Sekolin’ny Fanompoana 2002
1 Heverin’ny maro ho toy ny zavatra efa mahazatra ny fahaizana miteny. Fanomezana avy amin’i Jehovah anefa ny teny. Ifandraisantsika amin’ny olona izy io, sady ilazantsika ny hevitsika sy ny fihetseham-pontsika, ary indrindra iderantsika an’i Jehovah.—Sal. 22:22; 1 Kor. 1:4-7.
2 Mampiofana lehilahy sy vehivavy ary ankizy mba hitory ny anaran’i Jehovah ny Sekolin’ny Fanompoana. (Sal. 148:12, 13) Maro be ny foto-kevitra ara-baiboly ao amin’ny fandaharan’ny sekoly 2002, ka sady hahasoa antsika manokana ireny no ho azontsika ampiasaina amin’ny fanompoana. Hitombo ny fahalalantsika sy ny fahaizantsika mampianatra ny Tenin’Andriamanitra, raha manomana sy mandray anjara amin’ny sekoly isika.—Sal. 45:1.
3 Vakio isan’andro ny Baiboly: Ho afaka hanararaotra ny fotoana malalaka mba hamakiana Baiboly isika, raha mora raisina izy io. Maro amintsika mantsy no manana minitra vitsivitsy, azo ipetrapetrahana ao anatin’ny andro. Hahasoa tokoa ny mamaky pejy iray isan’andro, fara fahakeliny, satria izay fotsiny no ataonao dia ho arakao ny famakiana Baiboly atao amin’ny sekoly!—Sal. 1:1-3.
4 Afaka manampy antsika hanohina ny fon’ny mpihaino ny fahaizana mamaky teny, sady manosika azy hidera an’i Jehovah. Tokony hamerimberina hamaky mafy ny anjarany àry ny rahalahy manao ny Anjara No. 2, rehefa manomana. Hidera azy ny mpiandraikitra ny Sekoly, ary hanome torohevitra mba hanatsarana ny vakiteniny.
5 Ampiasao ny boky Fanjohian-kevitra: Miorina amin’ny boky Fanjohian-kevitra ny Anjara No. 3 sy No. 4. Tokony hiezaka kokoa angamba ny ankamaroantsika mba hampiasa an’io fitaovana mahasoa io eny amin’ny fanompoana. Tokony hifidy faritra azo ampiharina eny amin’ny faritany ireo anabavy. Ny fomba fampianatr’izy ireo sy ny fomba ampiasany ny Soratra Masina no tena hifantohan’ny mpiandraikitra ny Sekoly.
6 Enga anie ny Sekolin’ny Fanompoana hanampy antsika rehetra hampiasa hatrany ny teny, izay fanomezan’Andriamanitra, mba hitoriana ny vaovao tsara sy hiderana an’i Jehovah Andriamanitra lehibe!—Sal. 34:1; Efes. 6:19.