Manome Hery i Jehovah
1 Ahoana no fiheveranao ny apostoly Paoly? Rehefa mamaky ny bokin’ny Asan’ny Apostoly isika, dia mahita fa be zotom-po tokoa izy teo amin’ny fanompoana an’i Jehovah. Ahoana no nahavitan’i Paoly izay rehetra nataony? Hoy izy: “Mahay ny zavatra rehetra aho ao amin’Ilay mampahery ahy.” (Fil. 4:13). Afaka mandray soa avy amin’ny hery omen’i Jehovah koa isika. Amin’ny fomba ahoana? Amin’ny fanararaotana ireo fandaharana enina ataony mba hahazoantsika tanjaka sy hery ara-panahy indray.
2 Ny Tenin’Andriamanitra: Toy ny tsy maintsy ihinanantsika sakafo mba hampahatanjaka antsika hatrany, dia tsy maintsy mamahan-tena amin’ny Tenin’Andriamanitra koa isika mba ho velona ara-panahy hatrany. (Matio 4:4). Manome hery manohana antsika ny Baiboly. Mba hihazonana ny zotom-po sy ny hafanam-pontsika ho an’ny fahamarinana, dia ilaintsika ny manao fianarana manokana sy fisaintsainana tsara, isan’andro, raha mety. — Sal. 1:2, 3.
3 Ny vavaka: Zava-dehibe ny hanatonana akaiky an’i Jehovah, indrindra fa mandritra ny fotoana ilana zavatra manokana. Omeny hery manatanjaka, amin’ny alalan’ny fanahiny, izay mangataka azy io amin’ny vavaka. (Lioka 11:13; Efes. 3:16). Mampirisika antsika ‘haharitra amin’ny fivavahana’ ny Soratra Masina. (Rom. 12:12). Manao izany ve ianao?
4 Ny kongregasiona: Manovo hery sy mahazo fampirisihana avy amin’ireo fivorian’ny kongregasiona sy ny fifaneraserana feno fitiavana amin’ireo rahalahintsika sy anabavintsika ao koa, isika. (Heb. 10:24, 25). Mampahery antsika sy manampy antsika amim-pitiavana izy ireo, rehefa azom-pahoriana isika. — Ohab. 17:17; Mpit. 4:10.
5 Ny fanompoana eny amin’ny saha: Manampy antsika hifantoka hatrany amin’ilay Fanjakana sy ny fitahiana hoentiny ny fandraisana anjara tsy tapaka amin’ny fanompoana. Mahazo fampaherezana isika rehefa manampy ny hafa hianatra momba an’i Jehovah. (Asa. 20:35). Tsy isika rehetra no afaka mifindra mba hanompo any amin’izay ilana fanampiana kokoa na manao fanompoana manontolo andro, kanefa afaka mandray anjara tsara amin’ny fanompoana amin’ny fomba hafa isika. — Heb. 6:10-12.
6 Ireo mpiandraikitra kristianina: Mandray soa avy amin’ny fampaherezana sy fanampiana omen’ireo loholona isika. Notendren’i Jehovah hiandry ny ondrin’Andriamanitra eo aminy, izy ireny. (1 Pet. 5:2). Mampahery ny kongregasiona tsidihiny ireo mpiandraikitra mpitety faritany, toy ny nataon’i Paoly tamin’ny androny. — Rom. 1:11, 12.
7 Ny ohatr’ireo mahatoky: Manome tanjaka ny fandinihana ny ohatra tsaran’ireo mpiara-miasa mahatoky fahiny sy ankehitriny. (Heb. 12:1). Rehefa mila hatanjahina indray ianao, maninona raha mamaky ny iray amin’ireo tantaram-piainana mampahery ao amin’ireo gazetintsika, na ny tatitra mampahery ao amin’ny Diary, na ny fitantarana mahaliana hafa momba ny tantara maoderin’ny Vavolombelon’i Jehovah, ao amin’ny boky Prédicateurs?
8 Nanaiky ny fahamarinana ny rahalahy iray, 90 taona mahery amin’izao fotoana izao, fony izy mbola kely. Niharam-pitsapana ny finoany, fony izy mbola tanora. Voalohany aloha, dia nandao ny fandaminan’i Jehovah ny sasany izay nazoto nifanerasera tamin’ny kongregasiona. Avy eo koa dia teo ny fanaovana isan-trano, izay sarotra taminy. Niantehitra tamin’i Jehovah foana anefa izy. Tsy ela izy dia nankafy ny fanompoana. Ary ankehitriny? Na dia tsy salama aza izy, dia mbola anisan’ny mpianakavin’ny Betelan’i Brooklyn, manompo ao amin’ny Fitambara-mpitantana ihany. Tsy nanenina mihitsy izy nifikitra tamin’ny fandaminan’i Jehovah.
9 Natao batisa ny anabavy iray, anisan’ny mpianakavin’ny Betelan’i Grande-Bretagne izao, fony izy 13 taona. Nanomboka niara-nanao ny asan’ny mpisava lalana tamin’ny anadahiny izy, herintaona taorian’io, ary herintaona taorian’izay indray dia nogadraina noho ny tsy fombana ny atsy na ny aroa ny rainy, nandritra ny Ady Lehibe Faharoa. Niantehitra tamin’i Jehovah foana izy mba hahazoana hery, ary nanompo an’ilay Andriamanitra marina hatrany. Nanambady rahalahy mahatoky iray izy tatỳ aoriana, ary niara-nanao ny sitrapon’i Jehovah hatrany izy mivady. Maty tampoka ny vadiny, rehefa nivady 35 taona izy ireo. Nahazo hery avy tamin’i Jehovah indray izy, ary mbola manao ny sitrapon’i Jehovah hatramin’izao, sady miandrandra ny hanompo mandrakizay amin’ny maha mpianakavin’i Jehovah eto an-tany.
10 Manampy sy manatanjaka ny mpanompony mahatoky i Jehovah. “Mampahatanjaka ny reraka Izy, ary izay kely hery dia omeny hery be.” Afaka mahazo amin’io loharanon-kery tsy mety ritra io isika, amin’ny fanararaotana ireo fandaharana enina voatonona etsy ambony. Tadidio izao: “Izay miandry an’i Jehovah dia mandroso hery kosa; (...) hihazakazaka izy, nefa tsy ho sasatra; handeha izy, nefa tsy ho reraka.” (Isaia 40:29-31). Niantehitra mafy tamin’i Jehovah i Paoly mba hahazoana hery, ary tsy maintsy manao toy izany koa isika.