Mpiandraikitra Mitari-dalana — Ny Mpiandraikitra ny Fanompoana
1 Liana mafy amin’ny zavatra rehetra mifandray amin’ny fandroson’ny asa fitoriana ny filazantsara eny amin’ny faritany nanendrena ny kôngregasiôna, ny mpiandraikitra ny fanompoana. Araka izany, dia manana anjara asa lehibe amin’ny fanampiana antsika hanatanteraka ny andraikitsika hitory ny vaovao tsara, izy. Mitari-dalana eo amin’ny fandaminana ny raharaha rehetra mifandray amin’ny fanompoana eny amin’ny saha izy amin’ny maha mpitory ny filazantsara be zotom-po azy. Manampy ny mpitory tsirairay mba hanatsara ny fahitany vokatra eny amin’ny fanompoana izy amin’ny maha mpampianatra mahay azy. — Efes. 4:11, 12.
2 Manara-maso mivantana ny asan’ny mpanampy amin’ny fanompoana izay notendrena hikarakara ny boky, sy ny gazety, ary ny faritany, io loholona io. Izy no tompon’andraikitra amin’ny fanaovana izay hahazoana antoka fa misy tahiry ampy foana amin’ny boky sy gazety ary ny taratasy fanaovana tatitra momba ny fanompoana ampiasaintsika isam-bolana. Indray mandeha isan-taona izy dia mijery indray ny tahirin-taratasy momba ny faritany misy ny adiresin’ireo olona izay nampahafantarina antsika hoe tsy tokony hotsidihina, ary manendry rahalahy ampy fahaizana mba hitsidika azy ireny.
3 Ny mpiandraikitra ny fanompoana no tompon’andraikitra amin’ny fanaraha-maso ny endriny maro samihafa amin’ny fitoriana, anisan’izany ny fitoriana eny amin’ny toerana be fandraharahana, sy eny amin’ny arabe, ary an-telefaonina. Mailaka izy ny handamina fandaharana azo ampiharina mba hanaovana fivoriana ho amin’ny fanompoana mandritra ny herinandro, anisan’izany ny andro fety. Maneho tena fahalianana amin’ny asa fampianarana Baiboly koa izy. Mitady fomba hanomezana fanampiana ara-panahy an’ireo izay manjary tapatapaka na tsy miasa intsony eo amin’ny fanompoana izy. Miahy amim-paharisihana ny asan’ny mpisava lalana izy, ary manara-maso ilay fandaharana hoe “Manampy ny Hafa Ireo Mpisava Lalana”.
4 Amin’ny mahanisan’ny Komitin’ny Fanompoana ao Amin’ny Kôngregasiôna azy, dia ny mpiandraikitra ny fanompoana no manolotra ny fanitsiana rehetra ilaina amin’ireo Fianarana ny Bokin’ny Kôngregasiôna. Ataovy azo antoka fa hanatrika sy hiara-mandray anjara aminy amin’ny fanompoana ianao, rehefa hitsidika ny fianarana ny boky misy anao izy.
5 Tokony ho vonona hanaraka ny fitarihan-dalana omen’ny mpiandraikitra ny fanompoana ny rehetra ao amin’ny kôngregasiôna. Izany dia hanampy antsika hampitombo ny fahitantsika vokatra eo amin’ny asa fanaovana mpianatra sy ny fahitana fifaliana lehibe kokoa eo amin’ny fanompoana ataontsika.