Mampihatra Izay Nianaranao Tany Amin’ny Fivoriamben’ny Vondrom-paritra “Mpampianatra ny Tenin’Andriamanitra” ve Ianao?
1 Izay nanatrika ny fivoriamben’ny vondrom-paritra tamin’ity taona ity, dia nahita fa maniry hanatontosa ny asa nasaina nataony ny vahoakan’i Jehovah, dia ny fampianarana ny Tenin’Andriamanitra. (Matio 28:19, 20) Inona no toromarika mazava renao tany, ka tianao hampiharina eo amin’ny fiainanao sy eny amin’ny fanompoana?
2 Mahasoa ho fampianarana ny soratra ara-tsindrimandry: Nanasongadina ny 2 Timoty 3:16 ny foto-kevitry ny andro voalohany. Nasehon’ilay lahateny fototra fa, raha te ho “Ampy Fitaovana Tsara mba ho Mpampianatra ny Tenin’Andriamanitra” isika, dia tsy maintsy mihevitra azy io ho sarobidy, manaja azy io mihoatra noho izay hevitr’olombelona na lovantsofina, ary mampiasa azy io hatrany. Tsy maintsy mivavaka koa isika isan’andro, mba hahazoana ny fanampian’ny fanahy masina eny amin’ny fanompoana, ary tsy maintsy miezaka hamboly ilay vokatry ny fanahy voalohany indrindra, dia ny fitiavana. Tsy maintsy mamela ny fandaminan’i Jehovah eto an-tany hampiofana antsika amin’ny fanompoana isika, mandritra ny fivoriana rehetra.
3 Ilay fitohitohizan-dahateny ny zoma hoe, “Sady Mampianatra ny Tenantsika no Mampianatra ny Hafa”, dia nanazava fa tokony ho ohatra isika amin’ny 1) fanarahana ny lalàn’Andriamanitra rehetra momba ny fitondran-tena, 2) fahazarana mianatra tsara, 3) fialana amin’ireo fihetsika sy toe-po ary toe-tsaina izay azon’i Satana hararaotina. Nianarantsika, avy eo, ny fomba iarovana ny fianakaviantsika amin’ilay loza mamely izao tontolo izao, dia ny boky sy sary vetaveta. Nasaina nanome ohatra ireo ray aman-dreny, ka tsy hijery sary vetaveta, na dia vetivety fotsiny aza, ary hanara-maso izay jeren’ny zanany ao amin’ny tele. Iza tamin’ireo torohevitra nomena ny zoma no efa nampiharinao?
4 Ny lahateny farany tamin’iny andro iny, dia nanampy antsika ho tapa-kevitra kokoa ny ho tia ny fahazavan’i Jehovah sy hiaraka foana amin’ny voahosotra mahatoky, ary hanao ny anjarantsika, mba hampitomboana ny fiadanan’ny vahoakany.
5 Mahay mampianatra ny hafa: Ny 2 Timoty 2:2 no andinin-teny fototra tamin’ny andro faharoa. Rehefa nihaino ilay fitohitohizan-dahateny ianao ny asabotsy maraina, nomarihinao ve ireo fanoloran-kevitra nahakasika ny fomba 1) hitadiavana ireo mendrika, 2) hanolokoloana ny fahalianany ary 3) hampianarana azy ireo hitandrina izay rehetra nandidian’i Kristy? Mampihatra izay nianaranao ve ianao? Ohatra, mampiseho hevitra iray avy ao amin’ny Soratra Masina ve ianao, fara fahakeliny, rehefa mitory, ary mametraka fototra ho amin’ny fitsidihana manaraka?
6 Nohamafisina tamin’ny tolakandro fa ilaina ny manahaka an’i Jesosy, ilay Mpampianatra Lehibe. Inona no ezaka ataonao mba hanahafanao azy bebe kokoa? Araka izay nianaranao tamin’ilay fitohitohizan-dahateny faharoa tamin’iny andro iny, ahoana no ‘Handraisanao Soa Bebe Kokoa Amin’ny Fampianaran’Andriamanitra’? Inona no fanoloran-kevitra efa nampiharinao, mba hifantohan’ny sainao maharitra kokoa mandritra ny fianarana manokana sy ny fivorian’ny fiangonana?
7 Azo antoka fa hanampy antsika hampitombo ny fahaizana mandaha-teny sy mampianatra ny Tenin’Andriamanitra, ilay boky mbola hivoaka hoe Mandraisa Soa avy Amin’ny Sekolin’ny Fanompoana. Hodinihina tsara kokoa ireo lafiny nampiavaka ny fomba fitenin’ireo mpanompo mahatokin’i Jehovah fahiny. Misy faritra voafefy ao amin’ny lesona tsirairay amin’io boky io, ary voafintina ao ny tokony hataontsika sy ny antony ilana izany ary ny fomba hampiharana izany. Misy fanazaran-tena koa ao. Misy faritra 29 azon’ny anabavy ifidianana, rehefa manao anjara izy. Any aoriana any, dia hovana tsikelikely ny fomba itarihana ny sekoly, araka ny efa voalaza. Mianatra sy manomana foana ve ianao, mba handraisanao soa amin’ny Sekolin’ny Fanompoana isan-kerinandro?
8 Hevero ny fotoana, ka tongava mpampianatra: Ny alahady, dia nampiomana ny sain’ny mpanatrika ny Hebreo 5:12. Ilay fitohitohizan-dahateny hoe “Manomana Antsika ho Amin’ny Andron’i Jehovah ny Faminanian’i Malakia”, dia nampirisika antsika hanome an’Andriamanitra ny tsara indrindra avy amintsika, sy hankahala ny karazana famitahana rehetra. Amin’izay, dia mety ho tafita velona isika amin’ilay andron’i Jehovah, izay sady lehibe no mahatahotra. Ilay fampisehoana tantara hoe “Hajao ny Fahefan’i Jehovah”, dia nampiseho mazava fa nahatonga an’i Kora sy ireo namany hikomy tamin’i Jehovah ny avonavona, ny fanirian-daza sy ny fialonana ary ny tsy fivadihana diso toerana. Nasehon’ny lahateny taorian’io fampisehoana io, fa ilaina amin’izao andro izao ny manaiky ny fahefan’Andriamanitra, eo anivon’ny fianakaviana sy ny fiangonana. Ilay lahateny ho an’ny besinimaro hoe “Iza no Mampianatra Fahamarinana ny Firenena Rehetra?” dia nanome porofo fa manao izany ny Vavolombelon’i Jehovah, fa ny Kristianisma Anarana kosa no misandoka ho mampianatra ny fahamarinana avy ao amin’ny Baiboly.
9 Mazava àry fa mampiofana antsika i Jehovah, mba hahaizantsika hampianatra tsara kokoa ny Teniny. Aoka isika hampihatra izay nianarantsika, ka ‘hitandrina lalandava ny tenantsika sy ny fampianarantsika, mba hamonjentsika ny tenantsika sy izay mihaino antsika.’—1 Tim. 4:16.