Mila Ohatra Tsara Ireo Tanora Kokoa
1 Faly isika manana tanora “midera ny anaran’i Jehovah” mitombo isa hatrany miaraka amintsika. (Sal. 148:12, 13). Maro amin’izy ireny no mbola tanora dia tanora tokoa eo amin’ny taona. Ny fandrosoany dia miankina betsaka amin’ny fampiofanana sy ny ohatra omen’ny ray aman-dreny sy ireo olona hafa be taona kokoa ao amin’ny kongregasiona. Tsy tokony hodian-tsy hita anefa ny fitaomana ampiharin’ireo tanora hafa, indrindra fa ireo zatovo lehibe kokoa sy ireo olon-dehibe mbola tanora. Raha ao anatin’izany taona izany ianao, dia mety hitondra soa ho anao ireto fanazavana ireto.
2 Ireo ankizy latsaka ny telo ambin’ny folo taona dia mirona hanahaka ireo zatovo be taona kokoa (telo ambin’ny folo taona no ho miakatra). Manana faniriana voajanahary hitovy amin’ireo olona iarahany akaiky izay mahatalanjona azy izy ireo. Mirona ho talanjona amin’ireo tanora hafa izay somary lehibe kokoa sy toa miseho ho marani-tsaina sy lasa lavitra kokoa noho ny hafa izy ireny. Ho vokatr’izany, dia mety hanahaka ny fiteninao sy ny fitondran-tenanao izy ireo, ary koa ny fankasitrahanao ireo zava-tsarobidy ara-panahy sy ny fandraisanao anjara amin’ireo asan’ny kongregasiona.
3 Amin’ny maha-zatovo be taona kokoa anao, dia manana tombontsoa sy andraikitra mavesatra ianao. Dieny izao, ny ohatra avelanao dia azo inoana fa efa misy heriny eo amin’ireo namanao tanora kokoa. Manontania tena hoe: ‘Karazana fitaomana manao ahoana no ampihariko eo amin’ireo tanora kokoa? Manana saina maotina ve aho, ka manalavitra ny fiadaladalana sy ny “filan’ny tanora fanahy” izay ratsy? Moa ve aho mampiseho fankatoavana sy fanajana ny ray aman-dreniko sy ireo loholona ary ny olona be taona kokoa hafa?’ (2 Tim. 2:22; Kol. 3:20). Izay lazainao sy izay ataonao dia mety ho anton-javatra lehibe iray eo amin’ny fandrosoana ara-panahin’ireo tanora kokoa izay mandinika ny fihetsikao.
4 Ny fitoriana ny hafatr’ilay Fanjakana no asa lehibe indrindra ataon’ny kongregasiona. Ny fandraisanao anjara amin’izany an-tsitrapo sy tsy tapaka dia mety hampirisika ireo namanao mba harisika kokoa. Raha afaka manomboka ny asan’ny mpisava lalana ianao, dia ho voatosika hanao toy izany koa ireo namanao. Ny fanomezana valin-teny any amin’ireo fivoriana sy ny fanoloranao an-tsitrapo ny fanampianao eo amin’ny fanaovana ireo asa ilaina ao amin’ny Efitrano Fanjakana dia mety hamela ohatra tsara koa.
5 Na dia tsy tao anatin’ny fotoana naha-zatovo azy intsony aza i Timoty fony i Paoly nanome azy izao torohevitra manaraka izao, dia afaka mampihatra izany ianareo, ry zatovo: “Aoka ho tonga fianarana ho an’ny mino hianao amin’ny fiteny, amin’ny fitondrantena, amin’ny fitiavana, amin’ny finoana, amin’ny fahadiovana.” (1 Tim. 4:12). Ny fandraisanao anjara amin-kafanam-po sy amin’ny fo manontolo eo amin’ny fanompoana an’i Jehovah dia afaka manosika amin’ny fomba manorina an’ireo miaraka aminao sy ireo tanora kokoa mandinika anao, manampy azy ireo handroso ho amin’ny fahatongavana ho lehilahy lehibe ara-panahy. (Efes. 4:13). Noho izay hitany eo aminao, dia mety ho voasintona ho amin’ny fahamarinana ireo zatovo izay anisan’ny fianakaviana vao nanomboka nianatra.
6 Ny mbola zava-dehibe kokoa, dia ny hoe: Ny faharisihanao hampiseho ireo toetra araka an’Andriamanitra dia manome voninahitra an’i Jehovah sy ny fandaminany. (Ohab. 27:11). Ireo mpandinika tso-po dia ho talanjona noho ny fifanoherana manaitra hitany eo aminao sy ireo tanora eo amin’izao tontolo izao. Koa manana fahafahana tsy manam-paharoa hanampy ireo tanora kokoa ianao eo am-pandraisanao anjara sarobidy amin’ny fiderana an’i Jehovah. — Sal. 71:17.