 5:17.