Ampiasao Ireo Bokikely mba Hanintonana ny Saina sy ny Fo
1 Tokony haseho amin’ny fomba manintona ny saina sy ny fo ny fahamarinana ara-baiboly. Rehefa nanazava tamin’ny an-tsipiriany ny fahamarinana tamin’ny mpihaino azy i Jesosy, dia nifidy foto-dresaka izay nahaliana sy nanosika azy ireo hanao zavatra izy. (Lioka 24:17, 27, 32, 45). Miankina be dia be amin’ny ezaka ataontsika mba hamantarana ny zavatra ara-panahy ilain’ireo mpihaino antsika, ny fahombiazan’ny fanompoantsika.
2 Mety ho fitaovana mandaitra mba hanohinana ny saina sy ny fon’ireo izay hitantsika eny amin’ny fanompoana, ireo bokikely. Eritrereto mialoha ireo izay mety handray ilay hafatra ao amin’ny bokikely tsirairay asongadina amin’ny Aogositra:
— Tena Miahy Antsika ve Andriamanitra? Hankasitraka an’io hafatra mampionona momba ny hoavy tsy hisy fijaliana io ny olona izay mijaly ara-bola na niharan-doza.
— Inona no Zava-kendren’ny Fiainana — Ahoana no Mety Hahitanao Azy Io? Handray soa avy amin’ireo valiny miorina amin’ny Baiboly hita ao amin’io bokikely io ny tanora izay mieritreritra amim-pitandremana ny hoaviny.
— Mifalia Amin’ny Fiainana eto An-tany Mandrakizay! Hanampy ny ankizy madinika sy ireo tsy dia mahay mamaky teny loatra mba hahatakatra ny fikasan’Andriamanitra ireo sary maro sy andinin-teny voatonona ao.
— Ny Fitondram-panjakana Izay Hitondra ny Paradisa. Na iza na iza manana fifandraisana amin’ny fitondram-panjakana dia mety hanaiky io hafatra momba ny fomba handaminan’ny Fanjakan’Andriamanitra ireo zava-manahirana sarotra atrehin’ny olombelona io.
— Rehefa Nody Mandry ny Olona Iray Tianao. Maro ny mpikarakara fandevenana no mankasitraka ny fananana an’io bokikely io eo am-pelatanana mba ho an’ireo fianakaviana nidonam-pahoriana. Ireo mpitory izay manao fanambarana eny amin’ny toeram-pandevenana dia mampiasa io bokikely io mba hampiononana ireo mpandevina. Nanatona fianakaviana iray nisy olona fito mianaka izay nivavaka teo amin’ny fasana ny anabavy roa. Ho vokatry ny fizarany ilay hafatra mampionona avy tao amin’ilay bokikely, dia natomboka tamin’ilay reny ny fianarana Baiboly ny ampitson’iny!
— Tokony Hino ny Trinite ve Ianao? Ny olona iray mpivavaka be dia mety hanaiky ny fahamarinana hita ao amin’itỳ fanalana sarona ny fampianarana fototra ao amin’ny Fivavahana Lazaina fa Kristianina itỳ, dia fanalana sarona mirakitra porofo maro marim-pototra.
3 Aoka ianao hahafantatra tsara ny bokikely tsirairay, ary hijery ny fomba tsara indrindra ampiasana azy io eny amin’ny faritaninao. Mba hahitana fomba fampiseho anoloran-kevitra, dia jereo ny pejy farany amin’ny Fanompoantsika Ilay Fanjakana Jolay 1998. Enga anie i Jehovah hitahy ny ezaka ataonao mba hanohinana ny saina sy ny fon’ny olona. — Marka 6:34.