Aza Mitsahatra Mandroso Amin’ny Fanarahana Fahazarana Milamina
1 Ny apostoly Paoly dia nanana firaiketam-po manokana tamin’ilay kongregasiona tany Filipy, izay niforona tamin’ny alalany. Velom-pankasitrahana izy noho ireo fanomezana ara-nofo nataon’izy ireo tamin-katsaram-panahy, ary nilaza ny amin’izy ireo ho toy ny ohatra tsara izy. — 2 Kor. 8:1-6.
2 Ny taratasin’i Paoly ho an’ny Filipiana dia nosoratana noho ny fitiavana lalina. Ny boky Auxiliaire (Ni-Ri) eo amin’ny pejy faha-1176–1177 dia manao izao filazana izao: “Mampirisika ny kongregasiona tao Filipy hanohy ny lalany tsara dia tsara efa narahiny izy ao anatin’ilay taratasy hatramin’ny voalohany ka hatramin’ny farany — hitady fahaiza-manavaka lehibe kokoa ka hitana mafy ny Tenin’ny fiainana, finoana matanjaka, sy fanantenana ny valisoa ho avy.” Nanaiky tamin-kafanam-po izy ireo ka nanamafy ny fatoram-pitiavana teo amin’izy ireo sy ilay apostoly. Misy heviny manokana ho antsika amin’izao andro izao ireo tenin’i Paoly, ka manome antony tsara ho antsika hieritreretana amim-pitandremana ny fananarany, indrindra izay voalaza ao amin’ny Filipiana 3:15-17.
3 Tena ilaina ny toe-tsaina matotra: Ao amin’ny Filipiana 3:15, i Paoly dia nanoratra tamin’ny naha-lehilahy nanana fanandraman-javatra an-taonany maro azy. Niaiky ny fandrosoana ara-panahy nataon’ny Filipiana izy, ka niantso azy ireo ho Kristiana matotra nanana toe-tsaina nety. Raha mbola nanome taratry ny fanetren-tena sy ny fankasitrahana nasehon’i Jesosy ny toe-tsain’izy ireo, dia ‘tsy hanan-tsiny sady tsy hisy fitaka, ho zanak’Andriamanitra, mitana ny tenin’ny fiainana’ hatrany izy ireo. (Fil. 2:15, 16). Rehefa mamaky ireo tenin’i Paoly isika dia tokony ho tsapantsika fa miresaka amintsika izy. Araka izany dia irintsika amim-pahatsorana ny hanana toe-tsaina toy ny an’i Jesosy sy hampiseho fankasitrahana amim-panetren-tena ireo tombontsoantsika. Miantso lalandava an’i Jehovah amin’ny vavaka isika, amin’ny fangatahana fanampiana amin’io sy amin’ireo raharaha hafa. — Fil. 4:6, 7.
4 Araka ny tondroin’ny Filipiana 3:16 (NW), dia tokony hiezaka handroso isika rehetra. Ny teny hoe “fandrosoana” dia midika hoe “fandehanana mankany aloha, fanaovana fandrosoana”. Ny olona tia fandrosoana dia “liana amin’ny hevitra vaovao, zavatra hita vaovao, na fahafahana vaovao”. Tian’i Paoly ho azon’ny Filipiana fa ny Kristianisma dia tsy zavatra tsy mihetsika velively ary izay milaza ho manaraka azy io dia tsy maintsy manohy mandeha mankany aloha. Ny toe-tsainy tia fandrosoana dia hiseho amin’ny fahavononany handini-tena sy hiaiky ny fahalemeny ary hiezaka hahazo fahafahana hanao bebe kokoa na hanatsara ny toetran’izay nataony. Amin’izao andro izao ny fandaminan’i Jehovah eto an-tany dia tsy mitsahatra mandroso miandalana, manitatra foana ny ambaindain’ny asany sy ny fahazoany ny hevitry ny Tenin’Andriamanitra. Ny tsirairay amintsika dia tsy maintsy maharaka azy io, manararaotra ireo fandaharany rehetra ary mandray anjara feno amin’ny asany.
