Ry Ray Aman-dreny, Ampianaro Dieny Mbola Zazakely ny Zanakareo
1 “Zaro amin’izay làlana tokony halehany ny zaza, ka na rehefa antitra aza izy, dia tsy hiala amin’izany.” (Ohab. 22:6) Ry ray aman-dreny, raha tsy tianareo “hiala” amin’ny lalan’ny fahamarinana ny zanakareo, manomboka rahoviana izy ireo no tokony hampianarina an’izany? Raha mbola zazakely!
2 Rehefa nilaza i Paoly fa “hatry ny fony vao zaza” i Timoty no nampianarina zavatra ara-panahy, dia mazava fa te hilaza izy hoe hatramin’ny mbola zazakely. (2 Tim. 3:14, 15) Koa nitombo ho lehilahy tsara araka ny fanahy àry i Timoty. (Fil. 2:19-22) Ianareo koa ry ray aman-dreny, dieny mbola zazakely ny zanakareo, dia omeo ny fampianarana ilainy mba ‘hitomboany eo anatrehan’i Jehovah.’—1 Sam. 2:21.
3 Tondrahy tsara mba hitombo: Mila tondrahana rano foana ny zana-kazo mba hitomboany ho lasa hazo vaventy. Toy izany koa fa mila ny hatao vonton’ny ranon’ny fahamarinana ara-baiboly ny ankizy amin’ny sokajin-taona rehetra, mba hitomboany ho tonga mpanompon’Andriamanitra matotra. Ny fanaovana fianaram-pianakaviana tsy tapaka no fomba voalohany hampianarana ny ankizy ny fahamarinana sy hanampiana azy hanana fifandraisana akaiky amin’i Jehovah. Nefa, ry ray aman-dreny, tadidio fa misy ankizy sasany mahavita mifantoka ela kokoa noho ny hafa. Mandaitra kokoa amin’ny ankizy madinika angamba ny fianarana fohifohy nefa atao matetitetika, noho ny fianarana lava be nefa atao tsindraindray.—Deot. 11:18, 19
4 Aza hamaivanina mihitsy ny fahaizan’ny ankizy mianatra. Iresaho tantaran’olona ao amin’ny Baiboly izy ireo. Avelao izy hanao sary na hilalao tantara ara-baiboly. Ampiasao tsara ny kasety sy vidéo anananareo, anisan’izany ny fampisehoana tantara ara-baiboly. Ampifanaraho amin’ny taona sy ny fahaizan’ny zanakareo ny fianaram-pianakaviana. Tokony ho tsotra sady fohy ny fianarana eo am-boalohany, nefa tokony ho lava kokoa sy handroso kokoa izany, arakaraka ny hitomboan’ny ankizy. Ataovy velombelona ny fianarana Baiboly ary mampiasà fomba sy fitaovam-pianarana samihafa. Ataovy faran’izay mampilendalenda ny fianarana, satria tianareo ny zanakareo ‘haniry’ mafy ny Teny.—1 Pet. 2:2.
5 Ampandraiso anjara izy ao amin’ny fiangonana: Omeo tanjona hotratrarina miandalana ny zanakareo, mba handraisany anjara feno amin’izay ataon’ny fiangonana. Inona, ohatra, ny tanjona voalohany? Nisy ray aman-dreny, manan-janaka roa mbola kely, nilaza hoe: “Tamin’ny voalohany dia nampianarina tsy hikofokofoka ireo ankizy, rehefa any amin’ny Efitrano Fanjakana.” Ampio ny ankizy, avy eo, hanome valin-teny amin’ny fomba fiteniny sy hanana ho tanjona ny hisoratra anarana amin’ny Sekolin’ny Fanompoana. Rehefa manao fanompoana eny amin’ny saha, dia tanjona tsara azo tratrarina ny hametraka taratasy mivalona, hamaky andininy, hanolotra gazety, sy hanao resadresaka mahasoa amin’ny tompon-trano.
6 Manàna hafanam-po fakan-tahaka: Moa ve ny zanakao, isan’andro, mandre anao miresaka momba an’i Jehovah sy mivavaka aminy? Hitany ve ianao mianatra ny Tenin’Andriamanitra, manatrika fivoriana sy mandray anjara amin’ny fanompoana eny amin’ny saha ary finaritra manao ny sitrapon’Andriamanitra? (Sal. 40:8) Zava-dehibe ny hahitany izany sy ny hanaovanao ireo zavatra ireo miaraka aminy. Nitaiza ny zanany enina ho tonga Vavolombelona mahatoky ny vehivavy iray, ka nilaza toy izao momba azy ny zanany vavy iray efa lehibe: “Ny ohatr’i Neny no tena niraikitra tao an-tsainay, ka nandaitra kokoa noho izay nolazainy izany.” Nilaza ny ray aman-dreny manan-janaka efatra hoe: “Tsy ambentinteninay fotsiny ny hoe ‘Jehovah no eo amin’ny toerana voalohany’, fa tena niainanay mihitsy.”
7 Ry ray aman-dreny, atombohy aloha be ny fampianarana ny zanakareo. Ampianaro azy ireo ny fahamarinana ao amin’ny Tenin’Andriamanitra, manomeza tanjona hotratrariny miandalana ary aoka ianareo ho ohatra faran’izay tsara. Ho sambatra ianareo raha manao izany!