Aoka Ianao ho Fianarana Amin’ny Fiteny sy Amin’ny Fitondran-tena
1 Nananatra an’i Timoty mba ho tonga fianarana amin’ny fiteny sy amin’ny fitondran-tena ny apostoly Paoly. (1 Tim. 4:12). Isika koa dia tokony hanana fiteny sy fitondran-tena fakan-tahaka, indrindra fa rehefa mandray anjara amin’ny fanompoana, satria ny fanaovana izany dia mety hamaritana raha manohina ny fon’izay iresahantsika isika na tsia.
2 Mila mampiseho ny lafiny rehetra amin’ny fahalalam-pomba isika, anisan’izany ny fanajana, ny fanehoam-piheverana, ny hatsaram-panahy ary ny fahaiza-mandanjalanja. Amin’ny fanomezana taratr’ireo toetra ireo, isika dia mampiseho fa fantatsika fa misy fiantraikany eo amin’ny fihetseham-pon’ny hafa ny zavatra ataontsika. Ny fahalalam-pomba eo amin’ny fanompoana dia azo ampitahaina amin’ireo zava-manitra izay ampiasaina mba hampitomboana tsiron-kanina. Raha tsy misy azy ireo, ny sakafo mahasalama dia mety hatsatso sy tsy hampahazoto homana. Ny tsy fampisehoana fahalalam-pomba eo amin’ny fifampiraharahantsika amin’ny hafa dia afaka manana vokany mitovy amin’izany. — Kol. 4:6.
3 Aoka ianao ho fianarana amin’ny fitenenana: Ny tsiky amim-pisakaizana sy ny fiarahabana mafana dia foto-javatra tena lehibe amin’ny fampisehoantsika ny vaovao tsara. Rehefa mampisy tsirony ny fampidiran-dresatsika amin’ny alalan’ny hafanana sy ny fahatsoram-po isika, dia mamela ny tompon-trano hahafantatra fa liana marina ny aminy isika. Rehefa miteny izy, dia mihainoa amim-pitandremana ary manehoa fanajana ny heviny araka ny mety. Rehefa miteny ianao, dia ataovy amim-pahaiza-mandanjalanja sy amin’ny fomba feno fahasoavana na mahafinaritra (NW ) izany. — Ampitahao amin’ny Asan’ny Apostoly 6:8.
4 Indraindray, dia mifanena amin’ny olona izay mety ho tsy sariaka, na mila ady mihitsy aza isika. Ahoana no tokony ho fihetsitsika? Nampirisika mafy antsika mba hiteny amin’ny fomba izay mampiseho ‘fahalemem-panahy sy fanajana’ ny apostoly Petera. (1 Pet. 3:15; Rom. 12:17, 18). Nilaza i Jesosy fa raha mandà amin’ny fomba tsy misy fanajana ny hafatra momba ilay Fanjakana ny tompon-trano iray, dia tokony ‘hanintsana fotsiny ny vovoka amin’ny tongotsika’ isika. (Matio 10:14). Ny fampisehoantsika fahalalam-pomba fakan-tahaka ao anatin’ny toe-javatra toy izany dia mety hanalefaka ny fon’ilay mpanohitra amin’ny farany.
5 Aoka ianao ho fianarana amin’ny fitondran-tena: Ny fitoriana ny vaovao tsara eny amin’ny arabe be mpandeha sy eny an-kalamanjana dia mitaky ny hanehoantsika fiheverana ny hafa, ny tsy hitenenantsika mafy na ny hanehoantsika kiry mihitsy, ary ny tsy hanembantsembanantsika ny lalan’ny mpandalo. Rehefa any an-tranon’ireo olona liana, dia tokony hihazona fihetsika feno fahalalam-pomba araka ny mety sy hitondra tena toy ny vahiny mahafinaritra isika, ka hampiseho fankasitrahana ny fitiavany mandray vahiny. Izay ankizy miaraka amintsika dia tsy maintsy mampiseho fanajana ny tompon-trano sy ny fananany ary tokony hahalala fomba sy hihaino tsara rehefa miresaka isika. Raha tsy voafehy ireo ankizy, izany dia hamela soritra ratsy. — Ohab. 29:15.
6 Ny fisehoantsika ivelany dia tokony hampiharihary amin’ny hafa fa mpitory ny Tenin’Andriamanitra isika. Ny akanjontsika sy ny fisehoantsika ankapobe dia tsy tokony hikorontana sy hisavoritaka na ho marevaka sy ho hafahafa. Ny fisehoantsika ivelany dia tokony ho ‘mendrika ny filazantsara’ foana. (Ampitahao amin’ny Filipiana 1:27.) Amin’ny fanomezana fiheverana amim-pitandremana ny fisehoantsika ivelany sy ny fitaovantsika, dia tsy hanao izay hahatafintohina ny hafa na hanomezany tsiny ny fanompoantsika isika. (2 Kor. 6:3, 4). Ny fitenintsika sy ny fitondran-tenantsika fakan-tahaka dia mahatonga ny hafatra momba ilay Fanjakana hanintona kokoa, ka hanome voninahitra ho an’i Jehovah. — 1 Pet. 2:12.