Mamatsy Fitaovana Antsika ho Amin’ny Asa Tsara Rehetra ny Fivoriana Momba ny Asa
1 Ny zava-kendren’ny Fivoriana Momba ny Asa dia ny hanosika antsika sy hamatsy fitaovana antsika mba handray anjara amin’ny fomba feno kokoa amin’ny asa fitoriana sy fanaovana mpianatra. (2 Tim. 3:17, NW). Kanefa, raha tsy miomana araka ny mety ho amin’ilay fivoriana isika na tsy mampihatra izay ianarantsika, dia ho faran’izay kely ny soa ho azo.
2 Ny fiomanana mialoha dia hanampy anao handray amin’ny fomba feno kokoa ny fampianarana. Jereo indray ireo zavatra vita an-tsoratra hampiasaina, ary ento any am-pivoriana izy ireny mba hahafahanao hanaraka sy handray anjara. Aoka ianao ho mpihaino mifantoka tsara, ary mandraisa naoty mba hampiasainao atỳ aoriana.
3 Ny mpiandraikitra prezidà dia mamerina mandinika amim-pitandremana ny tapany amin’ny fivoriana efa voalahatra. Loholona sy mpikarakara momba ny asa mahay sy mahafeno fepetra no tendrena hanomana azy ireny. (omMG p. 70). Ireo kongregasiona tsy manana afa-tsy loholona sy mpikarakara momba ny asa vitsivitsy dia mety hanendry rahalahy mahafeno fepetra hafa hanampy azy ireo. (kmF 4/77, Fanontanian’ny Mpamaky). Ny mpandahateny tsirairay dia tokony hiomana amin’ny fomba feno, hanaraka akaiky ny fitarihana omena, ary hanao izay hahazoana antoka fa tsy mihoatra ny fotoana izy.
4 Mazàna ny fivoriana dia manomboka amin’ny fampandrenesana. Ilay rahalahy voatendry dia tokony hanatona mialoha ny mpiandraikitra prezidà mba hahitana izay raharaha ilaina homarihina. Izany raharaha izany dia mety hahafaoka taratasy avy amin’ny Fikambanana na fampahatsiahivana momba ireo fandaharana amin’ny asa fanompoana na filazana asa fanao isam-bolana. Mety hahafantatra isika fa misy marary mila ny hotsidihina na koa handre tsipiriany momba ireo asan’ny kongregasiona nomanina ho amin’ny hoavy. Mihainoa tsara mba hahazo fanazavana sy ho vonona hanao ny anjaranao.
5 Rehefa misy tapany amin’ilay fivoriana mitaky ny fandraisana anjara avy amin’ny mpanatrika, dia miomàna amin’ny famakiana ilay lahatsoratra ary jereo ireo andinin-teny. Eritrereto ny fomba kasainao hampiharana ireo fanipazan-kevitra sy ny hoe karazana valin-teny inona no ho azonao omena mba hampaherezana ny hafa. Azonao atao ny mampiseho ny vidiny azo ampiharina ananan’ilay fampianarana amin’ny fitantarana fanandraman-javatra fohy.
6 Rehefa misy fampisehoana, dia miezaha maka sary an-tsaina ny tenanao ao anatin’ny toe-javatra mitovy amin’izany, ary eritrereto ny amin’izay ho nolazainao. Mariho ireo fanaporofoan-kevitra ampiasaina sy ny fizotran’ny fanjohian-kevitra. Iezaho tadidina izay nolazainao tamin’ny fotoana farany naha-tao anatin’izany karazana toe-javatra izany anao, ary diniho hoe amin’ny ahoana ireo votoatin-kevitra naseho no afaka manampy anao hahazo vokatra tsara kokoa amin’ny hoavy.
7 Ireo mpandray anjara amin’ny fampisehoana sy fanadinadinana dia tokony hanao famerenana tsara mialoha. Tokony samy hahalala izay holazainy sy izay heverina hataony eny amin’ny lampihazo ny tsirairay. Mazàna ny anjara tsy nanaovana famerenana no tsy manosika hanao zavatra na tsy mampahery ny mpihaino. Ny mpandray anjara sasany dia miomana mba hamerina ny anjarany amin’ny fifaranan’ny Fianarana Ny Tilikambo Fiambenana, mba hahafahany hanao fanazaran-tena eny amin’ny lampihazo sy hamela ireo rahalahy mikarakara ny fanamafisam-peo hahafantatra izay hilaina.
8 Indraindray ny fandaharana dia hahafaoka lahateny iray mahakasika zavatra iray voafaritra ilain’ny kongregasiona na lahatsoratra iray amin’ny fotoana ilana azy ao amin’ny Ny Tilikambo Fiambenana. Mihainoa tsara, raiso am-po ny torohevitra, ary miezaha hampihatra izany.
9 Tiantsika ny ho “voaomana ho amin’ny asa tsara rehetra”. (2 Tim. 2:21, NW). Ny Fivoriana Momba ny Asa dia iray amin’ireo fandaharana ataon’i Jehovah hanampiana antsika hanao izany. Ny fanatrehana amim-pahatokiana sy ny fiezahana amim-pahatsorana hampiasa izay ianarantsika dia azo antoka fa hanampy antsika mba hahafahantsika ‘hanatanteraka amin’ny fomba feno ny fanompoantsika’. — 2 Tim. 4:5, NW.