5 Mitaky fahazarana milamina ny fandrosoana: Nanohy ny teniny i Paoly tamin’ny fampirisihana ireo rahalahiny mba “hanohy handeha amim-pilaminana amin’io fahazarana io”. (Fil. 3:16, NW). Ny hoe milamina dia mitaky ny hametrahantsika ny olona sy ny zavatra amin’ny toerana tokony hisy azy avy raha ampifandraisina amin’ny hafa. Ny hoe milamina dia mitaky koa ny hitondrantsika tena tsara araka ny tokony ho izy. Ireo Kristiana tany Filipy dia nitana ny toerana tokony ho nisy azy, nitoetra ho akaikin’ny fandaminan’i Jehovah sy nifanakaiky tamin’izy samy izy. Notapahin’ny lalàn’ny fitiavana ny fiainan’izy ireo. (Jaona 15:17; Fil. 2:1, 2). Nampirisika azy ireo i Paoly mba hanana ‘fitondran-tena mendrika ny vaovao tsara’. (Fil. 1:27, NW). Zava-dehibe ho an’ny Kristiana amin’izao andro izao toy izany koa ny ilana filaminan-javatra sy fitondran-tena tsara dia tsara.
6 Ny fahazarana dia fanaovana asa mahazatra amin’ny fomba raikitra iray. Araka izany dia mifandray akaiky amin’ny fomba mahazatra eo amin’ny fanaovan-javatra izy io. Afaka miasa ho tombontsoantsika ny fahazarana iray satria tsy voatery hiato sy hieritreritra isika rehefa manao fanapahan-kevitra ny amin’ny dingana hataontsika manaraka — efa nanorina modely raikitra iray izay arahintsika amim-pahazarana isika.
7 Ny fahazarana teokratika milamina iray dia voaforon’ny fahazarana sy fanao izay mahasoa, mitondra soa, ary araka an’Andriamanitra — ho fikendrena ny hampahery antsika ara-panahy sy hanampy ny hafa ary, raha azo atao, dia hanao bebe kokoa eo amin’ny fanompoana an’i Jehovah. Ny fahombiazana amin’ny fanatratrarana ireo tanjona ireo dia mitaky fanorenana sy fitanana fahazarana iray izay mahatafiditra fianarana manokana sy fanatrehana ireo fivoriana ary fandraisana anjara amin’ny asa fitoriana.
8 Ireo zavatra tena ilaina tafiditra ao amin’ny fahazarana milamina iray: Zavatra iray tena ilaina ny “fahalalana tsara sy ny fahafantarana rehetra”. (Fil. 1:9). Mahatonga ny finoantsika ho lalina ny fianarana manokana, manatanjaka ny fankasitrahantsika ny fahamarinana ary manosika antsika hanao asa tsara dia tsara. Hitan’ny sasany fa sarotra anefa ny tsy fiovaovana eo amin’ny fahazarany mianatra. Iray amin’ireo antony lehibe omena ny tsy fisian’ny fotoana.
9 Tsy tafahoatra ny fanantitranterana ny soa raisina amin’ny famakiana ny Baiboly isan’andro. “Mahasoa” amin’ny fomba rehetra ny fampianarana raketiny. (2 Tim. 3:16, 17). Ahoana no ahafahantsika mahita fotoana hianarana ny Baiboly ao anatin’ny fahazarantsika isan’andro? Hitan’ny sasany fa afaka mifoha minitra vitsivitsy aloha kokoa izy ireo isa-maraina, rehefa mavitrika ny sainy. Hitan’ny hafa fa manao tsara kokoa izy ireo rehefa mamaky, minitra vitsivitsy alohan’ny hatoriana ny alina. Ireo vehivavy manambady mijanona ao an-trano mandritra ny andro dia mety ho afaka hanokana fotoana kely ny tolakandro, alohan’ny hahatongavan’ny hafa avy any am-piasana na avy any an-tsekoly. Ho fanampin’ny famakiana tsy tapaka ny Baiboly, dia nampidirin’ny sasany tao amin’ny fahazarany mianatra isan-kerinandro ny famakiana ilay boky hoe Proclamateurs.
10 Rehefa manorina fahazarana vaovao isika, dia tena mety hisy ny hoe hifanohitra amin’ireo fahazarantsika taloha izy ireny. Tamin’ny lasa isika dia nety ho nirona hamela ireo fanaovan-javatra tsy tena ilaina handany ny fotoana azo nampiasaina. Tsy mora ny fialana amin’izany modely izany. Tsy misy hanery antsika amin’ny fahazarantsika mianatra; ary tsy takina amintsika koa ny hanaovantsika tatitra ny amin’izay ataontsika amin’io lafiny io. Ny tsy fiovaovana eo amin’ny fahazarantsika mianatra dia miankina betsaka amin’ny fankasitrahantsika ireo “zavatra tsara [lehibe, NW] indrindra”, sy miankina amin’ny fahavononantsika hanararaotra “ny andro azo anaovan-tsoa” mba handraisan-tsoa avy amin’izany. — Fil. 1:10; Efes. 5:16.
