Fivoriamben’ny Vondrom-paritra 2003 “Omeo Voninahitra Andriamanitra”
1 Nandidy toy izao i Jehovah, tamin’ny alalan’i Isaia, mpaminaniny nahatoky: “Mihainoa Ahy, ry vahoakako, ary atongilano amiko ny sofinareo, ry oloko.” (Isaia 51:4) Tsy miaiky ve isika fa amin’izao andro farany mihasarotra izao no tena vao mainka ilaina ny mihaino ny didin’i Jehovah? Fomba iray ahafahantsika ‘manongilan-tsofina’ amin’ny tenin’i Jehovah ny fankatoavana ilay baikony hivory mba hivavaka aminy. Tena tsy andrintsika tokoa ny fivoriamben’ny vondrom-paritra fanaontsika isan-taona, izay fotoana manokana ho antsika! Nanao fandaharana indray ny Filan-kevi-pitantanan’ny Vavolombelon’i Jehovah, mba hanaovana eto Madagasikara ny fivoriamben’ny vondrom-paritra 2003: “Omeo Voninahitra Andriamanitra.”
2 Ilaina ny fiomanana tsara: Tsy maintsy ataontsika izay hanatrehana ilay fandaharana manontolo, raha te handray soa feno amin’ny fampianarana omen’ny mpanompo mahatoky sy malina isika. (Matio 24:45) Mila mangataka andro tsy hiasana amin’ny mpampiasa ve ianao, mba hanatrehana ny andro rehetra amin’ilay fivoriambe? Talohan’ny hangatahan’i Nehemia tamin’i Artaksersesy Mpanjaka mba hankany Jerosalema hanorina ny manda, dia “nivavaka tamin’Andriamanitry ny lanitra” aloha izy. (Neh. 2:4) Tokony hivavaka amin’i Jehovah koa ianao mba ho sahy hangataka andro tsy hiasana amin’ny mpampiasa anao, mba hanatrehana ny fivoriambe mandritra ny telo andro. Ahoana anefa raha tsy manaiky hanome andro tsy hiasana ilay mpampiasa? Angamba izy hanaiky ihany raha hazavainao fa ny zavatra ianarana any amin’ireo fivoriambentsika dia manampy antsika ho mpiasa manao ny marina sy mazoto ary azo itokisana kokoa. Raha misy tsy Vavolombelona koa ny mpianakavintsika, dia tsara raha lazaintsika aminy mialoha be ny fikasantsika hanatrika fivoriambe.
3 Ataovy tanjonao ny ho tonga aloha any amin’ny toerana hanaovana fivoriambe mandritra ireo telo andro. Amin’izay ianao dia efa hahazo toerana tsara, alohan’ny hanombohan’ny hira fanokafana, ary koa ho vonona tsara ny sainao handray ny fianarana haroso. Aza mamandrika toerana ho an’olon-kafa afa-tsy ho an’ny fianakavianao akaiky ihany.
4 Iangaviana ny rehetra mba hitondra sakafo, fa tsy handeha hitady sakafo any ivelan’ny toerana anaovana fivoriambe, mandritra ny fiatoana antoandro. Raha manaja io fandaharana io ianao dia handray anjara amin’ny fitandroana ny filaminana, sady hanana fotoana betsaka kokoa hiarahana amin’ireo mpiray finoana. (Sal. 133:1-3) Ampahatsiahivina fa tsy azo itondrana zava-pisotro misy alkaola eny amin’ny toerana fanaovana fivoriambe.
5 Mihainoa ary mianara: Nanomana tsara ny fony i Ezra, mba handray ny tenin’Andriamanitra. (Ezra 7:10) Nandray am-po ny fampianaran’i Jehovah izy. (Ohab. 2:2) Afaka manomboka manomana ny fontsika isika na dia alohan’ny hiaingantsika ao an-trano aza. Azontsika atao ny misaintsaina ny foto-kevitry ny fivoriambe, ary miresaka momba izany amin’ny fianakaviantsika.
