Omano Tsara ny Fivoriana Momba ny Fanompoana
1. Inona no tanjon’ny Fivoriana Momba ny Fanompoana, ary ahoana no handraisan-tsoa amin’izy io?
1 Natao hampiofanana antsika hahita vokatra ny Fivoriana Momba ny Fanompoana. Resahina matetika amin’izy io ny fitoriana ny vaovao tsaran’ilay Fanjakana, ny fanaovana mpianatra, ary ny fanambarana fa hampiharina tsy ho ela ny didim-pitsaran’Andriamanitra. (Mat. 28:19, 20; Mar. 13:10; 2 Pet. 3:7) Tena ilaina àry io fivoriana io, ary mandray soa isika raha miomana tsara sy vonona hanome valin-teny.
2. Ahoana no hanomanana ny anjara misy lahateny?
2 Lahateny: Matetika no aseho ao amin’ny toromarika ho an’ilay handaha-teny ny boky na gazety nakana azy io. Azonao dinihina mialoha ilay anjara, anisan’izany ny andinin-teny. Eritrereto ny fomba azonao ampiharana ilay fanazavana eo amin’ny fanompoana.
3. Ahoana no hanomanana ny anjara misy fanontaniana?
3 Fanontaniana sy valiny: Atao toy ny Fianarana Tilikambo io anjara io, ary asiana teny fampidirana sy famaranana fohy. Tsipiho ny hevi-dehibe isaky ny fehintsoratra, ary miomàna hanome valin-teny fohy nefa misy heviny.
4. Ahoana no hanomanana ny anjara misy fiaraha-midinika amin’ny mpanatrika?
4 Lahateny misy fiaraha-midinika: Atao toy ny lahateny izy io, sady misy fiaraha-midinika amin’ny mpanatrika. Mety ho afaka hanome valin-teny ianao, raha manipika mialoha ny hevi-dehibe sy mijery ny andinin-teny. Tokony hiezaka mafy hametraka fanontaniana ilay rahalahy manao ity anjara ity, mba ho afaka hilaza ny hevi-dehibe ny mpanatrika.
5. Inona no hanampy antsika handray soa amin’ny fampisehoana?
5 Fampisehoana: Misy fampisehoana ny anjara sasany mba hahitana ny fampiharana azy eo amin’ny faritany, ary tokony hatao toy ny tena izy izany. Anti-panahy na mpitory za-draharaha na mpisava lalana no asaina hanao izany. Eritrereto mialoha ny fomba mety hanaovana ilay fampisehoana rehefa manomana ianao. Rehefa atao amin’izay ilay fampisehoana, dia eritrereto ny fomba hilazanao sy hampifanarahanao ilay fomba fitory amin’ny olona isan-karazany hitorianao. Aza hadino ny mitondra ny boky na gazety ilaina amin’ilay fampisehoana. Mety hahasoa ny mamerina ny sasany amin’ireny fampisehoana ireny mandritra ny Fotoam-pivavahan’ny Fianakaviana.
6. Nahoana isika no tokony hanomana ny Fivoriana Momba ny Fanompoana?
6 Mahafinaritra kokoa ny Fivoriana Momba ny Fanompoana, raha manomana isika ary mieritreritra mialoha ny fianarana tsara horaisintsika any. Hifampahery bebe kokoa isika raha manao toy izany. (Rom. 1:11, 12) Ho ampy fitaovana tsara kokoa isika hanatanterahana ny asa nanirahana antsika, raha manokana fotoana hanomanana ny Fivoriana Momba ny Fanompoana.—2 Tim. 3:17.