Fitoriana Vaovao Tsara ny amin’ny Zavatra Tsara Kokoa
1 Nandritra ny 117 taona, Ny Tilikambo Fiambenana dia niaro ny fahamarinana ao amin’ny Baiboly. Amin’izao fotoana izao, dia 18 950 000 amin’ny nomerao tsirairay no atao pirinty amin’ny fiteny 125. Ny Mifohaza! koa dia efa nanohana ny Tenin’Andriamanitra hatramin’ny ela be, ary ankehitriny dia 15 730 000 aminy no aely amin’ny fiteny 80. — Ampitahao amin’ny Kolosiana 1:23.
2 Mahafa-po amin’izay ilaina ara-panahy ireo gazety: Ny Tilikambo Fiambenana sy ny Mifohaza! dia nitondra soa ho an’ny olona tso-po an-tapitrisany maro, noho izy ireo nanampy mba hahafa-po tamin’izay nilain’izy ireo ara-panahy. Lahatsoratra manorina finoana no atonta ao. Ohatra, tao amin’ny Ny Tilikambo Fiambenana 1 Febroary 1996 isika dia nianatra fanazavana momba ny ilana ny hitokiana amin’i Jehovah sy ny Teniny. Ny Tilikambo Fiambenana 1 Martsa 1996 dia nampirisika antsika hitoetra ho sahirana eo amin’ny fanompoana an’i Jehovah sy hiandry azy. Nandrisika toy inona moa ny fandinihana tamin’ny an-tsipiriany ny faminanian’i Zefania! Avy eo, dia teo ilay fandinihana nanatanjaka finoana momba ny tsy fivadihana kristiana tao amin’ny Ny Tilikambo Fiambenana 15 Martsa 1996. Ny nomeraon’ny 15 May dia nanantitrantitra ny hasarobidin’ny famakiana sy ny fianarana ny Tenin’Andriamanitra tsy tapaka. Ireny lahatsoratra ireny dia nahatonga ny fahazoantsika ny hevitry ny Tenin’Andriamanitra ho lalina kokoa, ary nitombo ny fankasitrahantsika ny Fanjakany.
3 Fanampin’izany, ireo gazety ireo dia mirakitra lahatsoratra tonga amin’ny fotoana ilana azy sy azo ampiharina momba ny fitondran-tena araka an’Andriamanitra sy ny fari-pitsipika ara-pitondran-tena kristiana ary ny foto-kevitra hafa lehibe dia lehibe. Mahay mamakafaka ireo raharaha tena lehibe mahakasika ny fiainantsika izy ireo. Ho vokany, dia manana fiainana tsara kokoa isika ankehitriny, eo am-piandrasantsika ny fahatanterahan’ireo fampanantenan’Andriamanitra zavatra tsara kokoa amin’ny hoavy. — Isaia 52:7, NW; 1 Tim. 6:19.
4 Ny fandinihana vetivety indray izay voambara eo amin’ny pejy faha-4 amin’ny nomerao tsirairay amin’ny Mifohaza! dia manome antsika antony tsara hilazana fa io gazety io dia zavatra hovakina faran’izay tsara natao ho an’ny olona hatraiza hatraiza, na tanora na antitra. Hoy ny ambara ao: “Natao ho fanazavana ny fianakaviana manontolo ny Mifohaza! Mampiseho ny fomba hiatrehana ireo zava-manahirana amin’ny andro ankehitriny izy. Manao tatitra momba ny vaovao izy, mitantara momba ny olona any amin’ny tany maro, mamakafaka ny fivavahana sy ny siansa. Tsy izay ihany anefa. Mandalin-javatra izy, ka manondro ny tena hevitra fonosin’ireo fisehoan-javatra farany, nefa tsy momba ny atsy na ny aroa hatrany izy amin’ny politika ary tsy manandratra firazanana iray ho ambony noho ny iray hafa. Ny zava-dehibe indrindra dia hoe itỳ gazety itỳ dia mampitombo fatokiana ny fampanantenan’ny Mpamorona tontolo vaovao miadana sy mandry feizay izay hisolo ny fandehan-javatra ratsy sy tsy tan-dalàna ankehitriny.”
5 Zarao amin’ny hafa ireo gazety: Mazotoa manome sy manely Ny Tilikambo Fiambenana sy ny Mifohaza! (Ampitahao amin’ny 1 Timoty 6:18.) Manàna sasantsasany eny aminao mba hahafahanao hanolotra azy ireo amin’iza na iza tojo anao. (Mpit. 11:6). Isika rehetra, anisan’izany ny mpitory tanora sy vaovao, dia afaka mandray anjara feno amin’ny fizarana gazety amin’itỳ volana itỳ amin’ny fampiasana fomba fampiseho fohy, miorina amin’ny lahatsoratra tonga amin’ny fotoana ilana azy ao amin’ireo nomerao farany. Fantaro tsara izay raketin’izy ireo, ary atolory amim-pahatsoram-po sy amim-piekena izy ireo.
6 Ny Tilikambo Fiambenana sy ny Mifohaza! dia mirakitra fanazavana izay ilain’ny olona tsirairay. Ny fizarana azy ireo no iray amin’ireo fomba tsara indrindra ahafahantsika manampy ny hafa hahafantatra ilay vaovao tsara hoe hisy zavatra tsara kokoa ho tonga tsy ho ela!