Aza Misalasala!
1 Rehefa miomana ny hitory isan-trano isika, dia ny tsy fahasahiana hivoaka ny tranontsika no vato misakana antsika lehibe indrindra. Mety hisalasala isika hiresaka ny fahamarinana amin’ny “olona rehetra”, noho ny fiheveran-tena ho tsy mahay. (1 Tim. 2:4) Tsy tokony hisalasala hitory ny vaovao tsara anefa isika. Nahoana?
2 Hafatr’i Jehovah izy io: Nampita ny teniny tamin’ny alalan’ny Baiboly i Jehovah. Rehefa mampita amin’ny olona io hafatra io àry isika, dia ny fihevitr’i Jehovah no ampitaintsika, fa tsy ny antsika. (Rom. 10:13-15) Raha misy mandà ny hafatra momba ilay Fanjakana, dia i Jehovah mihitsy no laviny. Tsy kivy anefa isika. Matoky isika, fa hisy heriny tsara io hafatra io, eo amin’ireo maniry mafy ny hiovan’ny toe-piainana eran-tany, sy ireo mahatsapa izay ilainy ara-panahy.—Ezek. 9:4; Matio 5:3, 6.
3 Mitaona ny olona i Jehovah: Mety ho vonon-kandray izao ny olona iray tsy nety nihaino taloha, satria niova ny tarehin-javatra nisy azy ka nihatsara ny toe-pony. Angamba hasehon’i Jehovah izao fa ankasitrahany io olona io, ary ‘taominy’. (Jaona 6:44, 65) Rehefa manao izany izy, dia irintsika ny ho vonona hampiasain’i Jehovah sy hanaiky ny fitarihan-dalan’ny anjely amin’ny fitadiavana ny olona toy ireny.—Apok. 14:6.
4 Omen’Andriamanitra antsika ny fanahiny: Manampy antsika hiteny amin’ny “fahasahiana” ny fanahy masina. (Asa. 14:1-3) Raha mitadidy isika fa manana io fanohanana mahery io eo amin’ny fanompoantsika, dia tsy hiahotra isika hiresaka ny fahamarinana amin’ny mpiara-monina, mpiara-miasa, mpiara-mianatra, havana, na amin’ireo nahita fianarana, na amin’ny manankarena.
5 Nampianarin’i Jesosy antsika ny fomba fanaovana azy: Nampiasa fanontaniana mampisaintsaina sy ohatra tsotra mora azo izy, ary koa fanjohian-kevitra ara-baiboly. Nohazavainy tamin’ny fomba tsotra sy nahafinaritra ary tamin’ny fony, ny fahamarinana. Mbola izany foana no fomba tsara indrindra amin’izao andro izao. (1 Kor. 4:17) Mety hiovaova ny toe-javatra rehefa mitory isika, fa tsy miova kosa ny hafatra mahery momba ilay Fanjakana.
6 Tombontsoa ny antsika, ampiasain’i Jehovah hanampy ny olona amin’ny fomba iray tsy manan-tsahala sy tena ilaina. Aoka àry isika tsy hisalasala! Enga anie isika ho sahy, ary hamela an’i Jehovah ‘hamoha’ ho antsika ny “varavarana ho an’ny teny”, mba hahafahantsika hiresaka ny vaovao tsara amin’ny olona.—Kol. 4:2-4.