11 Manana anjara asa tena lehibe eo amin’ny fandrosoantsika ara-panahy ireo fivoriana kristiana, manome antsika ny fampianarana sy ny fampaherezana ilaina. Koa amin’izany, ny fanatrehana ireo fivoriana dia tapany hafa iray tena ilaina eo amin’ny fahazarantsika milamina. Nanantitratitra ny maha-zava-dehibe azy io i Paoly. Izy io akory tsy zavatra azo isafidianana arakaraka izay tiana kokoa. — Heb. 10:24, 25.
12 Ahoana no ahafahana mampiseho filaminana rehefa manao planina ny amin’ny fandaharan’asantsika isan-kerinandro isika? Misy mandamina fotoana voafaritra tsara mba hikarakarana asan’ny tenany manokana, ary avy eo dia manandrana manisika ny fivoriana ao amin’izay hirika azo idirana. Tokony ho ny mifamadika amin’izany anefa no izy. Tokony homena ny toerana voalohany ireo fivoriantsika isan-kerinandro, ka ireo asa hafa nokasaina, dia hatao amin’ny fotoana tsy misy fivoriana.
13 Mitaky fanaovana planina tsara sy fiaraha-miasan’ny fianakaviana ny fanatrehana tsy tapaka ireo fivoriana. Amin’ny an-koban’andro, ny ankamaroantsika dia manana fandaharam-potoana feno asa izay mahatonga antsika tsy hanam-potoana. Afaka miara-miasa amin’ny fomba maro isan-karazany ny mpianakavy mba hahatongavana ara-potoana any amin’ny fivoriana.
14 Tsy azo avela ny asa fanompoana tsy tapaka raha tiantsika ny tsy hitsahatra handroso amin’ny fanarahana fahazarana milamina. Samy manaiky mazava ny andraikitsika mavesatra hitory ny hafatra momba ilay Fanjakana isika rehetra. Izany no maha-Vavolombelon’i Jehovah antsika. (Isaia 43:10). Koa satria izany no asa mahadodona sy mahasoa indrindra atao amin’izao andro izao, dia tsy misy fomba azontsika hiheverana araka ny tokony ho izy azy io ho tapany kisendrasendra ao anatin’ny fahazarantsika. Nananatra toy izao i Paoly: “Aoka isika hanatitra ny fanati-piderana amin’ny alalany ho an’Andriamanitra mandrakariva, dia ny vokatry ny molotra izay manaiky ny anarany.” — Heb. 13:15.
15 Rehefa manao planina ny amin’ireo asantsika ho an’ny herinandro tsirairay isika, dia tokony hisy fotoana voafaritra tsara atokana ho an’ny asa fanompoana. Azo inoana fa ny kongregasiona dia mandamina fivoriana ho amin’ny asa fanompoana alamina amin’ny fotoana maromaro isan-kerinandro, ary ny hany ataontsika dia ny manapaka hoe iza amin’ireo no azontsika tohanana. Ho tsara ny hiezahana mandray anjara amin’ny lafiny tsirairay amin’ny fanompoana, toy ny fanaovana isan-trano miaraka amin’ny gazety na zavatra vita an-tsoratra hafa, ny fanaovana fiverenana mitsidika, sy ny fitarihana fampianarana Baiboly. Afaka manao planina mialoha mihitsy aza isika mba hanao fitoriana tsy ara-potoana amin’ny fitondrana zavatra vita an-tsoratra sy amin’ny fisehoana ho mailaka hahamarika ireo fahafahana hanombo-dresaka. Koa satria mazàna isika mivoaka miaraka amin’ny hafa, dia ilaintsika ny manontany mikasika ny fandaharam-potoanany mba hahafahantsika manao fandaharana izay mety amin’ny andaniny avy.
16 Tokony hotanana ny fahazarantsika mitory na dia eo aza ny tsy firaikana ao amin’ny faritany. Fantatsika mialoha fa vitsivitsy ihany no handray tsara. (Matio 13:15; 24:9). Nirahina hitory tany amin’ny vahoaka izay ‘mpiodina sy mafy handrina ary madi-po’ i Ezekiela. Nampanantena ny hanampy an’i Ezekiela i Jehovah tamin’ny ‘fanamafisana ny handriny hanandrina ny handrin’izy ireo’, izany hoe ‘toy ny diamondra, mafy noho ny vatolampy aza’. (Ezek. 2:3, 4; 3:7-9). Noho izany dia mitaky faharetana ny fanarahana fahazarana tsy tapaka amin’ny fanompoana.
