Fotoam-pifaliana ny Fivoriambe!
1 Fotoam-pifaliana lehibe ny fivoriamben’ny Vavolombelon’i Jehovah. Nandritra ny zato taona mahery, dia anisan’ny nampisy fitomboana tao amin’ny fandaminantsika, ireny fivoriana ireny. Vitsy dia vitsy isika tany am-piandohana, kanefa hitantsika fa notahin’i Jehovah tokoa ny asantsika maneran-tany. Tamin’ny fivoriamben’ny distrika voalohany amin’ny andro ankehitriny, natao tany Chicago, Illinois, tamin’ny 1893, dia 70 tamin’ireo mpanatrika 360 no natao batisa ho mariky ny fanoloran-tenany ho an’i Jehovah. Nisy 9 454 055 no nanatrika ireo fivoriamben’ny distrika nitohitohy hoe “Mpankatò ny Tenin’Andriamanitra” tamin’ny taon-dasa, ary 129 367 no natao batisa. Tena mahafaly tokoa izany!
2 Hatramin’ny andron’ny Baiboly, dia fomba niavaka nahafahan’i Jehovah nampianatra ny vahoakany ireo fivoriana. Nihaino ny famakiana ny Lalàna “hatramin’ny vao maraina ka ambara-pitataovovonan’ny andro” ny vahoaka, tamin’ny andron’i Nehemia sy i Ezra. (Neh. 8:2, 3) ‘Nifaly indrindra’ ny vahoaka satria azony tsara kokoa ny Lalàna tamin’izay. (Neh. 8:8, 12) Faly koa isika satria noho ireo fivoriambe, dia afaka mahazo fianarana tsara sy sakafo ara-panahy “amin’ny fotoana mety” avy amin’i Jehovah, amin’ny alalan’ny “mpanompo mahatoky sy malina”, isika. (Matio 24:45, NW ) Koa satria nilaza i Jesosy fa tsy maintsy mivelona amin’ny “teny rehetra izay aloaky ny vavan’Andriamanitra” ny olona, dia tena ilaina mba hahasalama antsika ara-panahy ireo fivoriambe.—Matio 4:4.
3 Mendrika hatao ny ezaka rehetra mba hanatrehana azy io: Tokony ho tanjontsika rehetra ny hanatrika manontolo ny Fivoriamben’ny Distrika “Mpampianatra ny Tenin’Andriamanitra” amin’ity taona ity. Tokony hanao fandaharana isika mba ho tonga aloha isan’andro ary hijanona hatramin’ny “Amena!” amin’ny vavaka famaranana. Mety hilaintsika hahitsy ny fandaharam-potoanantsika mba hanatanterahana izany. Mety ho sarotsarotra ny hahazoana fotoana tsy iasana mba hanatrehana ny fivoriambe. Mila mandray fepetra hentitra isika fa tsy hiandry ny kisendrasendra fotsiny. Mila manao fandaharana mialoha isika raha mila filasiana sy/na fitaterana. Na inona na inona ezaka ataontsika, dia mendrika ny hatao izany!
4 Mihevitra ny fitahiana azo amin’ny fanatrehana fivoriambe ho zava-dehibe kokoa, noho izay vola mety ho lany mba hanatrehana izany, ny vahoakan’i Jehovah. Mariho ny ohatry ny olona sasany izay tapa-kevitra hanatrika ny fivoriambe iraisam-pirenen’ny Vavolombelon’i Jehovah hoe Ny Sitrapon’Andriamanitra, tany New York, tamin’ny 1958. Nakaton’ny rahalahy iray ny orinasany mpanao fanorenana, nandritra ny tapa-bolana, mba hanaovana asa an-tsitrapo ho fanampiana sy hanatrehana ilay fivoriambe. Nivarotra tany roa hektara ny rahalahy iray tany amin’ny Nosy Vierges, mba hahafahan’izy eni-mianaka hanatrika azy io. Nivarotra ny sambony mandeha maotera ny mpivady tanora iray mba hahafahany hitondra ny zanany rehetra tany amin’ilay fivoriambe. Telo ny zanak’izy ireo ka roa volana ny farany ary fito taona ny zokiny indrindra. Nisy telo mirahalahy avy tany Kalifornia nolazaina fa raha tsy tonga niasa izy ireo, dia hesorina amin’ny asany rehefa tafaverina. Tsy nahasakana azy ireo tsy handeha hanatrika ilay fivoriambe tsy hay hadinoina anefa izany.
5 Mamaly soa ny ezaka amim-pahatsorana ataontsika i Jehovah: Mahita sy mitahy ny ezaka ataon’ny vahoakany i Jehovah. (Heb. 6:10) Ireo nanatrika ilay fivoriambe Fitomboan’ny Teokrasia tamin’ny 1950, ohatra, dia nahare ilay lahateny nanan-tantara hoe “Tontolo Vaovao”. Nanaitra ny fahalianan’ny rehetra ny rahalahy Frederick Franz, rehefa nanontany hoe: “Ho faly ve ianareo izay manatrika ity fivoriambe iraisam-pirenena ity hahafantatra fa eto anivontsika eto, amin’ity hariva ity, dia misy maromaro mety ho tonga mpanapaka ao amin’ny tany vaovao?” Mbola faly isika 50 taona atỳ aoriana, noho iny fahatakarana mazava kokoa ny Salamo 45:16 iny.
6 Nanoratra toy izao ny raim-pianakaviana iray velom-pankasitrahana rehefa avy nanatrika ny fivoriamben’ny distrika tamin’ny taon-dasa: “Ry rahalahy, tsy ho azonareo an-tsaina mihitsy hoe hatraiza no namonjy ny ainay ilay fivoriambe. Nifindra tatỳ an-tanàn-dehibe izahay mianakavy noho ny asa, saingy nihaosa izahay teo amin’ny ara-panahy. ... Nataonay an-tsirambina ny adidinay kristianina. Nitsahatra tanteraka tsy namonjy fivoriana sy tsy nandray anjara tamin’ny fanompoana mihitsy aza izahay. ... Nanome hery vaovao anay iny fivoriambe iny, ka nametra tanjona ara-panahy indray izahay ary manao fandaharana mba hanatanterahana izany.”
7 Manome ny sakafo ara-panahy ilaintsika i Jehovah. Mamelatra latabatra feno sakafo izy any amin’ireo fivoriambentsika. Noho ny fankasitrahantsika izany sakafo izany, dia tokony ho azontsika atao ny hiteny toa an’i Kornelio fony notsidihin’ny apostoly Petera, ka hanao hoe: “Ankehitriny izahay rehetra dia efa eto anatrehan’Andriamanitra hihaino izay rehetra nandidian’ny Tompo anao.” (Asa. 10:33) Aoka ho tanjontsika ny ‘ho eo anatrehan’Andriamanitra’ amin’ny fotoam-pivoriana rehetra amin’ny fivoriamben’ny distrika “Mpampianatra ny Tenin’Andriamanitra”, amin’ity taona ity, ary aoka isika hifaly!