Tanjona Inona avy no Apetrakao eo Anoloan’ny Zanakao?
1 Ny fahombiazana eo amin’ny fiainana dia miankina amin’ny fametrahana sy ny fanatratrarana tanjona misy vidiny. Ireo izay mikatsaka tanjona tsy misy vidiny firy na tsy araka ny tena izy dia diso fanantenana sy tsy afa-po amin’ny farany. Mitaky fahendrena ny hahaizana manavaka izay ho zava-kendrena hokatsahina mba hahafahana ‘hihazona [mafy, NW] ny tena fiainana’. (1 Tim. 6:19). Velom-pisaorana toy inona moa isika fa i Jehovah, amin’ny alalan’ny Teniny sy ny fandaminany, dia mampiseho antsika marina izay lalana tokony haleha! — Isaia 30:21.
2 Amin’ny fanomezana izany fitarihana feno fitiavana izany, dia manome ny ohatra tsara dia tsara ho an’ny ray aman-dreny i Jehovah. Toy izay hamela ny zanany tsy ampy fanandraman-javatra hifidy izay lalana tsara indrindra, ny ray aman-dreny hendry dia mampianatra azy ireo ny lalana tokony halehany, ka rehefa lehibe izy ireo dia “tsy hiala amin’izany”. (Ohab. 22:6). Fantatr’ireo ray aman-dreny kristiana avy amin’ny fanandraman-javatra fa tsy afaka ny hitoky amin’ny heviny manokana izy ireo; tsy maintsy miantehitra amin’i Jehovah izy ireo. (Ohab. 3:5, 6). Io zavatra ilaina io dia mbola lehibe kokoa mihitsy aza ho an’ny ankizy izay voafetra amin’ny fahalalana sy ny fanandraman-javatra.
3 Ny ray aman-dreny dia afaka mametraka eo anoloan’ny zanany, tanjona misy vidiny izay hanampy azy ireo hifantoka amin’ireo “zavatra lehibe kokoa”. (Fil. 1:10, NW). Izy ireo dia afaka manomboka amin’ny fianaram-pianakaviana, ka mampirisika ny ankizy hahatakatra ny maha-zava-dehibe azy io ary handray fahalalana avy amin’izany. Tsara ho an’ny ankizy ny mahazo fahazarana mianatra mialoha ho amin’ireo fivorian’ny kongregasiona sy fahazarana miomana hanolotra fanazavana amin’ny fomba fiteniny manokana. Ny fandraisana anjara tsy tapaka amin’ny asa fitoriana dia zava-dehibe. Ireo ankizikely dia afaka mandray anjara amin’ny fanolorana taratasy mivalona, amin’ny famakiana andinin-teny na amin’ny fanolorana gazety. Rehefa afaka mamaky teny izy ireo, dia afaka manafaingana ny fandrosoany ara-panahy ny fisoratana anarana ao amin’ny Sekolin’ny Fanompoana Teokratika. Ny fahafenoana fepetra ho mpitory tsy vita batisa na ny hekena hatao batisa dia dingana mandroso iray lehibe.
4 Rehefa manatona ireo taona maha-zatovo ny zanany, na aloha kokoa mihitsy aza, dia tokony hiresaka amin’ny fomba mijery ny zava-misy amin’izy ireo momba ireo tanjona atao ho antom-piainana ny ray aman-dreny. Ireo mpanolo-tsaina any an-tsekoly sy ireo mpiara-mianatra dia afaka mitaona mora foana azy ireo hifidy asa misy zava-kendrena araka an’izao tontolo izao, mampiseho fitiavana fatratra zavatra ara-nofo. Ny ray aman-dreny dia tokony hanampy ny zanany hifidy ireo taranja any an-tsekoly izay manome fampiofanana azo ampiharina, ka manomana azy ireo hiahy ny zavatra ilainy ara-nofo, kanefa tsy hanao sorona ny tombontsoan’ilay Fanjakana. (1 Tim. 6:6-10). Azo ampirisihina izy ireo hikatsaka ny ‘fanomezana’, dia ny fitoerana ho mpitovo, ary avy eo, atỳ aoriana, raha toa ka manapa-kevitra ny hanambady izy ireo, dia ho afaka hiantsoroka ny andraikitra mavesatra amin’ny fanambadiana. (Matio 19:10, 11; 1 Kor. 7:36-38). Amin’ny firesahana amin’ny fomba manorina ny amin’ny asan’ny mpisava lalana, ny fanompoana any amin’izay ilana fanampiana kokoa, ny fanompoana any amin’ny Betela, na ny asa misionera, ny ray aman-dreny dia mety handentika tsikelikely ao an-tsain’ny zanany na dia mbola kely aza, ny faniriana hampiasa ny fiainany amin’ny fomba izay mampifaly an’i Jehovah, handraisan’ny hafa soa, sy mitondra fitahiana ho an’ny tenany.
5 Tsy kisendrasendra amin’izao andro izao ny ananantsika ao anatin’ny fandaminana tanora maro aoka izany izay mihevitra ho ambony ireo zavatra misy vidiny kristiana ary mikatsaka tanjona teokratika. Be dia be amin’ny fahombiazan’izy ireo no azo lazaina fa noho ny nataon’ireo ray aman-dreny be fitiavana. Raha toa ianao ka ray na reny, aiza no toa alehan’ny zanakao? Mandroso tsikelikely mankamin’ny fiainana mifantoka amin’ireo tombontsoan’ilay Fanjakana ve izy ireo? Tadidio fa ny iray amin’ireo zava-dehibe indrindra azonao atao dia ny mandatsaka ao an-tsain’ny zanakao ny fahamarinana, ary ny miresaka ny amin’izy io isan’andro. Mety ho voatahy amin’ny fananana ankohonana, izay mahatoky amin’ny fanompoana an’i Jehovah ianao. — Deot. 6:6, 7, NW; Josoa 24:15.