Fizarana Amin’ny Hafa ny Tsiambaratelon’ny Fahasambaram-pianakaviana
1 Ny fianakaviana no fototry ny fitambaran’olona, ary ny fianakaviana no mahaforona tanàna, tanàn-dehibe, fanjakana ary firenena manontolo. Iharan’ny fanerena mbola tsy nisy toy izany ny fianakaviana amin’izao andro izao. Misy hery mitaona matanjaka mandrahona ny fisian’ny fiainam-pianakaviana mihitsy. Tena velom-pankasitrahana mihitsy isika, noho i Jehovah, ilay Mpamolavola ny fandaharana ny amin’ny fianakaviana, nanome antsika toromarika mba hahazoantsika fahasambaram-pianakaviana! Ireo izay manaraka ny toro lalany, dia mahita fa mihena be dia be ireo zava-manahirana, ka fianakaviana miray saina sy vanona no vokatr’izany. Mandritra ny Septambra, dia manana tombontsoa hizara amin’ny hafa ilay boky hoe Ny Tsiambaratelon’ny Fahasambaram-pianakaviana isika. Aza misalasala manatona ny olona sy miresaka aminy momba ny fiainam-pianakaviana. Aoka ianao ho sariaka sy hijery ny lafy tsaran-javatra ary hahay hahataka-javatra. Inona no ho azonao lazaina?
2 Azonao atao ny manomboka amin’ny fametrahana fanontaniana, toy ny hoe:
◼ “Voamarikao ve fa fianakaviana maro no mahita fa sarotra ny miaritra ireo faneren’ny fiainana? [Avelao ilay olona hamaly.] Mampiseho ireo tatitra fa olona maro no mahita zava-manahirana ao an-tokantrano. Inona no inoanao fa hanampy ny fianakaviana hiorina tsara kokoa sy ho sambatra kokoa? [Avelao ilay olona hamaly.] Koa satria Andriamanitra no nanorina ny fandaharana ny amin’ny fianakaviana, moa ve tsy ho ara-dalàna ny handinihana ny toro lalana nomeny? [Vakio 2 Timoty 3:16, 17.] Hita ato amin’itỳ boky hoe Ny Tsiambaratelon’ny Fahasambaram-pianakaviana itỳ, ny toromarika mahasoa toy izany.” Avy eo dia anontanio ilay olona ny amin’izay heveriny ho zava-manahirana fahitan’ny fianakaviana, asehoy ilay toko miresaka momba azy io ary atolory ilay boky.
3 Amin’ny fiverenana mitsidika, dia ho azonao atao ny hiezaka hanomboka fampianarana Baiboly, amin’ny filazana hoe:
◼ “Nieritreritra momba izay nolazainao mahakasika ny fiainam-pianakaviana aho, ka nitondra zavatra izay heveriko fa hahafaly anao. [Asehoy ny bokikely Takina, avadiho ho eo amin’ny pejy faha-16, ary vakio ireo fanontaniana enina eo ambony.] Mazava ho azy fa tsy maintsy manao ny anjarany ny tsirairay ao amin’ny fianakaviana, mba hisian’ny fahasambaram-pianakaviana. Raha manana minitra vitsivitsy monja ianao, dia hasehoko anao ny fomba hahafahanao handray soa be indrindra avy amin’itỳ fanazavana itỳ.” Avy eo, dia atombohy ny fianarana ny lesona faha-8.
4 Ny fomba hafa iray hanombohan-dresaka dia ny fanononana zava-manahirana iray, angamba amin’ny filazana hoe:
◼ “Na dia maniry hahatsapa fahafaham-po aza ny tsirairay, dia fianakaviana maro no toa tsy nahomby teo amin’io lafiny io. Inona no heverinao fa hanampy azy ireny hahita ny tena fahasambarana? [Avelao ilay olona hamaly.] Taloha ela be, ny Baiboly dia nampiharihary ny karazana zava-manahirana ho hitantsika ao anatin’ny fianakaviana amin’izao andro izao. [Vakio ny 2 Timoty 3:1-3.] Kanefa, ny Baiboly dia milaza amin’ny fianakaviana koa izay tokony hataony mba handaminana ireny zava-manahirana ireny ka hahazo fahasambarana maharitra. Ireo fotopoto-pitsipiny dia aseho ato amin’itỳ boky hoe Ny Tsiambaratelon’ny Fahasambaram-pianakaviana itỳ.” Avy eo, dia asehoy ny famerenana any amin’ny faran’ny toko iray mifanentana amin’izany, vakio ilay izy ary atolory ilay boky.
5 Rehefa miverina ianao, dia ampiasao ny bokikely “Takina” mba hanombohana ny fianarana. Azonao atao ny milaza toy izao:
◼ “Tena nanohina ahy ny fahavononanao handinika ireo fotopoto-pitsipiky ny Baiboly izay mihatra amin’ny fiainam-pianakaviana. Nasehon’ny fanandraman-javatra fa vokatra tsara indrindra no azo, rehefa arahina ireo torohevitra mandaitra hita ao amin’ny Baiboly. Itỳ misy fanazavana tsotra momba ny antony mahatonga izany.” Vakio ny fehintsoratra voalohany amin’ny lesona voalohany, ao amin’ny bokikely Takina, anisan’izany ny Salamo 1:1-3 na ny Isaia 48:17, 18. Raha mamela hanao izany ny tarehin-javatra, dia diniho ny sisa amin’ilay lesona. Milazà ny hiverina mba hiaraha-mianatra ny lesona manaraka.
6 Aoka isika hanao ny ezaka rehetra azontsika atao mba hizarana amin’ny hafa ny tsiambaratelo izay mitarika ho amin’ny fahasambaram-pianakaviana — ny fanarahana ny toromarika hita ao amin’ny Tenin’Andriamanitra. — Sal. 19:7-10.