17 Ohatra tsara halain-tahaka: Ny ankamaroantsika dia manao tsara kokoa any amin’ny asa fanompoana rehefa misy olona mitarika. Nanome ohatra tsara i Paoly sy ireo namany, ary nampirisika ny hafa hanahaka azy izy. (Fil. 3:17). Ny fahazarany dia nahafaoka ireo foto-javatra rehetra nilaina mba hitanany ny tenany hatanjaka ara-panahy.
18 Amin’izao andro izao koa, dia sambatra isika manana ohatra maro tsara dia tsara. Ao amin’ny Hebreo 13:7, dia nampirisika toy izao i Paoly: “Tsarovy ny mpitondra anareo, (...) hevero ny niafaran’ny fiainany, ka araho ny finoany.” Mazava ho azy fa i Kristy no Modelintsika, kanefa dia afaka manahaka ny finoana nasehon’ireo izay mitondra isika. Sahala amin’i Paoly, ireo loholona dia tsy maintsy mahatsapa ny ilana hisehoana ho ohatra tsara amin’ny hafa. Na dia mety hiovaova aza ny toe-javatra misy azy ireo manokana, ny tsirairay aminy dia tokony ho afaka hampiseho fa mitana fahazarana milamina izy amin’ny fitanana ny tombontsoan’ilay Fanjakana ho eo amin’ny toerana voalohany. Na dia manana andraikitra amin’ny asa tsy ara-pivavahana sy amin’ny fianakaviana aza ireo loholona, dia tokony hanana fahazarana raikitra tsara izy ireo eo amin’ny fianarana manokana sy eo amin’ny fanatrehana fivoriana ary eo amin’ny fitarihana amin’ny asa fanompoana. Amin’ny fanomezan’ireo loholona porofo fa “manapaka tsara ny ankohonany” izy ireo, dia hahazo fampaherezana ny kongregasiona manontolo mba tsy hitsahatra handroso amin’ny fanarahana fahazarana milamina. — 1 Tim. 3:4, 5.
19 Tanjona ho an’ny taom-piasana vaovao: Fotoana mety mba hisaintsainana ny amin’ny fahazarantsika manokana ny fiandohan’ny taom-piasana vaovao iray. Inona no asehon’ny fandinihana indray ireo asantsika nandritra ilay taona lasa? Moa ve isika afaka nitana, na angamba nanatsara ny hatsaran’ny asantsika? Mety ho nandalina kokoa ny fianarantsika manokana isika. Mety ho tsy nanapatapaka kokoa ny fanatrehana ireo fivoriana isika, na mety ho nampitombo ny asa fanompoantsika tamin’ny firotsahana ho mpisava lalana mpanampy. Angamba isika afaka manondro asa mampiseho hatsaram-panahy kristiana voafaritra tsara izay nataontsika ho an’ny hafa tao amin’ny kongregasionantsika na tao amin’ny fianakaviantsika. Raha izany no izy, dia afaka mifaly isika fa nandeha tamin’ny fomba izay nampifaly an’Andriamanitra, ary manana antony tsara isika mba ‘tsy hitsaharana hanao izany amin’ny fomba feno kokoa’. — 1 Tes. 4:1, NW.
20 Ahoana raha somary niovaova na tapatapaka ny fahazarantsika? Nanao ahoana ny fiantraikan’izany tamintsika teo amin’ny ara-panahy? Voasakana ve ny fandrosoantsika noho ny antony sasany? Ny fihatsarana dia manomboka miaraka amin’ny fangatahana ny fanampian’i Jehovah. (Fil. 4:6, 13). Resaho amin’ny sisa ao amin’ny fianakavianao izay ilainao, angataho ny fanampian’izy ireo rehefa misy lafiny amin’ny fahazaranao ahitsy. Raha manan-java-manahirana ianao, dia mangataha fanampiana amin’ireo loholona. Raha manao ezaka amim-pahatsorana sy manaiky ny fitarihan’i Jehovah isika, dia afaka matoky fa hanalavitra ny “ho malaina na tsy hahavokatra”. — 2 Pet. 1:5-8.
21 Ny fandehanana amin’ny fanarahana fahazarana milamina dia mitondra fitahiana izay mahatonga ny fiezahantsika ho mendrika ny hatao. Eo am-pahatapahan-kevitra ny handroso amin’ny fanarahana fahazarana milamina, dia “mazotoa, fa aza malaina, ary aoka hafana fo amin’ny fanompoana [an’i Jehovah, NW]”. (Rom. 12:11). — Mba hahazoana famoaboasana amin’ny an-tsipiriany momba io foto-kevitra io, dia jereo Ny Tilikambo Fiambenana tamin’ny 1 Aogositra 1985, pejy faha-13-17.