‘Mihainoa, ka Mandraisa Fampianarana Bebe Kokoa’
1 Miantso toy izao ny fahendrena, ao amin’ny Ohabolana: “Henoy, fa hilaza zava-tsoa aho; ary ny hilaza ny mahitsy no isokafan’ny molotro. Ahy ny fisainana sy ny fanambinana; ... mihainoa ahy hianareo, anaka; fa sambatra izay manaraka ny diako. Fa izay mahita ahy dia mahita fiainana sady mahazo sitraka amin’i Jehovah”. (Ohab. 8:6, 14, 32, 35) Voalazan’ireo teny ireo tsara ny fianarana horaisintsika any amin’ny Fivoriamben’ny Distrika “Mpampianatra ny Tenin’Andriamanitra”.
2 Nodinihina ny zavatra ilain’ny rahalahy maneran-tany, ary nomanina mba hanomezana izany ny fandaharan’ny fivoriambe. Hahazo toromarika ara-panahy sy torohevitra azo ampiharina isika any. Raha mampihatra izany isika, dia ho sambatra sy ho tsara fihavanana amin’i Jehovah foana, ary tsy hiala amin’ilay lalana mankany amin’ny fiainana mandrakizay. Tena tokony “hihaino ka handray fampianarana bebe kokoa” tokoa isika.—Ohab. 1:5, NW.
3 Alohan’ny fandaharana: Raha ta handray soa feno isika, dia tokony ho eo amin’ny toerantsika rehefa manomboka ny fandaharana, ary mila ny ho vonona ny saintsika. Tokony hiomana tsara ny tsirairay, ary hamita aloha ny zava-drehetra. Matoria aloha, ary mifohaza maraina, mba ho afaka hiomana sy hisakafo ny olona miaraka aminao. Tongava aloha any amin’ny fivoriambe, mba hahitana toerana sy hamitana izay tokony hatao alohan’ny fandaharana. Hisokatra amin’ny 8.00 maraina ny vavahady, ary hanomboka amin’ny 9.30 ny fandaharana, isan’andro.
4 Koa satria hidera an’i Jehovah “eo am-piangonana” no antony voalohany ivoriana, dia tokony hanome voninahitra an’Andriamanitsika ny fanombohan’ny fivoriambe. (Sal. 26:12) Noho izany, dia asaina ny rehetra mba hipetraka, alohan’ny hilazana ny hira fanokafana. Izany dia mifanaraka amin’izao torohevitry ny Soratra Masina izao: “Aoka ny zavatra rehetra hatao amin’ny fahamendrehana sy ny filaminana”. (1 Kor. 14:40) Inona àry no tokony hataontsika tsirairay? Vonjeo haingana ny toeranao, rehefa tazanao mipetraka eny amin’ny lampihazo ny mpitari-draharaha, mandritra ny feon-kira fanokafana. Ho afaka hihira ny hira fanokafana tsirairay amin’ny fonao manontolo ianao, amin’izay, ka hidera an’i Jehovah.—Sal. 149:1.
5 Mandritra ny fandaharana: “Nampiomana ny fony hitady ny lalàn’i Jehovah ka hankatò izany” i Ezra. (Ezra 7:10) Ahoana no hanomanantsika ny fontsika handray ny fampianaran’i Jehovah? Rehefa mijery ireo lohateny ao amin’ny fandaharana ianao, dia manontania tena hoe: ‘Inona no lazain’i Jehovah amiko amin’ny alalan’ity fandaharana ity? Ahoana no hampiasako ny fanazavana azoko mba hahitanay mianakavy soa?’ (Isaia 30:21; Efes. 5:17) Eritrereto foana ireo fanontaniana ireo mandritra ny fivoriambe. Soraty ireo hevitra tianao hampiasaina. Makà fotoana hiresahana izany aorian’ny fandaharana, isan’andro. Hanampy anao hitadidy sy hampihatra ireo fanazavana izany.
6 Mety ho sarotra ny mifantoka mandritra ny ora maro. Inona no hanampy antsika tsy hiriorio saina? Ampiasao tsara ny masonao. Izay ifantohan’ny masontsika no tena ifantohan’ny saintsika. (Matio 6:22) Mifeheza tena àry mba tsy hitodika raha vao misy tabataba kely na misy mihetsika kely. Ilay mpandahateny foana jerena. Araho ao amin’ny Baibolinao ny andinin-teny vakina, ary aza akatona ny Baibolinao rehefa hazavaina ilay izy.
7 Tsy hanelingelina ny hafa isika mandritra ny fandaharana, raha manana fitiavana kristianina. (1 Kor. 13:5) “Andro anginana” sy ihainoana io. (Mpit. 3:7) Aza miresaka na mivezivezy tsy amin’antony àry. Mandehana any amin’ny toerana fivoahana, alohan’ny fandaharana, mba tsy hivezivezena. Aza mihinana na misotro alohan’ny fiatoana, raha tsy hoe mitaky izany angaha ny fahasalamanao. Tsy tokony hanembantsembana ny hafa ireo mampiasa telefaonina fitondra mandeha na fakan-tsary. Tokony hiara-mipetraka amin’ny ray aman-dreny ny zanany rehetra, anisan’izany ny zatovo, mba ho voara-maso tsara.—Ohab. 29:15.
8 Tamin’ny herintaona, dia hoy ny anti-panahy iray efa nanatrika fivoriambe nandritra ny am-polony taona maro: “Nisy antony hafa nampiavaka an’ity fivoriambe ity. Saika ny mpanatrika rehetra, anisan’izany ny ankizy, no nandray naoty. Nahafinaritra be ny nahita izany. Nampiasaina tsara ny Baiboly rehefa nasain’ny mpandahateny nosokafana.” Tena mahate hidera ny olona mihaino tsara toy izany. Tsy hoe mahasoa antsika sy ny mpanatrika hafa fotsiny izany, fa manome voninahitra an’i Jehovah Andriamanitsika, ilay Mpampianatra Lehibe, koa.—Isaia 30:20.