6 Mety hisy zavatra maro hanelingelina ny masontsika na ny sofintsika, raha lehibe ilay toeram-pivoriana. Mora misarika ny saina ireny fanelingelenana ireny, ka mety tsy hifantoka amin’ny mpandahateny intsony isika. Hisy fanazavana sarobidy tsy ho voaraintsika, raha mitranga izany. Mety hanampy antsika hifantoka kokoa ny fanoloran-kevitra eo amin’ilay faritra voafefy.
7 Aoka ianao hiahy ny hafa: Mahazo mampiasa fakan-tsary sy caméras ianao mandritra ny fandaharana, kanefa ataovy eo am-pitoeranao ihany izany mba tsy hanembantsembana ny manodidina. Tsy maintsy vonoina koa ny telefaonina mba tsy hanelingelina ny hafa. Tsy tokony hisy fitaovanao hampifandraisina amin’ny fanamafisam-peon’ny fivoriambe.
8 Ampio ireo mila fikarakarana manokana: Misy mila fanampiana manokana ve eo anivon’ny fiangonanareo, mba hanatrehany ny fivoriambe? Ireo havana kristianina no tena mikarakara izay fanampiana manokana ilain’ireo zokiolona na kilemaina, na ireo mpanompo manontolo andro. Afaka manampy koa anefa ny anti-panahy sy izay mahalala ny toe-javatra misy an’ireny olona mila fanampiana ireny.
9 Hojeren’ny Komitin’ny Fanompoan’ny Fiangonana indray ireo Fangatahana Filasiana ho An’izay Manan-javatra Ilaina Manokana nataon’ny mpitory. Hampiasa ny toro lalana voasoritra ao amin’ilay taratasy hofenoina ny Komitin’ny Fanompoana, ka hamaritra raha tena zavatra manokana tsy voakarakara eo an-toerana tokoa ny ao amin’ny fangatahana tsirairay. Izay mpitory tsara laza sy ireo zanany hendry tsara ihany no hahazo an’io fandaharana io. Hanontany ny mpitan-tsoratry ny fiangonana ny Sampan-draharahan’ny Filasiana raha misy tian’izy ireo ho fantatra momba ireo fangatahana filasiana manokana.
10 Mila ny fivoriamben’ny vondrom-paritra isika mba hanampy antsika hifantoka amin’ny zavatra ara-panahy, satria “mandalo ny fanaon’izao fiainana izao.” (1 Kor. 7:31) Mitaky ezaka ny fiomanana atao mba hanatrehana ny andro tsirairay amin’ilay fivoriambe, kanefa tena mahasoa izany. Nomanina ilay fivoriamben’ny vondrom-paritra hoe “Omeo Voninahitra Andriamanitra”, mba hanampiana antsika tsy hivadika, eo am-piandrasana ny fampiharana ny didim-pitsaran’i Jehovah amin’ny tontolon’i Satana. Enga anie isika tsy hamela na inona na inona hisakana antsika tsy handray ny fampianarana nomanin’i Jehovah ho antsika.—Isaia 51:4, 5.
[Fanontaniana]
1. Inona no foto-kevitry ny fivoriamben’ny vondrom-paritra 2003, ary nahoana i Jehovah no mendrika ny homentsika voninahitra?
2, 3. Inona avy no fiomanana azontsika atao mba handraisan-tsoa feno?
4. Nahoana isika rehetra no iangaviana mba hitondra sakafo antoandro any amin’ny fivoriambe?
5. Ahoana no azontsika anomanana ny fontsika ho amin’ny fivoriambe?
6. Inona no hanampy antsika hifantoka amin’ny fandaharana? (Jereo ny faritra voafefy.)
7-9. Ahoana no hitsinjovantsika ny hafa?
10. Nahoana isika no tena tokony hanatrika ny fivoriamben’ny vondrom-paritra?
[Efajoro, pejy 3]
Mifantoha Tsara
▪ Saintsaino ny lohatenin’ireo lahateny
▪ Araho ireo andinin-teny
▪ Mandraisa an-tsoratra fohy
▪ Mariho ireo hevitra hampiharinao
▪ Avereno izay zavatra nianaranao