Ampitomboy ny Fifalianao eo Amin’ny Fitoriana
1 Mahita fifaliana amin’ny fanompoanao ve ianao, rehefa manambara ny vaovao tsara? Raha tsy mitandrina isika, dia mety hahatonga antsika hatahotra hitory ny tontolo ratsy manodidina antsika, ka tsy haharitra ny fifaliantsika. Mety ho kivy koa isika rehefa tsy mihaino ny olona eny amin’ny faritany. Inona avy no azontsika atao mba hampitomboana ny fifaliantsika?
2 Mieritrereta zavatra mahafaly: Tena manampy ny mieritreritra zavatra mahafaly foana. Anisan’izany, ohatra, ny fieritreretana hoe manana tombontsoa lehibe isika, satria “mpiara-miasa amin’Andriamanitra.” (1 Kor. 3:9) Momba antsika koa i Jesosy rehefa manatanteraka io asa io isika. (Matio 28:20) Manampy antsika amin’ny alalan’ireo anjely maro be izy. (Matio 13:41, 49) Afaka matoky isika, fa Andriamanitra no mitarika ny ezaka ataontsika. (Apok. 14:6, 7) Tena mahafaly àry ny fanampian’ny any an-danitra, na ahoana na ahoana fandraisan’ny olona sasany ny asantsika!
3 Miomàna tsara: Mampitombo ny fifaliantsika koa ny fanomanana tsara. Tsy mitaky zavatra betsaka ny fiomanana ho amin’ny fanompoana. Minitra vitsivitsy monja no ilaina hijerena izay hevitra horesahina ao amin’ny gazety farany na ny boky atolotra amin’ny volana. Mifidiana fomba fampiseho ao amin’ilay hoe “Fomba Fanolorana Gazety” ao amin’ny Fanompoantsika Ilay Fanjakana. Jereo ny takelaka fanampiny tamin’ny Janoary 2002, eo amin’ilay hoe “Fomba Fampiseho Azo Ampiasaina”, na mitadiava fampidiran-dresaka mandaitra ao amin’ny boky Fanjohian-kevitra. Raha tsy hainao ny mamaly ny fanoherana filazan’ny olona matetika, dia manomàna valin-teny ho fankasitrahana izay holazainy, ary mampidira foto-kevitra mahaliana iray. Tena manampy amin’io lafiny io ny boky Fanjohian-kevitra. Hatoky tena kokoa isika, ka ho faly amin’ny fitoriana raha mampiasa ireo fitaovana ireo.
4 Mahereza mivavaka: Zava-dehibe ny vavaka mba hampaharitra ny fifaliana. Koa satria manao ny asan’i Jehovah isika, dia ilaintsika ny mangataka ny fanahiny, ary iray amin’ny vokatry ny fanahy ny fifaliana. (Gal. 5:22) Hanome hery hanohizantsika ny fitoriana i Jehovah. (Fil. 4:13) Ho afaka ny hifaly hatrany isika, na dia tojo zavatra tsy mahafinaritra aza, raha mivavaka momba ny fanompoantsika. (Asa. 13:52; 1 Pet. 4:13, 14) Rehefa matahotahotra isika, dia hanampy antsika ho sahy sy ho falifaly hatrany ny vavaka.—Asa. 4:31.
5 Mitadiava fomba hitoriana: Mazava ho azy fa hahafinaritra kokoa ny fanompoantsika raha mahita olona isika, ka afaka mitory aminy. Mety hahomby kokoa ianao, raha manova ny ora andehananao isan-trano, angamba amin’ny faran’ny tolakandro na fiandohan’ny takariva. Mifanena amin’ny olona foana ianao rehefa eny an-dalana, eny an-tsena, any anaty bisy, na eny amin’ny zaridainam-panjakana. Maninona raha manomana fampidiran-dresaka fohy, ary manatona ireo olona sariaka? Raha mpiasa na mpianatra ianao, dia mifampiresaka amin’ny olona isan’andro. Mety ho afaka hitory amin’izy ireny ianao, raha milaza foto-kevitra mahaliana iray avy ao amin’ny Baiboly. Misy soso-kevitra tsara ao amin’ny pejy voalohany amin’ny takelaka fanampiny amin’ny Fanompoantsika Ilay Fanjakana Janoary 2002. Hampitombo ny fifaliana amin’ny fitoriana izany ezaka rehetra izany.
6 Tena zava-dehibe ny hifaliantsika hatrany, satria manampy antsika hiaritra izany! Handray valisoa lehibe isika raha manao izany, rehefa hifarana ity asa tsy hiverina intsony mandrakizay ity. Ny fanantenana izany fotsiny dia efa mampitombo ny fifaliantsika amin’ny fitoriana.—Matio 25:21.