Fanampiana Ireo Fianakaviana Hahazo Antoka fa Hanana Hoavy Maharitra Izy Ireo
1 “Mahasoa ny faniriana mihoa-pampana”, hoy ny manam-pahaizana iray momba ny vola tamina kilasy famaranana iray tao amin’ny oniversite. Hoy ny teny nanampiny: “Afaka ny ho feno faniriana mihoa-pampana ianareo no sady mbola hahatsapa tena ho mendrika ihany.” Izany dia mampiavaka itỳ tontolo itỳ, izay mampirisika ny olona hikatsaka ny tombontsoan’ny tenany manokana mba hahazoana antoka ny amin’ny hoaviny. Mifanohitra tanteraka amin’izany, fa i Jesosy dia nampianatra fa ny Kristiana dia tsy maintsy ‘mandà ny tenany, satria inona moa no soa ho azon’ny olona, raha mahazo izao tontolo izao, kanefa very ny ainy?’ (Matio 16:24-26). Mba hahazoana antoka fa hanana hoavy maharitra ny tenany, ny olona iray dia tsy maintsy mampifantoka ny fiainany manontolo amin’ny fanaovana ny sitrapon’Andriamanitra, izay ny tanjona lehibe indrindra ho an’ny fianakaviana amin’izao andro izao. (Sal. 143:10; 1 Tim. 4:8). Ampitaina ao amin’ny toko farany amin’ny boky Ny Tsiambaratelon’ny Fahasambaram-pianakaviana io hafatra io. Io boky vaovao io dia manampy ny olona hahita izay tena zava-dehibe eo amin’ny fiainana, sy ny fomba hitondrany tena mba hahasoa ny fianakaviany. Rehefa manohy mitory ny vaovao tsara hatraiza hatraiza isika, inona moa no azontsika lazaina ka hampirisika an’ireo olona hitantsika, hamaky ny boky Fahasambaram-pianakaviana? Indreto misy fanipazan-kevitra sasany:
2 Eo am-baravarana sy eny amin’ny arabe, dia ho azonao andramana ny hampiasa ny taratasy mivalona “Ankafizo ny Fiainam-pianakaviana” mba hanombohan-dresaka. Azonao atao ny manontany hoe:
◼ “Noho ireo tebiteby rehetra atototry ny fiainana maoderina antsika, heverinao ve fa azo atao ny manana fiainam-pianakaviana tena sambatra? [Avelao izy hamaly.] Itỳ taratasy mivalona itỳ dia manome toky antsika fa azo atao izany. Ho tianao ve ny hamaky azy?” Raha raisina ilay izy, dia azonao atao ny manohy ny teninao toy izao: “Koa satria ianao liana amin’io foto-kevitra io, dia mety ho tianao koa itỳ boky itỳ, izay manome torohevitra amin’ny an-tsipiriany, momba ny fomba hahitana fahasambarana eo anivon’ny fianakaviana.” Asehoy ireo loha hevitra ao anatin’ny boky Fahasambaram-pianakaviana. Tondroy ny lohatenin’ireo toko manintona sasany. Sokafy ny pejy faha-10, ary vakio ilay fehezanteny farany amin’ny fehintsoratra faha-17 ka hatramin’ny faran’ny fehintsoratra faha-18. Atolory ilay boky. Hazavao fa mbola misy zavatra hafa tianao holazaina aminy, ary anontanio ny fotoana hahafahanao hitsidika azy indray.
3 Azonao atao ny manolokolo ny fahalianan’ny olona iray tamin’ny fiainam-pianakaviana sambatra tamin’ny resaka voalohany, amin’ny filazana hoe:
◼ “Tiako ny hampiseho aminao ao amin’ilay boky noraisinao iny, zavatra iray izay inoako fa hankasitrahanao. Ny toko farany dia mifantoka amin’ilay tena tsiambaratelon’ny fahasambaram-pianakaviana. [Vakio ny fehintsoratra faha-2 eo amin’ny pejy 183.] Mariho fa ny fiaraha-miasa mba hanao ny sitrapon’Andriamanitra no fanalahidy. Manoro hevitra ny hiarahan’ny fianakaviana mianatra ny Baiboly izahay, mba hahafantarana izay sitrapon’Andriamanitra, sy ny fomba fampiharana azy io eo amin’ny ankohonana. Manolotra fampianarana Baiboly maimaim-poana izay tsy haka afa-tsy volana vitsivitsy monja, izahay. Raha mamela ahy hanao izany ianao, dia hasehoko aminao ny fomba itarihana azy io.” Miverena miaraka amin’ny bokikely Inona no Takin’Andriamanitra Amintsika? na ny boky Fahalalana, arakaraka ny tarehin-javatra.
