Iza no Manana ny Toetra Ilaina mba Hitoriana?
1 Raha ny momba ny fanompoana, moa ve ianao mba efa nahatsapa toa an’i Mosesy? Hoy izy: “Tompo ô, mifona aminao aho, olona tsy mahay mandaha-teny aho, na hatrany aloha, na hatramin’izao itenenanao amin’ny mpanomponao izao aza”. (Eks. 4:10). Raha mahatsapa toy izany ianao, dia mety hirona hiahotra tsy hitory. Kanefa, i Jesosy dia ‘nandidy antsika hitory amin’ny olona ka hanao fanambarana feno’. (Asa. 10:42, NW ). Koa ahoana no hahatongavantsika ho mpitory ny vaovao tsara manana ny toetra ilaina?
2 Tsy ny habetsahan’ny fianarana tsy ara-pivavahana azontsika no mahatonga antsika hanana ny toetra ilaina ho amin’ny fanompoana. Nilaza i Paoly fa ‘tsy firy ny olon-kendry araka ny nofo nantsoina’, ary koa “ny fahendren’izao tontolo izao dia fahadalana eo anatrehan’Andriamanitra”. (1 Kor. 1:26; 3:19). I Jesosy dia nifantina an’ireo apostoliny avy tamin’ny sokajin’ny mpiasa — ny efatra tamin’izy ireo fara fahakeliny dia mpanarato. Ireo mpitondra fivavahana nieboebo dia nihevitra azy ireny tamim-panamavoana ho olona “tsy mba mpahay lalàna na nampianarina”. Rehefa tsaraina araka ny fari-pitsipik’izao tontolo izao, ireo apostoly dia tsy nanana ny toetra ilaina mba hitoriana. Kanefa, ny lahateny nataon’i Petera tamim-pahakingana tamin’ny andro Pentekosta dia nanosika olona 3 000 hatao batisa! — Asa. 2:14, 37-41; 4:13.
3 Mahatonga antsika hanana ny toetra ilaina mba hitoriana i Jehovah: Nanambara toy izao i Paoly: “Ny mahatonga anay hanana ny toetra ilaina ampy tsara dia avy amin’Andriamanitra”. (2 Kor. 3:5, NW ). I Jehovah, ilay Loharanon’ny fahendrena, dia nampianatra olona an-tapitrisany maro hitory ny fahamarinana momba ilay Fanjakana amin’ny hafa. (Isaia 54:13). Ny hoe mandaitra sy misy vokatra io asa io dia hita eo amin’ireo olona 338 491 natao batisa tamin’ny taon-dasa, ho ‘epistily velona filazan-tsoa’. (2 Kor. 3:1-3). Manana ny antony rehetra hitoriana amin-kasahiana sy amim-piekena momba ny zavatra nianarantsika avy tamin’i Jehovah isika.
4 Ny fandaminan’Andriamanitra dia nanorina fandaharam-pampiofanana iraisam-pirenena ho an’ny mpitory. Amin’ny alalan’ny Soratra Masina sy ny fitaovana fianarana Baiboly maro karazana, dia ampianarina sy ampiofanina isika mba hanjary ‘ho tanteraka, ho vonona tsara’ mba hitory. (2 Tim. 3:16, 17). Talanjona ny maro noho ny fahaizana manokana hita ao amin’ireo zavatra vita an-tsoratry ny Fikambanana. Ohatra, ny gazetiboky soedoa iray dia nilaza toy izao: “Mitory fahalalana ara-baiboly mahatalanjona sy lasa lavitra ary iraisam-pirenena ny finoana aelin’ny Vavolombelon’i Jehovah.”
5 Noho ny fitarihan-dalana omena any amin’ireo fivoriantsika dimy isan-kerinandro, ny fandaharantsika famakiana sy fianarana Baiboly, ny torohevitra ao amin’ny Sekolin’ny Fanompoana Teokratika, ny fanampiana manokana omen’ny hafa, izay mpitory za-draharaha ary ambonin’ny zavatra rehetra, ny fanohanan’ny fanahy masin’i Jehovah, dia afaka matoky isika fa mihevitra antsika ho manana ny toetra ilaina tanteraka mba hitoriana i Jehovah. “Avy amin’Andriamanitra sady eo anatrehan’Andriamanitra no itenenanay ao amin’i Kristy.” — 2 Kor. 2:17.
6 Raha manararaotra amin’ny fomba feno ny fampiofanana teokratika omen’Andriamanitra amin’ny alalan’ny fandaminany isika, dia tsy manana antony hahatonga antsika hiahotra na hatahotahotra. Afaka mitory amim-pifaliana amin’ny hafa isika, noho ny toky fa hitahy ny ezaka ataontsika i Jehovah. — 1 Kor. 3:6.