Ny Faneren’ireo Mifandray Aminao sy ny Tombontsoanao Hitory
1 Hery matanjaka mitaona — ho amin’ny tsara na ho amin’ny ratsy — ny faneren’ireo mifandray amintsika. Ireo mpanompon’i Jehovah namantsika dia mampihatra fitaomana tsara izay mandrisika antsika ho amin’ny asa kristianina tsara dia tsara. (Heb. 10:24). Kanefa, mety hanery antsika hanaraka lalam-pitondran-tena mifanohitra amin’ny foto-pitsipika kristianina ny mpianakavy tsy Vavolombelona, ny mpiara-miasa, ny mpiara-mianatra, ny mpiara-monina, na ny olom-pantatra hafa. Mety ‘hanaratsy ny fitondran-tenantsika tsara ao amin’i Kristy’ izy ireo. (1 Pet. 3:16). Ahoana no ahafahantsika mihazona ny fahatapahan-kevitsika hanohy hitory hatrany, na dia mety hanery antsika tsy hanao izany aza ireo olona ifandraisantsika?
2 Mpianakavy: Indraindray, ny vady sady raim-pianakaviana iray tsy Vavolombelon’i Jehovah dia mety tsy haniry ny handraisan’ny vady aman-janany anjara amin’ny fanompoana ampahibemaso. Izany no toe-javatra nitranga tao amin’ny tokantrano iray tany Meksika. Tonga tao amin’ny fahamarinana ny vadin’ilay lehilahy sy ny zanany fito. Tamin’ny voalohany, dia nanohitra izy satria tsy tiany hitory sy hanolotra zavatra vita an-tsoratra ara-baiboly isan-trano ny fianakaviany. Nihevitra izy fa nanambany azy ireo izany. Nitana mafy ny fanapahan-keviny hanompo an’i Jehovah sy handray anjara tsy tapaka tamin’ny fanompoana anefa ny vady aman-janany. Rehefa nandeha ny fotoana, dia nanomboka nahita ny hasarobidin’ny fanekena ny fandaharan’Andriamanitra ny amin’ny asa fitoriana ilay lehilahy, ka nanolo-tena ho an’i Jehovah koa. Nila 15 taona izy vao nanaiky ny fahamarinana, nefa ho tonga tamin’izany ve izy, raha tsy naneho fikirizana teo amin’ny tombontsoany hitory ny fianakaviany? — Lioka 1:74; 1 Kor. 7:16.
3 Mpiara-miasa: Mety tsy ho tian’ny mpiara-miasa sasany ny ezaka ataonao mba hanaovana fanambarana aminy. Nitantara ny anabavy iray fa, rehefa niresaka momba ny faran’izao tontolo izao ny tao amin’ny birao, dia noharabina izy satria nanolo-kevitra ny hamakian’izy ireo ny Matio toko faha-24. Kanefa, andro vitsivitsy tatỳ aoriana, dia nilaza taminy ny iray tamin’ireo mpiara-miasa taminy fa voavakiny ilay toko, ka niaiky volana izy. Nametraka zavatra vita an-tsoratra taminy ilay anabavy, ary nanao fandaharana mba hiaraha-mianatra Baiboly tamin’ilay mpiara-miasa sy ny vadin’izy io. Naharitra hatramin’ny roa ora maraina ny fianarana voalohany. Taorian’ny fianarana fahatelo, dia nanomboka nanatrika ireo fivoriana izy ireo, ary tsy ela taorian’izay, dia niala tamin’ny sigara sy ny paraky, ka nanomboka nandray anjara tamin’ny fanompoana. Ho nitranga ve izany raha tsy nanao ezaka mba hilaza ny fanantenany tamin’ny hafa ilay anabavintsika?
4 Mpiara-mianatra: Tsy mahalana ny fahitana tanora Vavolombelona iharan’ny faneren’ny tanora hafa any an-tsekoly sy matahotra sao hambanian’izy ireo noho ny fandraisany anjara amin’ny asa fitoriana. Hoy ny zatovo kristianina iray any Etazonia: “Natahotra ny hanao fanambarana tamin’ny tanora hafa aho, sao hihomehezany.” Koa nohalaviriny àry ny fahafahana hanao fanambarana tamin’ny tanora hafa tany an-tsekoly sy teny amin’ny faritany. Ahoana no ahafahanao mampitombo tanjaka mba hiatrehana amim-pahasahiana ny faneren’ireo tanora hafa? Matokia an’i Jehovah, ka tadiavo ny tsikim-pankasitrahany. (Ohab. 29:25). Aoka ianao hirehareha ny amin’ny fahaizanao mampiasa ny Tenin’Andriamanitra eo amin’ny fanompoanao. (2 Tim. 2:15). Nanomboka nivavaka tamin’i Jehovah ilay tanora vao avy noresahina teo, ary nangataka taminy mba hanampy azy hamboly ilay faniriana hiresaka tamin’ny mpiara-mianatra taminy. Nanao fanambarana tsy ara-potoana izy tany an-tsekoly, ary nahita vokatra tsara, ka tsy ela dia niresaka tamin’ny olom-pantany rehetra. Nanatsoaka hevitra toy izao izy: “Mila sy maniry hanana fanantenana ny amin’ny hoavy ireo tanora ireo, ary mampiasa antsika i Jehovah mba hanampy azy ireo.”
5 Mpiara-monina: Mety hisy mpiara-monina amintsika na olom-pantatsika hafa ho sorena amintsika, noho isika Vavolombelona sy noho ny zavatra inoantsika. Raha matahotra ny amin’izay heveriny ianao, dia manontania tena hoe: ‘Mahafantatra ny fahamarinana izay mitarika ho amin’ny fiainana mandrakizay ve izy ireo? Inona no azoko atao mba hanohinana ny fony?’ Nomarihin’ny mpiandraikitra ny fizaran-tany iray fa ahitana vokatra tsara ny fanaovana fanambarana fohy matetitetika amin’ny mpiara-monina. Mitalahoa amin’i Jehovah mba hahazoana ny tanjaka sy ny fahendrena ilaina mba hanohizana hitady ireo olona tso-po. — Fil. 4:13.
6 Ny fanekentsika ho resin’ny faneren’ireo manohitra antsika dia mety hampifaly azy, nefa moa ve izany hitondra soa ho azy — na ho antsika? Olona teo amin’ny fiaraha-monina nisy azy ihany no nanohitra an’i Jesosy. Niaritra fanamarihana nandratra avy tamin’ireo rahalahiny iray reny taminy mihitsy aza izy. Fantany anefa fa ny hany nahafahany nanampy azy ireo dia tamin’ny fitoerany teo amin’ilay lalana nataon’Andriamanitra ho azy. Araka izany, dia “naharitra ny fanoherana nataon’ny mpanota taminy” i Jesosy. (Heb. 12:2, 3). Tsy maintsy manao toy izany isika. Aoka ianao ho tapa-kevitra hampiasa amin’ny fomba tsara indrindra ny tombontsoanao hitory ilay hafatra momba ilay Fanjakana. Amin’ny fanaovana izany, “dia hamonjy ny tenanao sy izay mihaino anao” ianao. — 1 Tim. 4:16.