4 Rehefa miresaka amin’ireo iray kilasy aminao any an-tsekoly na amin’ny tanora ao amin’ny faritany ianao, dia mety hanaitra ny fahalianany izao fanontaniana izao:
◼ “Zava-dehibe ve ny fisian’ny fahafahana malalaka hiresaka eo amin’ny ray aman-dreny sy ny zanany? [Avelao izy hamaly.] Mariho izay lazain’itỳ boky momba ny fiainam-pianakaviana itỳ ny amin’ny ‘Fifampiresahana Amim-pahamarinana sy Tsy An-kifonofono’. [Vakio ny fehintsoratra faha-4 manontolo sy ny fehezanteny voalohany amin’ny fehintsoratra faha-5 eo amin’ny pejy faha-65, amin’ny boky Fahasambaram-pianakaviana.] Ireo fehintsoratra manaraka dia manome fanipazan-kevitra azo ampiharina momba ny fomba hanatsarana ny fifampiresahana eo anivon’ny fianakaviana. Itỳ boky itỳ dia mitondra ny lohateny hoe Ny Tsiambaratelon’ny Fahasambaram-pianakaviana. Raha tianao ny hamaky azy, dia azonao raisina izy itỳ.” Hazavao fa hiverina ianao any aoriana, mba hahafantarana ny heviny momba izay novakiny.
5 Azonao atao ny mifototra amin’ny resaka nifanaovanao voalohany tamin’ny tanora iray momba ny fifampiresahan’ny ray aman-dreny sy ny zanaka, amin’ny filazana hoe:
◼ “Nankasitrahako ny fahalianana nasehonao tamin’ny maha-zava-dehibe ny fananana fifampiresahana tsara eo anivon’ny fianakavianao. Inona, araka ny hevitrao, no foto-kevitra lehibe indrindra tokony horesahin’ny ray aman-dreny sy ny zanaka?” Avelao izy hamaly. Avy eo, dia sokafy ny pejy faha-68 amin’ny boky Fahasambaram-pianakaviana, ary vakio ny valiny hita ao amin’ny tapany voalohany amin’ny fehintsoratra faha-11. “Ny fananana fianarana Baiboly isan-kerinandro dia fomba iray faran’izay tsara hahazoana fahalalana an’Andriamanitra.” Asehoy ny bokikely Inona no Takin’Andriamanitra Amintsika? Hazavao fa ireo fianarana 16 ao aminy dia mamintina ny hafatra fototry ny Baiboly. Vakio ny teny fampidirana eo amin’ny pejy faha-2, ary avy eo dia iaraho dinihina ny fianarana voalohany.
6 Raha mahita ray/reny iray eo amin’ny fitoriana isan-trano, na angamba eny amin’ny zaridainam-bahoaka na ny toeram-pilalaovana iray, ianao, dia ho azonao atao ny hanaitra fahalianana amin’ny filazana hoe:
◼ “Mino aho fa manaiky ianao fa tena zava-tsarotra ny mitaiza zanaka amin’izao andro izao. Inona, araka ny hevitrao, no afaka miaro ny fianakavianao amin’ny fitaomana ratsy? [Avelao izy hamaly.] Intỳ misy torohevitra tsara dia tsara izay nankasitrahako.” Tantarao ilay fanoharana eo amin’ny fehintsoratra voalohany, ary vakio ny fehintsoratra faha-2 eo amin’ny pejy faha-90 amin’ny boky Fahasambaram-pianakaviana. Hazavao fa manome fitarihan-dalana voalanjalanja izay tena mandaitra izy io, mba hiarovana ny fianakaviana amin’ny fitaomana mandrava. Atolory ilay boky, ary manolora tena hamaly izay fanontaniana hipoitra.
7 Amin’ny fitsidihanao indray ny ray/reny iray nandray ny boky “Fahasambaram-pianakaviana”, dia azonao atao ny manohy ilay resaka toy izao:
◼ “Fony isika nifankahita voalohany, dia hitako fa miahy amim-pahatsorana ny amin’ireo zanakao ianao, ary koa fa maniry hanao izay rehetra azonao atao ianao, mba hiarovana azy ireo amin’ny fitaoman-dratsy. Mety ho mbola tsy novakinao ilay izy, nefa misy fanamarihana tena lehibe ao amin’ilay boky napetrako taminao iny, izay tokony ho hitanao. [Vakio ny fehintsoratra faha-19 eo amin’ny pejy faha-59.] Ny fambolentsika fifandraisana amin’Andriamanitra dia mitaky ny hahafantarantsika azy avy ao amin’ireo pejin’ny Teniny voasoratra, ny Baiboly. Ho tianao ve ny hampisehoako ny fomba ianaran’ny fianakavianay ny Baiboly?”
8 Ireo mpanolo-tsain’izao tontolo izao dia tsy afaka manoro an’ireo fianakaviana ny lalana ho amin’ny fahasambarana. Hahatonga azy ireo ho diso fanantenana kosa aza izy ireny. Aoka isika hizara be dia be amin’ny boky Fahasambaram-pianakaviana, mba hahafahan’ny olona hatraiza hatraiza hahazo ny fanampian’ny Tenin’Andriamanitra, mba hahazo antoka fa hanana hoavy maharitra izy ireo. — 1 Tim. 6:19.