Mitoria any Amin’izay Rehetra Ahitana Olona
1 Niaiky ny anjara asan’ny fanahin’Andriamanitra teo amin’ny fanompoany ny apostoly Paoly, ka hoy izy hoe: “Andriamanitra no nampitombo.” Niaiky toy izao koa izy: “Mpiara-miasa amin’Andriamanitra izahay”. (1 Kor. 3:5-9). Tombontsoa mahatalanjona izany. Ahoana no ahafahantsika mampiseho ampahibemaso ny fankasitrahantsika ny ho mpiara-miasa amin’Andriamanitra? Amin’ny fanambarana ny vaovao tsara amin’ireo rehetra mihaona amintsika eo amin’ny asa isan-trano sy any amin’ny toerana hafa rehetra.
2 Didiana mba ‘hanao mpianatra’ isika. (Matio 28:19). Raha olona vitsy ihany no iresahantsika eny amin’ny fanompoana, dia mety ho kivy haingana isika ary hahatsapa ho tsy nahavita firy. Etsy an-danin’izany, dia ankafizintsika indrindra ny fanompoantsika rehefa afaka mahita sy miresaka amin’ny olona maro isika. Mety ho sarotra ihany izany, satria mitaky fanombohan-javatra avy amintsika ny mandeha any amin’izay rehetra ahitana olona, mba hahafahana hiresaka aminy.
3 Ohatra azo ampiharina: Afaka mitory amin’ny olona eny an-tsena isika, eny amin’ny parkings, eny amin’ny arabe, sy eny amin’ny fijanonan’ny fitateram-bahoaka. Rehefa mandeha amin’ny fitateram-bahoaka ianao, moa ve ianao vonona hanao fanambarana eny am-pandehanana? Ny Vavolombelona roa nitaingina aotobisy nisesika be mba ho any amin’ny fivoriana ho amin’ny fanompoana dia niresaka momba ilay sarina Paradisa ao amin’ny boky Fahalalana, sy ireo fampanantenan’Andriamanitra ny amin’ny hoavy. Araka ny nantenainy fa hitranga, dia nihaino ny tovolahy iray nijoro teo akaiky ary tohina noho izay reny. Talohan’ny nialany tamin’ilay aotobisy, dia nandray boky iray izy ary nangataka mba hisy hitsidika azy any an-tranony.
4 Mpitory maro no mahita fifaliana manao fanambarana tsy ara-potoana. Nankany amin’ny faritra be fivarotana teo an-toerana ny anabavy iray indray tolakandro ary nanatona ny olona izay nahavita ny fiantsenany, nefa toa tsy maika. Nahapetraka ireo zavatra vita an-tsoratra rehetra tao anaty kitapony izy. Faly ny lehilahy iray niandry tao anaty fiarakodiany nandray gazety tamin’ilay anabavy. Nanatrika fivoriana izy io taloha, ary namelona indray ny fahalianany ny resaka nifanaovan’izy ireo.
5 Tombontsoa ny mankalaza ny anaran’i Jehovah. Amin’ny fampisehoantsika ny zotom-pontsika amin’ny asa fitoriana, dia asehontsika fa tsy diso ny zava-kendren’ny hatsaram-panahin’Andriamanitra amintsika, izay tsy mendrika akory, isika. “Ankehitriny no fotoana mety indrindra” mba hanampiana ny hafa, koa aoka isika handeha any amin’izay rehetra ahitana olona, mba hitory aminy momba ny ‘andro famonjen’i’ Jehovah. — 2 Kor. 6:1, 2, NW.